Read wanga OKHUKALUSHILA MUMALAKO KA MUSA 18 Bible Online

OKHUKALUSHILA MUMALAKO KA MUSA 18 - wanga bible

OKHUKALUSHILA MUMALAKO KA MUSA 18

¹“Abesaaliisi abomuluyia olwa Abalawi, shibalabakhwo nomukabo kwomukunda kata obulaame bwosi bwosi mu Isiraeli tawe. Okhuula balie khubiemisango bisambilwe OMWAMI Nyasaye nende ebiabakhoyele okhunyoola.

²Shibalanyoolakhwo obulaame bwosi mubaana babwe tawe. OMWAMI Nyasaye niye obulaame bwabwe shinga olwa yabasuubisia.

³“Buli lwosi olwa ihunwa kata likondi bikholwa omusango, abesaaliisi okhuula bahebwe eshiambeli, tsiseya tsibili nende lisombo.

⁴Muhelesie abesaaliisi ebichese biambeli bieimele, ebiedivai, ebiamafurako miseituni nende obwoya bwambeli okhutetwa khumakondi.

⁵Shichila OMWAMI Nyasaye wenywe yaahula Lawi nende abasianibe okhurula mutsimbia tsienywe tsiosi, mbu asinjilenje buli lwosi nakhalabanila OMWAMI Nyasaye.

⁶“Ne Omulawi yesi yesi niyakharula ahamenyanga mu elala khumatookho ka Isiraeli, mana niyetsa mukhuchamakhwe habundu aha OMWAMI Nyasaye alahula,

⁷anyala okhukhalabana muliira elia OMWAMI Nyasayewe, shinga Abalawi bashie boosi olwabakhalabanilangaho imbeli ewa OMWAMI Nyasaye.

⁸Okhuula ahebwe omukabo kweshiokhulia okuhelana nende okwa abesaaliisi bashie, kata naba nanyoolile amapesa okhurula mukhukusia obulame bwomunzu yabwe.

⁹“Olwa mwinjila mushialo eshia OMWAMI Nyasaye wenywe amuhelesia, mulakholekhwo ebikhole bieshisinyo biamahanga ako kakhokanga tawe.

¹⁰Omundu yesi alanyoolekha mwinywe, ousamba omwanawe omusiani noho omukhaana shinga omusango noho oukhola obufumu noho oukhupa tsinyengo,

¹¹noho omulosi noho owebitsoyelo noho omufumu oureebanga abandu bafwa amakhuwa tawe.

¹²Omundu yesi oukhola ebikhole ebio aba oweshisinyo khu OMWAMI Nyasaye, ne khulwa ebikhole biebisinyo biabwe ebio, OMWANI Nyasaye wenywe abalondanga nabarusia imbeli wenywe.

¹³Okhuula mube abeeleleshe imbeli ewa OMWAMI Nyasaye wenywe.

¹⁴“Amahanga akamwitsa okhubukula eshialo shiabwe, kahulilanga abakholanga obulakusi nende obufumu nebutswa inywe, OMWAMI Nyasaye wenywe shiamufuchilila okhukhola ako tawe.

¹⁵“OMWAMI Nyasaye wenywe alamubusilia inywe omulakusi undi shinga isie, okhurula mubandu benywe abeene. Okhuula mumuhulilenje.

¹⁶Khunyanga yamwakhung'ana hashikulu shia Sinai, mwasaaya mbu, shimulahulilakhwo OMWAMI Nyasaye naboola noho kata okhulolakhwo lirumalie ta, shichila mwali nimurire mbu mwakhafwa.

¹⁷Kho OMWAMI Nyasaye niyamboolela ari, “Akabahaabile namalayi.

¹⁸Ndalababusilia omulakusi okhurula mubaana babwe ouli shinga iwe, ndalara amakhuwa kanje mumunwakwe, naye alababoolela koosi akemulachilisia.

¹⁹Ne omundu yesi yesi oukhaya okhuhulila amakhuwa kanje, akomulakusi aboola muliira lianje, isie omwene ndalamuhelesia eshinyasio.

²⁰Nebutswa omulakusi outsaalikha okhuboola muliira lianje likhuwa liosi liosi elia ndalamulachile okhuboola ta, noho ouboola muliira liabanyasaye bandi, okhuula yerwe.

²¹“Munyala okhukanakania mumioyo chienywe muri, ‘nakhumanye khurie oburume bwomulakusi nibuba niburulile khu OMWAMI Nyasaye.’

²²Omulakusi naba naboola muliira elia OMWAMI Nyasaye, ne akaboola ako nikalaba akobwatoto ta, kho shikaba nikarulile khu OMWAMI Nyasaye tawe. Omulakusi oyo aba naboolile amakhuwa khulwa obunyalibwe omwene, kho mulamurie tawe.”