Read wanga OKHUKALUSHILA MUMALAKO KA MUSA 19 Bible Online

OKHUKALUSHILA MUMALAKO KA MUSA 19 - wanga bible

OKHUKALUSHILA MUMALAKO KA MUSA 19

¹“Olunyuma olwa OMWAMI Nyasaye wenywe okhumulula abandu beene eshialo shiamuhelesinjia khandi nimumalile okhubukula amatookho kabwe netsinzu tsiabwe nende okhumenyamwo,

²okhuula mwiyahulile abeene amatookho kataru akali hakarikari mushialo eshia OMWAMI Nyasaye wenywe amuhelesinjia mbu mubukule.

³Okhuula mulime nimukwalasia emihanda, nimukabulamwo ebitonye bitaru omukunda okwa OMWAMI Nyasaye wenywe amuhelesinjia shinga obulame, kho mbu omundu yesi owiira owashie anyale okhwilukha niyebisamwo.

⁴Omundu yesi yesi niyetsukhana niyeera owashie oulali omusuku ta, anyala okhwilukha okhutsia mu elala khumatookho ako, mana ahonokosie obulamubwe.

⁵Haundi omundu anyala okhutsia nende omumenyaniwe mumutsuru okhurema omusaala, ne olwa achinguula ihaywa okhurema omusaala, ne ihaywa eyo yisabukha okhurula mumuyini, ne yikhupa omumenyaniwe nende okhumwira. Omundu oubele naremanga omusaala oyo anyala okhwilushila mu elala khumatookho ako, mana ahonokosie obulamubwe.

⁶Litookho niliba elala lionyene, oluchendo lunyala okhuba olurambi muno, ne omwikho wokhumala eshikwoli eshiokhwirwa okhwa oufwile anyala okhulondachila mwiruma khumulamu oyo, ne niyeera oubula eshikha oyo. Ne kata kario yetsukhane butswa niyeera omumenyani washie oulali omusukuwe tawe.

⁷Khulweshio, emulachilisia mbu, okhuula mwahule amatookho kataru akokhwilushilamwo.

⁸“Olwa OMWAMI Nyasaye wenywe ameeta okhubanguula olwakho lwomukunda, shinga olwa yasuubisia abakuuka benywe, nende okhumuhelesia omukunda kwosi okwa yamulaka,

⁹mukhoyile okhwahula khandi amatookho khandi kataru. OMWAMI Nyasaye alamuhelesia omukunda kuno nimuba nimukhola koosi akemulachilisiye inyanga yino, khandi nimuba nimumuheela nende okhumenya okhulondana nende amechesioke.

¹⁰Khole kano, kho mbu abandu ababula eshikha baleshe okhwirwa, khandi nenyu muleshe okhuba neshikha eshiokhwiirwa mushialo eshia OMWAMI Nyasaye amuhelesinjia.

¹¹“Nebutswa omundu yesi yesi naba nasila omumenyaniwe, namukoneshela, namukhupa namusalisia nafwa, naye omundu oyo niyelushila mu elala mumatookho ako,

¹²kho abakofu belitookho liomundu oyo, okhuula barumane mbu omundu oyo aleerwe nahanwa khu owokhumala eshikwoli shieshitsayi, kho mbu yeerwe.

¹³Shimulamulolelekhwo tsimbabasi tawe. Okhuula murusieho okhuratsia eshitsayi shibula eshikha mushialo shia Isiraeli kho mbu, amakhuwa kenywe kabe amalayi khwinywe.

¹⁴“Shiolasiula eshikhoni shiolwakho lwomumenyaniwo, eshia abakofu baraho mushialo eshia OMWAMI Nyasaye wenywe amuhelesia mbu shibe eshienywe tawe.

¹⁵“Omukobosheli mulala yenyene shiahelile okhukhalaka eshiina shiomundu ukholile amabi tawe. Okhuula babeho abakobosheli babili okhulolesie toto mbu, omundu oyo akholile amabi.

¹⁶Omukobosheli wobubeeyi niyebukha okhwinjilila owashie khulwa okhumuyasia obubi bwakholile,

¹⁷kho abandu abayingananga abo okhuula betse imbeli ewa OMWAMI Nyasaye, imbeli wabesaaliisi nende Abayaasi baliho munyanga etsio.

¹⁸Abayaasi abo okhuula barebelesie obulayi mubuchesi, ne oburumbusi obwo nibuba obwobubeeyi

¹⁹kho okhuula mukholele omurumbusi wobubeeyi oyo shinga olwa yenyile okhukholela omwana wabwe; kho nolwa mulayiniaho obwonooni hakari wenywe.

²⁰Mana abashie balahulilakhwo, ne nibaria khandi shibalakholakhwo obubi bundi mwinywe tawe.

²¹Shimulabatililwa tsimbabasi tawe, okhuula kabe butswa mbu, obulamu khubulamu, imoni khumoni, elino khulino, omukhono khumukhono, eshilenje khushilenje.”