Read wanga OKHUKALUSHILA MUMALAKO KA MUSA 2 Bible Online

OKHUKALUSHILA MUMALAKO KA MUSA 2 - wanga bible

OKHUKALUSHILA MUMALAKO KA MUSA 2

¹Mana Musa naboola ari, “Khwamala nikhushiukhana nikhukalukha mushitsiimi nikhulonda khunjila yokhunyanza inzakhanyu, shinga olwa OMWAMI Nyasaye yali niyandachilisiye. Mana nikhumala tsinyanga tsinyinji nikhutimatimanga mushialo shiebikulu shia Edomu.

²“Mana OMWAMI Nyasaye niyamboolela ari,

³‘Mwakhatimatima mushialo shiebikulu shino khulwa luhono luhela, shiukhane bulano mutsie elubeka lwemasaba.

⁴Ne olachilisie abandu nobaboolela ori: Muli ahambi okhubira mushialo shiebikulu shia Edomu, eshia abekho benywe aboluyia lwa Esau, nabo balamuria. Kho muurechelesie obulayi,

⁵mulachaaka okhulwana ninabo ta, shichila shindalamuhelesiakhwo liloba lieshialo shiabwe kata litutu butswa elihela ifuti ndala tawe, okhuba ndamala okhuhelesia eshialo shiebikulu shia Edomu abolwibulo lwa Esau, mbu shibe eshiabwe.

⁶Munyala okhukula eshiokhulia nende amaatsi kokhunywa okhurula khubo.

⁷Okhuba isie OMWAMI Nyasaye khandi ouli Nyasaye wenywe, ndamuhelesia ikhabi mumilimo chienywe chiosi, khandi ndamulindile obulayi olwa mwatimatimilenje mushitsiimi eshikhongo shino khulwemiyika amakhumi kane echio, ne shibulaho eshiamwaleemiletawe.’

⁸“Kho khwamala nikhutsiililila noluchendo nikhulekha injila yitsia mwitookho lia Elatsi nende elia Ezionigeberi okhuula khunyanza yomunyu, ne nikhushiukhana nikhutikulukha okhutsia mushitsiimi shia Moabu.

⁹Mana OMWAMI Nyasaye niyamboolela ari, ‘Mularanjekhwo noho okhulwana nende Abamoabu abolwibulo lwa Loti ta, shichila shindalamuhelesiakhwo liloba lieshialo shiabwe tawe. Ndamala okhubahelesia litookho lia Ari okhuba eliabwe.’

¹⁰(Abamimu abali abandu abakhongo, abamani khandi abarambi shinga Abanakimu abamenyanga mwitookho lia Ari khale.

¹¹Shinga Abanakimu boosi khandi balangungwa mbu Abarefahimu nebutswa Abamoabu babalanganga mbu Abaemimu.

¹²Abahori khandi boosi bamenyanga Edomu, nebutswa abolwibulo lwa Esau babalonda khandi nibasasia litookho liabwe mana abeene nibamenyamwo shinga olwa Abaisiraeli boosi bamala nibalonda abasuku babwe okhurula mushialo eshia OMWAMI Nyasaye yabahelesia.)

¹³“Mana nikhwambukha omwalo kwa Zeredi shinga olwa OMWAMI Nyasaye yali niyakhuboolela.

¹⁴Okhurula ebise biakhwarula Kadeshibarinea okhuula olwakhwambukha omwalo kwa Zeredi khwali nikhumalile emiyika amakhumi kataru nende munane. Ne olwibulo lwabasaatsa bokhulwana lwali nilwamululwa nibafwa lwosi pe, shinga olwa OMWAMI Nyasaye yali niyabetsubila.

¹⁵OMWAMI Nyasaye yatsiililila okhubamulula okhuula boosi pe nibafwa.

¹⁶“Kho olwa abasaatsa bokhulwana bali niberirwe boosi,

¹⁷OMWAMI Nyasaye yamboolela ari,

¹⁸‘Inyanga yino mulabira mushialo shia Moabu okhubirira khunjila ya Ari.

¹⁹Ne mwitsa okhuba nimuli ahambi okhuula mushialo shia Abamori abolwibulo lwa Loti; mulabaranjekhwo noho kata okhulwana ninabo tawe, shichila shindalamuhelesiakhwo liloba lieshialo shiabwe tawe. Ndamala okhubahelesia eshialo eshio okhuba eshiabwe.’ ”

²⁰(Eshialo shino shilangungwa khandi mbu, eshia Abarefahimu. Abarefahimu abo bamenyangayo khale nebutswa Abamori babalanganga mbu, Abazamuzumimu.

²¹Abandu bano bali abakhongo, abamani khandi abarambi shinga Abanakimu. Habula OMWAMI Nyasaye yabasasia boosi nikachila Abamori nibabukula eshialo shikalushila elubeka lwemulambo nibamenyamwo.

²²OMWAMI Nyasaye yali niyakholela Abaedomu abolwibulo lwa Esau abamenya mushialo shiebikulu shia Edomu malala ako. Yasasia Abahori nikachila Abaedomu nibabukula eshialo shiabwe nende okhumenyamwo, nishio eshiabashimenyilemwo okhuula olwaleelo.

²³Abandu okhurula khwichinga lia Kirete nibo abali nibamenya mushialo shikalushila khunyanza ya Mediterenia. Bali nibasasia Abairimu abali beene eshialo eshio, khandi bali nibabukula eshialo shikalushila elubeka lwemulambo okhuula khwitookho lia Gaza.)

²⁴Olwa khwali nikhumalile okhubira mushialo shia Moabu, OMWAMI Nyasaye yakhuboolela ari, “Bulano sumushe mwambushe omwalo kwa Arinoni. Endeere omuruchi Sihoni, owa Abamori ourukanga Heshiboni halala nende eshialoshie shiosi mumakhono kenywe. Chache okhumuseera nende okhulwana ninaye nimubukula eshialoshie.

²⁵Okhurula inyanga yino ndalakhola abandu boosi buli habundu okhumuria. Ne buli olwa eliira lienywe lirumbulwa, abandu balatechela nibatiilwa noburi.”

²⁶Kho ndaruma abarume okhurula mushitsiimi shia Kademotsi okhutsia khumuruchi Sihoni owa Heshiboni nindenyanga khukasie omulembe hakari wefwe ninaye nemboola endi,

²⁷“Nochama lekha khubirilekhwo mushialo shishio; khulalonda butswa khumuhanda, ne shikhulakotokhakhwo habundu hosi hosi tawe.

²⁸Khularunga eshiokhulia nende amaatsi kakhwitsa okhunywa. Eshiakhwenyanga butswa nokhubirila mushialo shishio,

²⁹okhuula olwa khwambukha omwalo kwa Yorodani nikhutsia mushialo eshia OMWAMI Nyasaye wefwe akhuhelesinjia. Abolwibulo lwa Esau abamenya Edomu nende Abamoabu abamenya Ari bakhufuchilila okhubirila mubialo biabwe.

³⁰“Nebutswa Sihoni omuruchi wa Heshiboni shiyakhufuchilila okhubirila mushialoshie ta, shichila OMWAMI Nyasaye wefwe yakhola omwoyokwe okhuba omutinyu khandi owokhunyasia kho mbu khumulule nende okhubukula eshialoshie eshia khushimenyangamwo okhuula leelo.

³¹“Mana OMWAMI Nyasaye niyamboolela ari, ‘Lole, emalile okhumuhelesia omuruchi Sihoni nende eshialoshie shiosi, tsie mushibukule shibe eshienywe.’

³²Mana Sihoni niyetsa nende abandube boosi okhukhulwana ahambi nende litookho lia Yahazi.

³³Nebutswa OMWAMI Nyasaye wefwe yamura mumakhono kefwe, mana nikhumwira nabasianibe nabandube boosi.

³⁴Khwamala nikhusasia amatookhoke koosi, nikhutila nende okhwira abandu boosi, abasaatsa, abakhasi nende abaana, abulaho owehonokokha tawe.

³⁵Khwabukula emiruko chiabwe khandi nikhuyaaya amatookho kabwe.

³⁶OMWAMI Nyasaye wefwe yakhunyalila okhumulula amatookho koosi okhurula khu elia Aroeri elili khundulo khwelibanda lia Arinoni nende litookho lili hakari welibanda elo, okhuula khwitookho lia Kiliedi. Libulaho litookho liali nelisiisi litinyu eliakhukhaya okhukwisia tawe.

³⁷Habula shikhwasitakhwo ahambi nende eshialo shia Abamoni noho kata khulukuku lwomwalo kwa Yaboki, noho kata amatookho keshialo shiebikulu eshio kata habundu hundi hoosi aha OMWAMI Nyasaye wefwe yali nakhukayile okhutsia tawe.