Read wanga OKHUKALUSHILA MUMALAKO KA MUSA 20 Bible Online

OKHUKALUSHILA MUMALAKO KA MUSA 20 - wanga bible

OKHUKALUSHILA MUMALAKO KA MUSA 20

¹“Olwa murula nimutsia okhulwana abasuku benywe, ne nimulola tsifarasi namakaari nende abelihe babwe nibali abanji okhushila abenywe, mulabarie ta, shichila OMWAMI Nyasaye wenywe owamurusia mushialo shia Misiri, ali ninenywe.

²Nimushili okhuchaaka okhulwana, omwisaaliisi okhuula yetse imbeli, aboolele abandu ari,

³‘Inywe abandu ba Isiraeli, recheresie! Inyanga yino mutsitsanga mwihe. Mularie abasuku benywe kata okhufwa omwoyo noho okhubeyabeya tawe.

⁴Okhuba OMWAMI Nyasaye wenywe alatsia ninenywe, ne alamuhelesia obuhuli.’

⁵“Abasesia belihe bareebe abandu bari, ‘Alikhwoho omundu oumbaashe inzu imbia, ne ashili okhuchihana khu OMWAMI Nyasaye? Naba naliho akalushe ingo. Yakhafwila mwihe, mana omundu undi natsia okhuchihana khu Nyasaye.

⁶Ne niwiina ourachile omutsabibu mumukundakwe, nebutswa ashili ohuliakhwo ebiamo biakwo? Ne naba naliho okhuula akalushe ingowe, yetsukhana nafwila, mwihe mana omundu undi nachesa nalia nabisangalila.

⁷Ne alikhwoho omusaatsa owaseleele omukhaana, nebutswa ashili okhumuteshia? Okhuula omusaatsa oyo akalushe ingowe, yetsukhana nafwila mwihe mana omusaatsa undi nateshia omukhaana oyo.’

⁸“Khandi abasesia bareebe abandu bari, ‘Alikhwoho omundu ouli noburi noho oufwiile omwoyo? Okhuula akalushe ingowe, abashie bakhafwa omwoyo shingaye.’

⁹Ne olwa abemilisi abo bamala okhuboolela abandu amakhuwa ako, abasesia baahulwe khubuli omukanda okwabelihe.

¹⁰“Olwa wuula khwitookho okhuliseera, ohelesie abandu abo obwiyangu balolosie nibaba nibali nomulembe.

¹¹Nibaba nibekula ebilibwa biabwe nende okhumwinjisia nomulembe, kho boosi babe abasumba benywe, khandi mubanichilisie okhumukholela emilimo.

¹²Nebutswa abandu belitookho elo, nibaba nibaloba okhukaasia omulembe, ne nibenya okhulwana ninenywe, kho mubotokhane litookho elo nabelihe benywe.

¹³Ne olwa OMWAMI Nyasaye wenywe amunyalila okhubukula litookho elo, mwire buli omundu oulimwo.

¹⁴Munyala abeene okhwibukulila abakhasi, abaana, emiruko nende buli shindu eshili mwitookho elo. Muli abalekhuule okhwikhoonyela buli shindu shiabasuku benywe. OMWAMI Nyasaye amuhelesiye ebio.

¹⁵Nolwa mukhoyile okhukhola amatookho kali ehale okhurula mushialo eshia mutsia okhumenyamwo.

¹⁶“Nebutswa olwa mubukula amatookho akali mushialo eshia OMWAMI Nyasaye wenywe amuhelesinjia mwire buli shindu.

¹⁷Mumulule abandu boosi pe, Abahiti, Abamori, Abakanani, Abaperisi, Abahiwi nende Abayebusi, shinga olwa OMWAMI Nyasaye yamulaka okhukhola.

¹⁸Mubeere boosi kho mbu, baleshe okhumukhola okhwonoonela OMWAMI Nyasaye khulwa okhumwechesia okhukhola ebindu bieshisinyo ebiabakholanga nibenamila abanyasaye babwe.

¹⁹“Olwa muba nimulwananga okhubukula litookho, mularema emisaala chiabwe echiebiamo ta, kata okhulwana okhwo nikhuba khutsiilila khulwa oluhoono olurambi. Mulie butswa ebiamo, ne shimulasasia emisaala chiabio tawe; Emisaala shichili abasuku benywe tawe.

²⁰Muli abalekhuule okhurema emisaala echilali echiebiamo ta, nimuchikhoonyela okhusira aha muba nimubukule okhuula olwa muba nimumalile okhutiila litookho elo liosi.”