Read wanga OKHUKALUSHILA MUMALAKO KA MUSA 21 Bible Online

OKHUKALUSHILA MUMALAKO KA MUSA 21 - wanga bible

OKHUKALUSHILA MUMALAKO KA MUSA 21

¹“Omundu naba nanyoolekha habulafu niyerirwe mushialo eshiobulaame eshia OMWAMI Nyasaye wenywe yetsa okhumuhelesia, ne mulamanya oumwirire ta,

²abakofu benywe nende Abayaasi benywe barule bachele oluchendo luliho okhurula habundu ahomulambo kuli okhuula khumatookho kali ahambi yaho.

³Abakofu belitaala elili ahambi khumulambo elo, okhuula bareere ing'ombe imoosi eyishili okhukholakhwo omulimo kwosi kwosi.

⁴Ne abakofu belitookho elo bareere nibakholomosia imoosi eyo mwibanda hamatsi kabiranga, elilalimwakhwo kata okhurakwakhwo ta, mana bafwonole likosi elia imoosi eyo mwibanda elo.

⁵Abesaaliisi abasiani ba Lawi basite imbeli, shichila OMWAMI Nyasaye wenywe yabahula okhumukhalabanila ye, khandi okhuhana ikhabi muliiralie.

⁶Abakofu boosi balitookho lili hambi ahomundu afwilile elo, okhuula basaabile amakhono kabwe khu ihunwa eyo yifwonolwe likosi mwibanda.

⁷Ne baboole bari, ‘Shinefwe abasasiye eshitsayi shino ta, kata shikhulutsikhwo nishitatsibungwa tawe!

⁸Iwe OMWAMI Nyasaye, leshela abandubo aba Isiraeli, aba omwene wanunula. Ne shiolareera eshibi shieshitsayi shibula eshikha esho, hakari wabandubo Abaisiraeli tawe. Nebutswa chama obabele obubi bweshitsayi esho.’

⁹Nimukhola akobulunjishi imbeli ewa OMWAMI Nyasaye, nolwa mwitsa okhurusiaho obubi bweshitsayi shibula eshikha hakari wenywe.

¹⁰“Olwa OMWAMI Nyasaye wenywe amukhola okhuhula mwihe, nimuhamba ababohe,

¹¹munyala okhulola mubo omukhasi welikondo lilayi, ne nimwenya okhumuteshia.

¹²Kho omuyile ingowo, abeche liswilie, ateta amatere ketsinzalatsie

¹³nende okhwikalukhasia tsingubotsie etsia aba nafwalile, okhuula amenye mungowo omwesi mulala niyekhulanga khulwa abebusibe. Olunyuma lwako onyala okhumuteshia abe omukhasiwo.

¹⁴Ne nalakhuchamisia ta, onyala okhumusebula atsie hosi aha yenya, nebutswa olamukusia amapesa kata okhumukhola shinga omusumba ta, shichila omalile okhumwonoonela.

¹⁵“Omusaatsa yesi yesi naba nabakhasi babili, nabo bosi nibamwibulila abaana abasiani, omusiani wambeli naba owomukhasi owalachama ta;

¹⁶Olwa omusaatsa oyo yenya okhukaba obulamebwe khubasiani abo, alakholakhwo ebiela khumusiani womukhasi walachama khulwa okhumukaba omukabo kwomusiani omukhulundu, owomukhasi owa yasila oyo ta.

¹⁷Omusaatsa oyo okhuula akabile omusiani oyo eshikhabili khumukabokwe, kata naba nali owomukhasi owalachama tawe. Omusaatsa okhuula afuchilile, amanye omusianiwe omukhulundu mana amuhelesie omukabokwe shinga olwa kukhoyele.

¹⁸“Omundu yesi niyakhaba nomwana omusiani ouli omubi khandi omukhayi oulahulila amebalo kasamwana kata akanyina ta, kata nibamuhelesia eshinyasio, naye nalahulila ta,

¹⁹samwana nende nyina bamutiile nibamureere hashilibwa shielitookho khubemilisi belitookholie.

²⁰Mana abebusi abo baboolele abemilisi abo bari ‘Omwana wefwe uno nomukhayi khandi oweinduli shiahulilanga amechesio kefu tawe, nomulangu khandi nomumeesi’

²¹Kho abasaatsa belitookho elo boosi mabulase omusiani oyo amachina okhuula okhufwa. Nolwa mulayinia obwonooni hakari wenywe; Ne olwa Abaisiraeli boosi balahulilakho amakhuwa ako balaria.

²²“Omundu yesi naba nakhola eshionoono eshiakwanile okhwirwa, ne niyerwa, mana nimura omubilikwe khumusaala,

²³omubilikwe kulatong'akhwo khumusaala okwo eshilo shiosi tawe, nebutswa okhuula mumuyabile inyanga yeneyo; shichila Nyasaye aleeranga eshilaamo khulwa omubili kwomundu wirirwe. Mulonoonia eshialo eshia OMWAMI Nyasaye wenywe amuhelesia okhuba obulame tawe.”