Read wanga OKHUKALUSHILA MUMALAKO KA MUSA 22 Bible Online

OKHUKALUSHILA MUMALAKO KA MUSA 22 - wanga bible

OKHUKALUSHILA MUMALAKO KA MUSA 22

¹“Nolola ing'ombe noho likondi liowashio nilikoranga, okhuula olikete likalushe khumwenelio.

²Ne mwenebio naba nalali ahambi ninawe ta noho nolamumanyile ta, okhuula oyile ingowo emiruko echio omenye ninachio okhuula olwa mwenechio achinyoola, mana omukalusilie.

³Okhole orio kata niyiba isishiliye noho ebifwalobie noho eshindushie shiosi shiosi eshia aba nakosiye lwoshinyoola. Shiolaloba okhukhoonya owashio tawe.

⁴“Shiolalola isishili noho ing'ombe yomusiani wenywe niyikwiile khunjila, mana olobe okhumukhoonya tawe. Okhuula okhoonye omusiani wenywe okhuchibuusia.

⁵“Abakhasi shibafuchililwa okhwifwala ebifwalo biabasaatsa tawe; Khandi abasaatsa shibafuchililwa okhwifwala ebifwalo biabakhasi tawe. OMWAMI Nyasaye wenywe waloba abandu bakholanga ako.

⁶“Noba nonyoola eshitsu shielinyonyi khumusaala noho khwiloba, nishilimwo ebiminywi noho nilikoneele amabuyu kalio, alabukula linyinamwana tawe.

⁷Onyala okhubukula abaana balio abatoro nebutswa olekhule linyina litsie, kho obe omulamu oluhoono, khandi oyindile mubulamubwo.

⁸“Olwa wumbakha inzu imbia, okaasie omushingachi khushitsafu, kho mbu, omundu naba narerekha nakwa hasi okhurula khushilama eshio, ne nafwa, iwe oleshe okhuba neshikha.

⁹“Noraaka emitsabibu mumukunda, olarakamwo omusaala kundi kwebiamo kata okwebiokhulia tawe. Nokhala orio, biosi emitsabibu nende emisaala chindi echio bilaba bieshisinyo.

¹⁰“Shiolaboha halala khwichoki ihunwa nende isishili khulwa okhulima tawe.

¹¹“Olefwala eshifwalo shialukhwa khulwa obwoya bwelikondi halala nende ikitani tawe.

¹²“Onabe amayeye khutsindulo tsine tsieshifwaloshio eshiokhwifubila.

¹³“Omusaatsa yesi yesi nateshia omukhaana, ne olunyuma naloba omukhaana oyo,

¹⁴nachishila omukhaana oyo khulwa okhuboola mbu, shiamunyoolile nashili omushisila olwa amuteshiye ta,

¹⁵kho abebusi bomukhana oyo babukule tsishuka tsiomukhaana oyo yakonakhwo nitsilikhwo amatsayike bareerile abakofu belitookho elo khulwa okhumanyisia mbu omukhaana oyo yatekha nashili omushisila.

¹⁶Samwana omukhaana oyo aboolele abakofu abo ari, ‘ndabashila omusaatsa uno omukhaana wanje, ne bulano omusaatsa uno amulobile.

¹⁷Omusaatsa uno aboola mbu, omukhaana wanje shiyali omushisila olwa yamuteeshia tawe. Nebutswa shino nishio eshimanyisia mbu omukhaana wanje yali nashili omushisila. Loole, amatsayi kali khushuka eya yakonakhwo!’

¹⁸Abakofu belitookho elo batiile omusaatsa oyo nende okhumunywekha.

¹⁹Khandi bamukhalachile arunje samwana omukhaana oyo ebitonye bieifetsa eshikhumi, shichila areerile omukhaana omushisila wa Isiraeli eshifimbwa murwe. Khandi omukhaana oyo atsililile okhuba omukhasiwe, shialamulondakhwo tawe.

²⁰“Nebutswa akomusaatsa oyo aboola khumukhasiwe nikaba akobwatoto, ne shibulaho eshindu shiosi shiosi eshiomanyia mbu toto yali omushisila,

²¹kho abakofu belitookho elo bayinie omukhasi oyo, bamuyile elwanyi weinzu ya samwana mana bamulase namachina afwe. Omukhasi oyo akholile eshifwabwi mu Isiraeli khulwa okhukona nomusaatsa olwa aba nashimenyile munzu mwa samwana, ne nashili okhutekha. Munjila eyo nolwa mularusiaho obwonooni mubandu benywe.

²²“Omusaatsa yesi yesi nanyoolekha naheyanga nomukhasi wabeene, boosi omusaatsa oyo nende omukhasi oyo okhuula berwe. Munjile eyo nolwa eshifwabi shilarusibwaho mu Isiraeli.

²³“Omusaatsa yesi yesi nanyoola omukhaana omushisila oushikhwebungwa, mana nakona ninaye,

²⁴okhuula mureere omusaatsa oyo nende omukhaana oyo elwanyi welitookho mana mubalase namachina boosi bafwe. Omukhaana oyo yeerwe shichila shiakhupile tsimbungu abandu bamuhabine ta, ne kata kario abeele mwitookho, naye omusaatsa yerwe shichila asasiye omukhasi wowashie. Munjila eyo nolwa eshifwabwi shilarula hakari wenywe.

²⁵“Nebutswa omusaatsa yesi yesi nanyoola omukhaana oushikhwebungwa nali elwanyi welitookho, mana namukwakhwo nakona ninaye namani, kho omusaatsa oyo niye ouleerwa yenyene.

²⁶Nebutswa mulakholakhwo eshindu shiosi shiosi khumukhaana oyo tawe. Omukhaana oyo shiakholile obwonooni bwosi bwosi obuchila yerwe tawe. Eshikhole shino shili shinga shiomusaatsa oukoneshela nende okhwira omumenyani washie,

²⁷shichila omusaatsa oyo amukwilekhwo nali elwanyi welitookho, kata omukhaana oyo niyakhakhupile tsimbungu mbu ahabinwe, abulaho owakhamuhabine tawe.

²⁸“Omusaatsa yesi niyekaana nende omukhaana omushisila, owomusaatsa undi ashili okhuchaaka okhukhwa, mana omusaatsa oyo namukwakhwo nakona ninaye namaani,

²⁹omusaatsa oyo okhuula arunje samwana omukhaana oyo ebitonye amakhumi karano bieifetsa, mana ateeshie omukhaana oyo, shichila amwonooniye.

³⁰“Omusaatsa yesi yesi shialafimbiakhwo samwana omurwe khulwa okhuteshia noho okhukona nende omukhasi wasamwana tawe.”