Read wanga OKHUKALUSHILA MUMALAKO KA MUSA 23 Bible Online

OKHUKALUSHILA MUMALAKO KA MUSA 23 - wanga bible

OKHUKALUSHILA MUMALAKO KA MUSA 23

¹“Omusaatsa yesi owalatwa noho owakhalakwa imbeliwe shialenjilakhwo mumukanda kwabandu aba OMWAMI Nyasaye tawe.

²“Ne omundu yesi owebulwa indasimba noho owomulwibulo olwo okhuula khulwibulo lwekhumi, shialenjilakhwo mumukanda kwabandu aba OMWAMI Nyasaye tawe.

³“Omundu yesi womuluyia lwa Amoni noho Moabu noho owomulwibulo lwabwe okhuula khulwibulo lwekhumi shialenjilakhwo mumukanda kwabandu aba OMWAMI Nyasaye ta,

⁴shichila abo baloba okhumuhelesia ebiokhulia nende amaatsi, olwa mwali khuluchendo lwokhurula Misiri; khandi barunga Balaamu omusiani wa Beori owomwitookho lia Petsori elia Mesopotamia amapesa kho mbu amulaame inywe eshilaamo eshibi.

⁵Nebutswa OMWAMI Nyasaye wenywe shiyarecheresia Balaamu tawe, habula yakalukhasia eshilaamo eshio, nashikhola ikhabi shichila OMWAMI Nyasaye yamuheela inywe.

⁶Kho shimulakaasiekhwo indakano yokhureera omulembe noho okhuyindihala ninabo mubulamu bwenywe tawe.

⁷“Shimulasila Abaedomu ta, shichila nabasiani benywe. Khandi shimulasila Abamisiri ta, shichila mwamenya mushialo shiabwe shinga abarende.

⁸Abebulwa mulwibulo lwabwe lwakhataru banyala okhwinjila mumukada okwa abandu aba OMWAMI Nyasaye.

⁹“Olwa oba noli mukambi yelihe nimukhupananga lihe, okhuula wilinde okhurula khushindu shiosi shiosi eshinyala okhukhwonoonia.

¹⁰Omusaatsa yesi niyeyonoonia khulwa okhwiloorera mushilo, okhuula atsie elwanyi weikambi yekhaleyo.

¹¹Khubwiile yesinje omwene mana akalushe mukambi eliuba niliakhayeela.

¹²“Okhuula mube nende habundu elwanyi weikambi aha munyala okhutsia okhwikhoonya.

¹³Mubimanulwa bienywe bielihe mubetsenjemwo neshisili eshiokhuyaba obuko nende okhubuka ebibi bienywe olunyuma lwokhwikhoonya.

¹⁴Okhuula mulinde ikambi yenywe okhuba isiiyikhu, shichila OMWAMI Nyasaye wenywe ali ninenywe mukambi omwo khulwa okhumulinda nende okhushiukhasia abasuku benywe. Kho shimulamukholelakhwo likhuwa lieshifimbwa murwe eliakhachila yamulekha tawe.

¹⁵“Omusumba yesi yesi niyelukha okhurula khumwamiwe niyetsa khwiwe khulwa obuhabinwi, shiolamukalusia khumwamiwe tawe.

¹⁶Amenye mu elala khumatookho kenywe elia omwene yaahula, nawe shiolamusandia tawe.

¹⁷“Omusaatsa noho omukhasi omuisiraeli, alekhola okhuba omutamba womuhekalu tawe.

¹⁸Khandi amapesa akanyoolekha munjila eyo shikalareerwakhwo munzu eya OMWAMI Nyasaye khulwa okhuusia eshitsubo tawe. OMWAMI Nyasaye yasila abatamba bomuhekalu.

¹⁹“Olwa ohosia amapesa noho ebiokhulia noho eshindu shindi shiosi shiosi, khu Omuisiraeli washio shiolamurunjia injelesio tawe.

²⁰Munyala okhurunjia injelesio khushindu eshia ohosia omurende, nebutswa khumwana wenywe omuisiraeli tawe. Mulinde lilako lino, naye OMWAMI Nyasaye, Nyasaye wenywe alamuhelesia ikhabi mubuli eshindu eshiamukhola mushialo eshia mutsitsanga okhubukula.

²¹“Olwa witsuba eshitsubo khu OMWAMI Nyasayewo, shiolachweya okhushiusia ta, shichila OMWAMI Nyasaye alakhubanza eshiitsuboshio eshio, khandi nobwonooni noba nochweya okhushiusia.

²²Nebutswa okhuchweya okhukhola eshitsubo khu OMWANI Nyasaye shibuli obwonooni tawe.

²³Nebutswa noba niwitsuba omwene mukhuchama okhuula wusie eshitsubo eshio.

²⁴“Olwa ochenda nobira mumukunda kwowashio kwemitsabibu, onyala okhulia emitsabibu shinga olwa wenya niwikura, nebutswa shiolarakhwo kata mulala mushisikoshio okhuchinga tawe.

²⁵Olwa ochenda nobira mumukunda kwowashio okwa imele eyishisinjiile, onyala okhunoka nomukhonokwo nolia, nebutswa olabisiamwo injeso tawe.”