Read wanga OKHUKALUSHILA MUMALAKO KA MUSA 24 Bible Online

OKHUKALUSHILA MUMALAKO KA MUSA 24 - wanga bible

OKHUKALUSHILA MUMALAKO KA MUSA 24

¹“Omusaatsa nateeshia omukhasi mana olunyuma namuloba shichila aluutsi nali nomwima kundi okulamuchamisia ta, okhuula omusaatsa oyo ahandichile omukhasi oyo ibarwa eyokhulekhana ninaye, amuhelesie, mana amuloonde okhurula munzemwe.

²Omukhasi oyo naba natsia okhuteshela omusaatsa undi,

³naye khandi nalamuchama ta, kho yesi khandi ahandichile omukhasi oyo ibarwa yokhulekhana ninaye, amuhelesie mana aloonde omukhasi oyo okhurula munzumwe. Kata omusaatsawe wakhabili oyo naba nafwa,

⁴omusaatsawe wambeli shialamuteeshia khandi tawe. Omusaatsa oyo abukule omukhasi oyo shinga oumalile okhwonoonibwa. Ne naba namuteshia khandi, aba nakholile obumayaanu imbeli ewa OMWAMI Nyasaye. Mulakholekhwo obwonooni obubi shinga obwo mushialo eshia OMWAMI Nyasaye wenywe amuhelesia tawe.

⁵“Omusaatsa yesi yesi nashiteshiye, alarumwa mwihe kata okhukhukholela obukhala noho omulimo kwosi kwosi mubandu tawe; okhuula abe omulekuhule khulwomuyika mulala, amenye ingowe nasangasia omukhasiwe.

⁶“Olwa ohosie omundu eshindu shiishio, shiolabukula oluchinalwe olwasielangakhwo imele okhuba omusingo tawe.

⁷“Omundu yesi yesi nanyoolekha niyebeele Omuisiraeli washie, ne namukhola okhuba omusumba noho okhumukusia; omwifi oyo okhuula yerwe. Nolwa mularusiaho obwonooni hakari wenywe.

⁸“Noba nolwala obulwale bwobuchele, okhuula okhole habwene kabesaaliisi Abalawi bakhuboolela okhukhola. Oloonde nende okhukhola amebaalo aka ndabalachilisia.

⁹Mwitsulile aka OMWAMI Nyasaye wenywe yakholela Miriamu khunjila olwa mwali nimurulanga Misiri.

¹⁰“Olwa ohosia omundu eshindu shiosi shiosi, olenjila munzuye okhubukula eshifwalo shiaba niyenya okhukhuhelesia okhuba omusingo tawe.

¹¹Okhuula olindile elwanyi, omwene akhureerire eshifwalo eshio.

¹²Omundu oyo naba nali omumanani, shiolabiikha eshifwalo eshio shiakona ewuwo tawe.

¹³Omukalusilie khubwiile, kho mbu yefimbe nakona. Mana alachamisibwa ninawe khandi olachamisia OMWAMI Nyasayewo.

¹⁴“Shiolasandia omukhalabani wokhurungwa ouli omumanani kata omutakha tawe; kata abe Omuisraeli washienywe noho mulala khubarende abamenyanga mumatookho kenywe.

¹⁵Buli nyanga eliuba lishili okhyeela, omurunje omurungo kweinyanga eyo. Yenya amapesa ako khandi niko akasuubilile. Nolamurunga ta, alakhwiyiniakanila khu OMWAMI Nyasaye, nawe olaba neshikha shiobwonooni.

¹⁶“Abebusi baleerwa khulwa obwonooni bukholilwe nabaana babwe tawe, khandi abaana baleerwa khulwa obwonooni bwabebusi babwe tawe. Buli mundu yerwe khulwa obwonoonibwe omwene.

¹⁷“Shimulachweya okhukholela abarende nende ababisandu akabakhoyeele okhukholelwa tawe, khandi shimulabukula eshifwalo shiomukhasi omulekhwa okhuba omusingo khulwa likobi tawe.

¹⁸Okhuula mwitsulile mbu, mwali abasumba mushialo shia Misiri, ne khandi mbu, OMWAMI Nyasaye wenywe, yamukhola okhuba abalekhuule, niko akachila isie nimuhelesia lilako lino.

¹⁹“Noba nochesa imele mumukundakwo, ne niwibililamwo eshinywa shieimele, olakalukha okhushienda tawe. Shilaba eshiabarende, ababisandu nende abakhasi abalekhwa, kho OMWAMI Nyasayewo akhuhelesia ikhabi mumilimochio chiosi.

²⁰Olwa oba nobungulusia omuseitunikwo olwambeli, olakalukha khandi okhwiluula mutsisaka tsiakwo tawe. Oleshe tsibe tsiabarende, ababisandu nende abakhasi abalekhwa.

²¹Olwa oba nomalile okhunoka emitsabibu, mumukundakhwo shiolakalushilamwo khandi tawe. Emitsabibu chitoonyilemwo chibe chiabarende, ababisandu nende abakhasi abalekhwa.

²²Okhuula witsulile mbu, wali omusumba mushialo shia Misiri, khulweshio ekhulaka okhukhola ako.”