Read wanga OKHUKALUSHILA MUMALAKO KA MUSA 25 Bible Online

OKHUKALUSHILA MUMALAKO KA MUSA 25 - wanga bible

OKHUKALUSHILA MUMALAKO KA MUSA 25

¹“Abandu babili nibaba nibasolana, bayile obusolo bwabwe obwo mushina, nabo Abayaasi bakhalache eshiina, nibalekhula oubula eshikha, nibakhalachile oweshikha eshiina.

²Omundu oukhalachilwa eshiina naba nakwanile okhunywekhwa, Abayaasi okhuula bamukonie hasi mafumama, ne anywekhwe habulafu. Ebiboko biakhupwa bihelane nende obubi bwakholile obwo.

³Nebutswa alanywekhwa ebiboko ebibira amakhumi kane tawe. Nimumunywekha ebibira amakhumi kane, muba nimumufimbiye omurwe imbeli wenywe.

⁴“Shiolaboha ing'ombe omunwa olwa oba nochikhoonyela okhuhuula imele tawe.

⁵“Abasiani bomunzu ndala nibaba nibamenya halala, mana mulala khubo afwe, nalayebulakhwo omwana omusiani ta, omukhasiwe shialatsia okhutekha muluyia lundi tawe. Omusiani wabwe okhuula akalusie omukhasi oyo, amuteeshie nabuusilia omusiani wabwe olwibulo.

⁶Omwana omusiani wibulwa owambeli abe owomusaatsa wafwa, kho mbu eliira liomufu lileshe okhurusibwa muboluyia olwa Abaisiraeli.

⁷“Nebutswa omusaatsa oyo naba nalenya okhukalusia omukhasi oyo ta, kho omukhasi oyo atsie khubakofu belitookho nibali ahabakhung'anilanga, mana ababoolele ari, ‘Omusiani wabwe omusaatsa wanje owafwa, alobile okhutsililisia eliira liomusiani wabwe mu Isiraeli.’

⁸Abakofu belitookho okhuula balaanje omusaatsa oyo baboole ninaye. Ne omusaatsa oyo natsiililila okhukhaya naboola ari, ‘Shienzenya okhumuteeshia ta,’

⁹kho omukhasi womusiani wabwe oyo, atsie khuye imbeli wabakofu, afwalule eshilaaro okhurula mushilenje shiamusiani wabwe omusaatsawe owafwa oyo nende okhumufutsakhwo amare mumoni naboola ari ‘Nolwa kakholungwa khumusaatsa ouloba okhukhusia inzu yomusiani wabwe.’

¹⁰Ne eliira liolwibulo lwomusaatsa oyo mu Isiraeli lilaba mbu, ‘Olwibulo olwoyo, oweshilaaroshie shiafwalula.’ ”

¹¹“Abasaatsa babili nibaba nibalwana, ne omukhasi wamulala nasita ahambi okhukayila omusaatsawe, mana omukhasi oyo nayila omukhonokwe natiila imbeli womusaatsa wolwananga omusaatsawe oyo,

¹²shiolalolelakhwo omukhasi oyo tsimbabasi ta, habula oreme nokhalaka omukhonokwe.

¹³“Shiolachingakhwo mushisiikoshio ebichelo bibili, eshikhongo nende eshitiiti tawe.

¹⁴Shiolabikhakhwo munzuyo ebichelo bibili, eshikhongo nende eshitiiti tawe.

¹⁵Obe nende eshichelo shitsule khandi eshiahabwene, ochelenje obusiro bwitsule khandi bwahabwene; kho mbu tsinyanga tsiobulamubwo tsibe tsinyinji mushialo eshia OMWAMI Nyasayewo akhuhelesia.

¹⁶Abandu boosi abakhola ako, boosi abakatia, nabeshisinyo khu OMWAMI Nyasayewo.

¹⁷“Mwitsulile aka Abameleki bamukholela olwa mwali nimuli khunjila nimurula Misiri,

¹⁸Shinga olwa bamuseera khunjila, olwa mwali nimuchonyile khandi muluyilile nibeera boosi abali inyuma wenywe nibachoonyile. Abameleki shibariakhwo Nyasaye tawe.

¹⁹Khulweshio olwa OMWAMI Nyasaye wenywe aba namuheele obuhulushi okhurula khubasuku benywe boosi mushialo eshia OMWAMI Nyasaye wenywe amuhelesinjia okhuba eshienywe, mulebilila okhumulula Abameleki boosi okhurula mushialo eshio tawe.”