Read wanga OKHUKALUSHILA MUMALAKO KA MUSA 26 Bible Online

OKHUKALUSHILA MUMALAKO KA MUSA 26 - wanga bible

OKHUKALUSHILA MUMALAKO KA MUSA 26

¹“Olwa mwinjila mushialo eshia OMWAMI Nyasaye wenywe amuhelesia okhuba eshienywe, nimumalile okhushibukula nende okhumenyamwo,

²buli mundu khwinywe abukule khubiamo biambeli biachesa mumukunda okwa OMWAMI Nyasaye amuhelesia, abire mushimwelo natsia ninabio habundu ahokhwinamilaho OMWAMI Nyasaye wenywe.

³Ne atsie khumwisaaliisi ouba naliho ebise ebio, mana amuboolele ari, ‘Ndiyamanga inyanga yino mbu, emalile okhwinjila mushialo eshia OMWAMI Nyasaye yasuubisia abakuuka befwe mbu yakhabahelesie.’

⁴“Omwisaaliisi abukule eshimwelo shieimele okhurula mumukhonokwe, ashirenjeshe hasi imbeli weshimalilo shiemisango eshia OMWAMI Nyasaye.

⁵Mana imbeli ewa OMWAMI Nyasaye orumbule amakhuwa kano ari, ‘Kuuka wanje yali Omuaramu omuchendachendi, owatsia nabeinzuye okhumenya Misiri. Baliyo abandu batiiti, nebutswa bebulana nibaba abanji khandi nibaba lihanga liamani.

⁶Abamisiri bakhusandia nibakhulunyia okhukhola emilimo namaani shinga ababohe.

⁷Mana nikhulilila OMWAMI Nyasaye owabakuuka befwe mbu, akhuhabine. OMWAMI Nyasaye yahulila okhuhaaba khwefwe khandi nalola amanyakhano, amatinyu nende okhusandibwa khwefwe.

⁸Khulwa obunyalibwe obukhongo nende amaanike, OMWAMI Nyasaye yakhuhonia okhurula Misiri. OMWAMI Nyasaye yakhola akamakana khandi akokhuhuchisia, nakhola akamakana khandi akokhurusia okhwikholekha.

⁹Yakhureera hano mana nakhuhelesia eshialo eshiyinda khandi eshinulu shino.

¹⁰Kho bulano endeereera OMWAMI Nyasaye ebiamo biambeli bielichesa ebia yambelesiye.’ Mana orenjeshe eshimwelo eshio hasi imbeli ewa OMWAMI Nyasaye nende okhumwinamila.

¹¹Wikhoyele ebindu ebilayi ebia OMWAMI Nyasayewo akhuhelesia iwe halala nende abeinzuyo nende Abalawi nende abarende abamenya hakari mwinywe.

¹²Buli omuyika okwakhataru okhuula ohane eshielikhumi shiokhubirachebio, oshihaane khubalawi, abarende, ababisandu nende abakhasi abalekhwa, kho mbu buli aha abandu bamenya, banyoole ebiabenya okhulia. Olwa oba nomalile okhuhana,

¹³oboolele OMWAMI Nyasaye ori, ‘Eshitonye shielikhumi eshitakatifu shishitonyilekhwo munzu yanje tawe. Eshihanile khubalawi, abarende, abaana ababisandu nende abakhasi abalekhwa, shinga olwa wakhulachilisia okhukhola. Shiendobilekhwo okhuloonda noho kata okhwibilila elala khumalakoko akalondana nende eshielikhumi tawe.

¹⁴Shindaliakhwo kata shilala khubio olwa ndali nindikhulanga ta, shindabukulakhwo kata shilala khubio okhurula munzu yanje olwa ndali nende omusiiyikhu tawe. Khandi shiehanilekhwo shilala khubio okhuba omusango khu abafwa tawe. Ekhuriire iwe OMWAMI Nyasaye, ekholile buli shindu eshia walachilisia okhulondana nende eshielikhumi.

¹⁵Henga hasi okhurula habundu hatakatifu mwikulu, mana ohelesie abandubo ba Isiraeli ikhabi; khandi ohelesie eshialo eshiyinda khandi eshinulu eshia wakhuhelesiye ikhabi shinga olwa wasuubisia abakuuka befwe.’

¹⁶“Inyanga yino OMWAMI Nyasaye wenywe akhulachilisia okhuloonda amalako nende amalachiliso kano. Khulweshio obe meeso okhukakhola nende okhukatiila koosi nende omwoyokwo kwosi.

¹⁷Inyanga yino orumbuule omwene mbu, OMWAMI Nyasaye niye Nyasayewo khandi mbu, olalinda amalakoke, amalachilisioke, nende amebaaloke.

¹⁸Inyanga yino OMWAMI Nyasaye wumalile okhufuchilila mbu inywe muli abandube omwene, shinga olwa yamusuubisia. Khulweshio amulachilisia mbu mulonde amalakoke.

¹⁹Khandi asuubisia mbu, alamukhola okhuba abakhongo okhushila amahanga kandi koosi aka yalonga, nenyu mulamwitsoomia nende okhumuhelesia oluyali. Mulaba abandube abatakatifu shinga olwa yasuubia.”