Read wanga OKHUKALUSHILA MUMALAKO KA MUSA 27 Bible Online

OKHUKALUSHILA MUMALAKO KA MUSA 27 - wanga bible

OKHUKALUSHILA MUMALAKO KA MUSA 27

¹Mana Musa nende abemilisi ba Isiraeli nibalachilisia abandu nibaboola bari “Mulinde amalako koosi aka emulachilisiye inyanga yino.

²Ne khunyanga ya mwambukha omwalo kwa Yorodani nimwinjila mushialo eshia OMWAMI Nyasaye wenywe amuhelesia, musinjisie amachina amakhongo mana mukareresie obulayi nolufuuyo.

³Muhandichekhwo amakhuwa koosi kamalako kano, olwa mwambukha nimwinjila mushialo eshia OMWAMI Nyasaye, Nyasaye wenywe amuhelesia, eshialo eshiyinda khandi eshinulu, shinga olwa OMWAMI Nyasaye, Nyasaye wabakuuka benywe yamusuubisia.

⁴Olwa muba nimumalile okhwambukha omwalo kwa Yorodani, okhuula musinjisie amachina ako, shinga olwa emulachilisiye inyanga yino khushikulu shia Ebali. Mana mureresie amachina ako nolufuuyo.

⁵Ne habwene yaho okhuula mumbashileho OMWAMI Nyasaye wenywe eshimalilo shiemisango; mwikhoonyele amachina amalamba akalatuywakhwo neinyundo tawe.

⁶Okhuula mumbashile OMWAMI Nyasaye wenywe eshimalilo shiemisango namachina amalamba. Mana musambile OMWAMI Nyasaye wenywe omusango omusambe khushimalilo shiemisango eshio.

⁷Khandi okhuula mukhole omusango kwokhureera omulembe habundu yaho, muliliho nimwikhoya imbeli ewa OMWAMI Nyasaye wenywe.

⁸Mana muhandiche khumachina ako obulayi bwene amakhuwa akamalako ako koosi.”

⁹Mana Musa nende abesaaliisi beshilawi nibaboolela Abaisiraeli boosi bari, “Inywe abandu ba Isiraeli murecheresie: Inyanga yino mwikholile abandu aba OMWAMI Nyasaye wenywe.

¹⁰Kho okhuula muhulile amebaaloke nimulonda amalakoke nende amalachilisioke, aka emulachilisiye inyanga yino.”

¹¹Khandi Musa nalachilisia abandu khunyanga tsana eyo naboola ari,

¹²“Olwa mulaba nimwambushe omwalo kwa Yorodani, tsimbia tsino tsisinjile khushikulu shia Gerizimu olwa tsikhabi tsirumbulwa. Oluyia lwa Simoni, Lawi, Yuda, Isakari, Yosefu nende Benjamini.

¹³Natsio etsilondakhwo tsino tsisinjile khushikulu shia Ebali olwa eshilaamo shiobubi shirumbulwa. Oluyia lwa Rubeni, Gadi, Asheri, Zebuluni, Dani nende Nafutali.

¹⁴Nabo Abalawi barumbule nomwoyo omukhongo nibaboola bari,

¹⁵“ ‘Eshilaamo eshiobubi shibe khumundu yesi yesi oukaasia eshifwanani shielichina, omusaala noho eshibia nashiinamila mumasilisi, OMWAMI Nyasaye yasila obwinamili bwebifwanani.’ Mana abandu boosi bakalusilie halala nibaboola bari, ‘Amina!’

¹⁶“ ‘Ali mushilaamo shiobubi omundu yesi oulahelesia samwana noho nyinamwana oluyali tawe.’ Mana abandu boosi bakalusilie halala nibaboola bari, ‘Amina!’

¹⁷“ ‘Ali mushilaamo shiobubi omundu yesi ousiula olwakho lwomumenyaniwe.’ Mana abandu boosi bakalusilie halala nibaboola bari, ‘Amina!’

¹⁸“ ‘Ali mushilaamo shiobubi omundu yesi oukosia omundu omubofu khunjila.’ Mana abandu boosi bakalusilie nibaboola halala bari, ‘Amina!’

¹⁹“ ‘Ali mushilaamo shiobubi omundu yesi oukhaya okhukhola obwatoto khubarende, abaana ababisandu nende abakhasi abalekhwa.’ Mana abandu boosi bakalusilie halala nibaboola bari, ‘Amina!’

²⁰“ ‘Ali mushilaamo shiobubi omundu yesi oukona nomukhasi wasamwana, okhuba afimbiye samwana omurwe khulwa okhulola eshiechenye shiomukhasi wa samwana.’ Mana abandu boosi bakalusilie halala nibaboola bari, ‘Amina!’

²¹“ ‘Ali mushilaamo shiobubi omundu yesi oukona nende isolo yosi yosi.’ Mana abandu boosi bakalusilie halala nibaboiola bari, ‘Amina!’

²²“ ‘Ali mushilaamo shiobubi omusaatsa yesi oukona nomukhana wabwe, abe omukhaana wasamwana noho owanyinamwana.’ Mana abandu boosi bakalusilie halala nibaboola bari ‘Amina!’

²³“ ‘Ali mushilaamo shiobubi omundu yesi oukona nende nyakhufialanyene.’ Mana abandu boosi bakalusilie halala nibaboola bari, ‘Amina.’

²⁴“ ‘Ali mushilaamo shiobubi omundu yesi owiira owashie mumasilisi.’ Mana abandu boosi bakalusilie halala nibaboola bari, ‘Amina!’

²⁵“ ‘Ali mushilaamo shiobubi omundu yesi oufichilila okhubukula shomufusi khulwa okhwira oubula eshikha.’ Mana abandu boosi bakalusilie halala nibaboola bari, ‘Amina!’

²⁶“ ‘Ali mushilaamo shiobubi omundu yesi oulalonda amalako kano nalakakhola tawe.’ Mana abandu boosi bakalusilie halala nibaboola bari, ‘Amina!’ ”