Read wanga OKHUKALUSHILA MUMALAKO KA MUSA 28 Bible Online

OKHUKALUSHILA MUMALAKO KA MUSA 28 - wanga bible

OKHUKALUSHILA MUMALAKO KA MUSA 28

¹“Ne nimuba nimuhulila amebaalo aka OMWAMI Nyasaye wenywe, nimulinda obulayi amalakoke koosi akemulachile inyanga yino, OMWAMI Nyasaye wenywe alamukhola okhuba abakhongo khumahanga koosi akokhushialo.

²Ne nimutiila amebaalo ako, kho tsikhabi tsino tsiosi tsilamwitsila:

³“OMWAMI Nyasaye alahaana ikhabi amatookho kenywe nende emikunda chienywe.

⁴“OMWAMI Nyasaye alamuhelesia tsikhabi tsiokhuba nabaana abanji, ebiokhulia ebinji, tsing'ombe tsinyinji nende amakondi amanji.

⁵“OMWAMI Nyasaye alahaana tsikhabi mu imele yenywe nende biosi ebikaasibwa okhurula khuyo.

⁶OMWAMI Nyasaye alamuhelesia tsikhabi olwa musamula nende olwa muchelela.

⁷OMWAMI Nyasaye alamunyalila okhuhula abasuku benywe olwa bamuseera. Abasuku balamuseera nibarulilila olubeka lulala, nebutswa balelushila okhurula khwinywe mumbeka tsiosi.

⁸OMWAMI Nyasaye alamuhelesia tsikhabi tsiokhuba nebiokhulia ebinji mubiachi bienywe, nende mumulimo chienywe chiosi echiamukhola khandi alamuhelesia tsikhabi mushialo eshia yetsa okhumuhelesia.

⁹“Nimuba nimulonda amalakoke, nokhumenya nimukhola amebaaloke, OMWAMI Nyasaye alamukhola okhuba abandube abatakatifu, shinga olwa yamusuubisia.

¹⁰Mana tsimbia tsiosi khushialo tsilaloola mbu mulangungwa eliira litakatifu elia OMWAMI Nyasaye mwene, ne tsilamuria.

¹¹Khandi OMWAMI Nyasaye alamukhola mwibulane nibuba abanji, alamuhelesia tsing'ombe tsinyinji nende ebiokhulia ebinji mushialo eshia yasuubisia abakuuka benywe mbu alamuhelesia.

¹²OMWAMI Nyasaye alamwikulila likulu namureerela tsikhabi tsiomwikulu namukwisilia ifula mubise ebikhoyele nende okhuhelesia ikhabi mumilimo chiamukhola chiosi; kho mbu mulanyala okhuhosia emiandu chienywe khumahanga amanji, nako nikalamuhosiakhwo eshindu shiosi tawe.

¹³Nimuba nimuhulila amalako nende amebalo kanje aka emuhelesinjia inyanga yino, OMWAMI Nyasaye wenywe alamukhola okhuba abemilisi khumahanga kandi; shimulemililwa tawe; Buli lwosi mulatsiililila nimuyindihala, ne shimulakhaywa tawe.

¹⁴Nebutswa mulaleshekhwo okhulonda amalako kemuhelesinjia inyanga yino, noho okhwinamila abanyasaye bandi noho okhukhalabanila abanyasaye bandi tawe.

¹⁵“Nebutswa nimulahulila nende okhuloonda aka OMWAMI Nyasaye wenywe aboola, kata okhuba meeso okhukhola amalako koosi nende amalachilisio kemulaka inyanga yino, kho amabi kano kalamwitsila nikamunyoola.

¹⁶OMWAMI Nyasaye alara eshilaamo eshibi mumatookho nende mumukunda chienywe.

¹⁷OMWAMI Nyasaye alara eshilaamo eshibi mu imele yenywe nende ebiokhulia bikasibungwa okhurula khuyo.

¹⁸OMWAMI Nyasaye alara eshilaamo shiobuti khulwa okhumuhelesia abaana batiiti, imele imbi nende tsing'ombe namakondi matiiti.

¹⁹OMWAMI Nyasaye alara eshilaamo eshibi mubuli eshindu shiamukhola.

²⁰“Nimukhola obwonooni, nimuloba OMWAMI Nyasaye wenywe; OMWAMI Nyasaye alamureerela amatinyu, okhukoyana nende obunyakhani, nende mubuli eshindu eshiamukhola, okhuula olwa mumululwa mwesi pe bwangu.

²¹OMWAMI Nyasaye alamureerela obulwale obulamumulula mwesi pe okhurula mushialo shiamuli ahambi okhumenyamwo.

²²OMWAMI Nyasaye alamukhupa nobulwale bwomumatsukhu, omurengo, amabure, omubili okhuyia pia, eshimiyu nende imbumbuyeka ebilasasia ebirache bienywe biosi. Amalwale kano kalamulia okhuula olwa mufwa.

²³Likulu lili hekulu wenywe liloma, ifula shilakwakhwo ta, nashio eshialo shilooma ka shinga eshibia.

²⁴OMWAMI Nyasaye alakalukhasia ifula yomushialo shienywe okhwikhola olufu nende omuyeshe; nibimukwila okhuula olwa musikha.

²⁵“OMWAMI Nyasaye alamukhola muhulwe nabasuku benywe. Mulaseera abasuku benywe nimurulilila elubeka lulala, nebutswa mulelukha nimusalana khubo mumbeka musafu, mana mulaba eshindu eshiokhuhuchisibwa khumahanga akokhushialo.

²⁶Emilambo chiemibili chienywe chilaba eshiokhulia shiamanyonyi nende tsisolo nabulimo, omundu shialabaho wokhutsiriisia tawe.

²⁷OMWAMI Nyasaye alamukhupa namabure shinga akali Misiri, alakhola emibili chienywe okhuba namabumba, amabondo nende amakakha akalanyala okhuhona tawe.

²⁸OMWAMI Nyasaye alamukhupa nobulwale bwamalalu, obubofu nende obwongo okhuyingoya.

²⁹Mulachenda mushiteere nimuhabasia shinga omubofu ouli mushiilima. Shimulanyalilwa mushindu shiosi eshiamukhola tawe. Buli lwosi mulasandibwa nende okhunuulwa ebindu, ne abulaho oulamuhabina.

³⁰“Omundu alaselelanga omukhasi mbu omuteeshie nebutswa omusaatsa wundu niye oulamuteshia nakona ninaye. Olombakha inzuyo nebutswa shiolamenyamwo tawe. Olaraaka omukundakwo kwemitsabibu, nebustwa shiolachiliakhwo tawe.

³¹Tsing'ombe tsienywe tsilasinzwa nimureerekhwo tsimoni, nebutswa shimulatsiliakhwo tawe. Tsisishili tsienywe tsilabukulwa nimulolanga nebutswa shitsilamukalushila tawe. Amakondi kenywe kalahanwa khubasuku benywe, nebutswa omundu yesi shialamuhonokosiakhwo tawe.

³²Abaana benywe abasiani nende abakaana balabukulwa nibakholwa okhuba abasumba babandu bamahanga kandi. Buli lwosi mulahenga nimulindilila mbu bachelele, nebutswa shibalachelelakhwo tawe.

³³Abandu bamahanga kandi nibo abalalia ebirache ebiamularula oluuya nimuraaka mumikunda chienywe. Shimulabakhwo neshindu shiosi shiosi ta, habula okhulasandibwa nende okhunyasibwa buli lwosi.

³⁴Amanyakhano kenywe ako kalamukhola okhulalukha.

³⁵OMWAMI Nyasaye alamureerela amabure nende amakonzo akatsuuna obululu khubilenje bienywe okhurula khushisisilo okhuula khulwotosi lwomurwe.

³⁶“Yakhamuyile inywe nende omuruchi wenywe mushialo eshicheni, eshia inywe kata abakuuka benywe balashimanyakhwo ta, ebweneyo mwakhakhalabanile abanyasaye bandi ababaatswa okhurula khumachina nende khumisaala.

³⁷Mubialo biamusalaasiamwo, abandu bamwo balesundukha akalaba nikamwikholeshekhwo khandi balamutseshelela nibamunyeka.

³⁸Mularaaka imwo inyinji mumikunda chienywe, nebutswa mulachesa bitiiti shichila tsisiche tsilalia ebirache bienywe.

³⁹Mularaka emitsabibu mumikunda chienywe nimuchiachila, nebutswa shimulachinokakhwo kata okhuchinywakhwo ta, shichila tsinyende tsilachilia chiosi.

⁴⁰Mulaba nemisaala chiemitseituni mushialo shienywe shiosi nebutswa shiomulekhoonyelakhwo amafura kachio ta, okhuba ebiamo biachio bilabungulukha hasi.

⁴¹Mulebula abaana abasiani nende abakhaana nebutswa shimulamenya ninabo ta, shichila balatiilwa nibayilwa mushialo shindi okhuba abahambe.

⁴²Tsisiche tsilalia emisaala chienywe chiosi nende ebirache bienywe biosi ebiomumikunda.

⁴³“Abarende abamenya mwinywe balachinguukha naba abamaani muno, nenyu mulekha hasi nimuhwa amaani muno.

⁴⁴Balaba namapesa kokhumuhosia inywe, nenyu shimulabahosiakhwo eshindu shiosi shiosi ta, balemila nenyu mulabalondakhwo munyuma.

⁴⁵“Ebilaamo ebibi bino bilamwitsila nende okhuba ninenywe okhuula olwa mulaba nimusishile mwesi pe, shichila shimwahulila amakhuwa aka OMWAMI Nyasaye wenywe ta, khandi shimwalonda amalakoke nende amebaaloke akayamulachilisia tawe.

⁴⁶Ebilaamo bino bilaba eshilolelo khandi eshimanyisio khwinywe nende khubolwibulo lwenywe inziayo.

⁴⁷OMWAMI Nyasaye yamuhelesia ikhabi mubindu biosi, nebutswa shimwamukhalabanila nemioyo emisangafu khandi chiokhwikhoya tawe.

⁴⁸Kho bulano mulakhalabanila abasuku aba OMWAMI Nyasaye yetsa okhumureerela. Mulalumwa inzala, mulaliibwa obuloho mulachenda eshiechenye nende okhutamba buli shindu. OMWAMI Nyasaye alamusandia obululu okhuula olwa musikha mwesi.

⁴⁹OMWAMI Nyasaye alamureerela lihanga lindi okhurula ehale elia mulanyala okhuhulila olulimi lwalio ta, liakhamwitsile shinga indutsu.

⁵⁰Lilaba lihanga liamarisia, khandi shililalolesiakhwo oluyali khubakofu kata okhulolela abaana benywe tsimbabasi tawe.

⁵¹Lihanga elo lilalia emiruko chienywe nende ebiayo bienywe nende ebiokhulia bienywe, nenyu nimulibwa inzala okhuula okhufwa.

⁵²Abasuku benywe balaseera buli litookho lili mushialo eshia OMWAMI Nyasaye wenywe yamuhelesia, nende buli habundu hachinguukhu, amasiisi ketsingoba akamwisikanga kalakwisibwa hasi.

⁵³Olwa abasuku benywe baseera amatookho kenywe inzala yilamuluma okhuula olwa mulalia emibili chiabaana benywe abasiani nende abakhaana aba OMWAMI Nyasaye wenywe amuhelesia.

⁵⁴Kata omundu omuholo khandi owalelwa obulalayi mwinywe shialalolosiakhwo tsimbabasi khumusiani wabwe mwene kata khumukhayewe owayaheela muno kata khubaanabe tawe.

⁵⁵Khandi shialahelesiakhwo kata mulala khubo inyama yemibili chiabaanabe tawe.

⁵⁶Kata omukhaye omwihotselesi khandi owalelwa obulayi mwinywe, owa eshisisiloshie shishili okhusenakhwo khwiloba, yesi alakhola amakhuwa malala tsana ako. Olwa litookho libotokhanwa nabasuku, alalumwa neinzala kho mbu mumasilisi alalia omwanawe omutoro owa yebula. Ne shialakabanakhwo nomusaatsawe owayaheela kata abaanabe tawe.

⁵⁷Kata likubo elitsa olunyuma lwokhwibula omwana kata abaana bandi boosi abayebula olunyuma alenya okhubalia mabiswi mubise biokuseerwa nende mubise bieshibeela eshia abasuku benywe betsa okhumureerela mumatookho kenywe.

⁵⁸“Noba nalalonda amechesio koosi aka Nyasaye akahandikwa mushitabo shino nende okhuhelesia eliiralie oluyali,

⁵⁹OMWAMI Nyasaye alahureerela iwe nende abolwibulolwo obulwale obulanyala okhuhona ta, nende amanyakhano akokhuhuchisia akalanyala okhumalwaho tawe.

⁶⁰Khandi OMWAMI Nyasaye alakhureerela obulwale bwosi obwali Misiri, obwa wali niwaria, nabwo bulakhuhandakhwo.

⁶¹OMWAMI Nyasaye alakhureerela buli obulwale nende amanyakhano akalali mushitabu shiamalako shino ta, okhuula olwa witsa okhuba nosishiile elala.

⁶²Inywe abali abanji shinga tsing'ining'ini tsiomwikulu mulalekhwa butswa batiiti shichila shimwamuhulila OMWAMI Nyasaye wenywe tawe.

⁶³Shinga olwa OMWAMI Nyasaye yasaangaala namukholela amalayi nende okhwinjiyia olwibulo lwenywe, nolwa alasaangaala namureerela obusasishi nende nobumululwi. Khandi mulayinibwaho okhurula mushialo eshia muli ahambi okhubukula nende okhumenyamwo.

⁶⁴Mana OMWAMI Nyasaye alamusalaasia mumahanga koosi akokhushialo. Ebweneyo mulenamila abanyasaye bandi, ababaatswa okhurula khumisaala nende khumachina, aba inywe kata abakuuka benywe balayenamilakhwo tawe.

⁶⁵Shimulanyoolakhwo omulembe habundu hosi hosi mumahanga ta, shimulabakhwo nende habundu wenywe mwenyene ta. Habula OMWAMI Nyasaye mwene alamukhola okhuhenda omwoyo, okhufwa omwoyo, nende okhubeyabeya.

⁶⁶Obulamu bwenywe buli lwosi bulabetsanga mumasila. Eshilo neshiteere mulabetsanga muburi nende mukhuhendela lifwa.

⁶⁷Emioyo chienywe chilakhupa khulwa oburi khulwa buli shindu eshia mulola netsimoni tsienywe. Buli olwa bushia mulekomba mbu obwile buule bwangu, ne buli lwobwiile buula mulekomba mbu eshialo bushie bwangu.

⁶⁸OMWAMI Nyasaye alakhukalusilia mutsimeli Misiri, kata kario niyali niyakhusuubisia mbu, shiolikalukhayo khandi ta. Ebweneyo olateema okhwikusia khubasukubo okhuba shinga abasumba babwe, nebutswa abulaho oulenya okhukhukula tawe.”