Read wanga OKHUKALUSHILA MUMALAKO KA MUSA 29 Bible Online

OKHUKALUSHILA MUMALAKO KA MUSA 29 - wanga bible

OKHUKALUSHILA MUMALAKO KA MUSA 29

¹Kano niko amakhuwa keindakano eya OMWAMI Nyasaye yalachilisia Musa mbu akhole halala nende Abaisiraeli mushialo shia Moabu, okhumeeta khu akeindakano eya OMWAMI Nyasaye yali niyakaasia ninabo khushikulu shia Sinai.

²Musa nalanga halala abandu ba Isiraeli boosi, ne nababoolela ari, “Abene mwalolala aka OMWAMI Nyasaye yakhola khumuruchi wa Misiri; khubemilisibe, nende khushialoshie shiosi.

³Mwalola amatinyu akokhuhuchisia, akamangalimwa nende akamakana amakhongo aka OMWAMI Nyasaye yakhola.

⁴Nebutswa okhuula khunyanga yino OMWAMI Nyasaye ashili okhumukhola okhumanyilisia akamwabiriramwo tawe.

⁵“OMWAMI Nyasaye yamwimilila emiyika amakhumi kane okhubira mushitsiimi; nebutswa ebifwalo bienywe nende ebilaaro bienywe shibiarandukhakhwo tawe.

⁶Shimwalikhwo neshiokhulia kata idivai, kata amalwa akokhunywa ta; nebutswa OMWAMI Nyasaye yamuhelesia ebia mwenya kho mbu amwechesie mumanye mbu, ye niye Nyasaye wenywe.

⁷“Olwa khwola habundu hano, omuruchi Sihoni wa Heshiboni nende Ogi omuruchi wa Bashani, barula nibetsa okhukhuseera. Nebutswa khwabahula,

⁸nikhubanuula ebialo biabwe; mana nikhukabulila tsimbia tsia Rubeni nende Gadi nende inusi yoluyia lwa Manase.

⁹Khulweshio, mube meeso okhukhola akeindakano yino, kho mbu munyalilwe mubuli eliamukhola.

¹⁰“Inyanga yino mwesi musinjiile imbeli ewa OMWAMI Nyasaye wenywe, abemilisi benywe, abakhongo benywe,

¹¹abasaatsa benywe nende abakhasi benywe, abaana benywe nende abarende bamenyanga mwinywe nibamuremela emisaala nende okhumutsiila amaatsi.

¹²Inyanga yino muli hano mbu mukhole indakano eya OMWAMI Nyasaye wenywe akaasinjia ninenywe khandi mufuchilile okhukhola aka indakano eyo yenya;

¹³kho mbu OMWAMI Nyasaye amukhole abandube naye abe Nyasaye wenywe shinga olwa yalaka abakuuka benywe; Aburahamu, Isaka nende Yakobo.

¹⁴Shimuli mwenyene aba OMWAMI Nyasaye akaasinjia ninabo indakano nende okhukhola aka indakano eyo yenya tawe.

¹⁵OMWAMI Nyasaye akaasinjia nende ifwe fwesi abasinjiile hano inyanga yino imbeliwe, khandi nende abolwibulo lwefwe abashili okhwibulwa.

¹⁶“Mwitsulile shinga olwa mwali mwamenya Misiri nende shinga olwa mwabira mubialo biamahanga kandi.

¹⁷Mwalola ebifwanani biabwe bieshisinyo ebiabatswa okhurula khumisaala, amachina, ifetsa nende itsahabu.

¹⁸Okhuula mube meeso mbu omundu yesi oweshisaatsa, kata oweshikhasi, oweshilibwa kata owoluyia, ousinjiile hano inyanga yino shialakalukhanakhwo okhurula khu OMWAMI Nyasaye, Nyasaye wefwe, ne niyenamila abanyasaye bamahanga kandi tawe. Lino liakhaba shinga omusi kwomusaala omuluulu khandi okwobufwisi.

¹⁹Olunyuma lwokhuhulila amakhuwa keindakano yino yenya, omundu yesi yesi shialekaatiakhwo omwene mumwoyokwe naboola mbu, amakhuwa kali butswa obulayi, ne nakhola akokhwenya khwomwoyokwe omwene ta, shichila alachila abandu boosi abalayi nende ababi basishe.

²⁰OMWAMI Nyasaye shianyala okhubeela tsimbabasi omundu oyo tawe. Oburuma obwa OMWAMI Nyasaye, bwakhanga shinga omulilo, bulaba khuye, khandi amatinyu koosi akahandikwa mushitabo shino kalaba khuye okhuula olwa OMWAMI Nyasaye alaba namusishiye pe.

²¹OMWAMI Nyasaye alakhola omundu oyo okhuba eshilolelo mumoni mwetsimbia tsiosi tsia Isiraeli, khandi OMWAMI Nyasaye alareera khwinywe eshinyasio okhulondana nende ebilaamo biobubi ebili mundakano yahandikwa mushitabo shiamechesio aka OMWAMI Nyasaye shino.

²²Abaana benywe abetsinzibulo tsienywe etsiletsa olunyuma nende abarende abarula mubialo biehale balilola amatinyu akamukwila mushialo nende obulwale obwa OMWAMI Nyasaye amureerera.

²³Emikunda chienywe chilaba butswa emikhaya, nichiafuunikhwa namachina akomulilo nende omuunyu, Shibulaho eshindu shiosi eshinyala okhurakwakhwo ta, kata liswa liomubulimo shilinyala okhukhulakhwo tawe. Eshialo shienywe shilaba shinga amatookho ka Sodomu nende Komora, aka Adima nende Zebuyimu aka OMWAMI Nyasaye yasasia olwa yali nasinyishe muno.

²⁴Mana eshialo shiosi shilareeba shiri, ‘Nishiina eshichila OMWAMI Nyasaye nakhola kano mushialo shiabwe? Eshichila naba noburuma obululu burio nishina?’

²⁵Ne likalusio lilaba mbu, ‘kali kario shichila, abandu ba OMWAMI Nyasaye basasia indakano yabali nibakaasia nende OMWAMI Nyasaye, Nyasaye wabakuuka babwe, olwa yabayinia mushialo shia Misiri.

²⁶Bakhalabanila abanyasaye bandi, aba bali nibashili okhwinamilakhwo ta, aba OMWAMI Nyasaye yali niyakana mbu baleshe okhwinamilwa.

²⁷Niko akachila OMWAMI Nyasaye nasinyikha nabandube bano, mana nareera khushialo shiabwe amatinyu akahandikwa mushitabu shino.

²⁸OMWAMI Nyasaye yasinyikha muno, ne mwirumalie lilulu nabarusia mushialo shiabwe nende okhubasukuna mushialo eshicheni, nolwa bali bario okhuula olwa leelo.’

²⁹“Amakhuwa kamabiso naka OMWAMI Nyasaye wefwe, nebutswa akayakhufisulila nakefwe ifwe nende abaana befwe nende abolwibulo lwefwe, kho mbu, khukhole aka Amalako kano kalachilisinjia.”