Read wanga OKHUKALUSHILA MUMALAKO KA MUSA 3 Bible Online

OKHUKALUSHILA MUMALAKO KA MUSA 3 - wanga bible

OKHUKALUSHILA MUMALAKO KA MUSA 3

¹“Mana nikhushiukhana nikhutikulukha Bashani, ne Ogu omuruchi wa Bashani nabandube boosi nibetsa okhukhulwana ahambi nende litookho lia Endrei.

²Nebutswa OMWAMI Nyasaye yamboolela ari, ‘Mulamurie ta, shichila enzia okhuhana omuruchi oyo, nabandube boosi nende eshialoshie mumakhono kenywe; ne mulamukhola shinga olwa mwakhola omuruchi Sihoni wa Abamori, owarukanga Heshiboni.’

³“Kho khandi OMWAMI Nyasaye nahana Ogu nabandube boosi mumakhono kefwe, nefu nikhubeera boosi.

⁴Ne nikhubukula amatookhoke koosi; olwenolo libulaho litookho liakhwalekha okhubukula okhurula khubo tawe. Koosi halala khwabukula amatookho amakhumi kasasaba; nilio lihanga liosi elia Arigobu, liomuruchi Ogu wa Bashani yarukanga.

⁵Amatookho kano koosi kali nikasirwa namasisi amarambi, nebilibwa ebiekalungwa nebibia ebitinyu. Ne khandi lihanga elo lialimwo tsingoba tsinyinji etsialaali namasisi tawe.

⁶Khwasasia amatookho ako koosi, nikhwira abasaatsa boosi, nende abakhasi nabaana shinga olwa khwakhola khumuruchi Sihoni owa Heshiboni.

⁷Khwabukula emiruko chiabwe chiosi khandi nikhuyaaya amatookho kabwe koosi.

⁸“Olwene olwo khwabukula okhurula khubaruchi babili abo eshialo shikalushila ebukwe womwalo kwa Yorodani; okhurula khumwalo kwa Arinoni, okhuula khushikulu shia Hamoni.

⁹(Abasidoni balanganga eshikuli shia Hamoni mbu, Sirioni, nabo Abamori bashilanganga mbu Seniri.)

¹⁰Khwabukula amatookho aka omuruchi Ogu wa Bashani koosi; niko amatookho akeshialo shialenjeela; amahanga ka Kiliedi nende Bashani okhutsia okhuula ebukwe wamatookho ka Saleka nende Endrei.”

¹¹(Omuruchi Ogu niye owali wokhumalilikha okhwirwa mu Abarefahimu. Lisandukulie liokhuyabirwamwo liakaasibwa okhurula khushibia, ne liali elioburambi buhela ahambi tsifuti ekhumi natsine, ne obuchikha tsifuti tsisasaba okhulondana nende ifuti eyekhonyelungwa munyanga etsio. Lisanduku elo lishiliho okhuula olwaleelo mwitookho lia Raba, elia Abamori.)

¹²“Olwa khwabukula eshialo eshio okhuba eshiefwe, ndakabila aboluyia lwa Rubeni nende olwa Gadi omukunda kuli elubeka lwemasaba welitookho lia Aroeri ahambi nende omwalo kwa Arinoni. Khandi ndabakabila eshitonye shieshialo shiebikulu shia Kiliedi halala nende amatookho kashio.

¹³Inusu yabandu boluyia lwa Manase ndabakabila omukunda kundi okwasikala okwa Kiliedi, khandi nebakabila eshialo shia Bashani eshia Ogi yarukanga, nilio lihanga lia Arigobu liosi.” (Eshialo shia Bashani shiosi shialangungwa mbu eshia Abarefahimu.

¹⁴Yahiri wokhurula muluyia lwa Manase yabukula eshialo shia Arigobu shiosi, nishio eshia Bashani okhutsia okhuula khulwakho lwa Abakeshuri nende Abamaaka. Ne nakulikha tsingoba tsieshialo eshio eliiralie, ne okhuula olwaleelo tsishilangungwa mbu, tsingoba tsia Yahiri.)

¹⁵“Ne omukanda kwa Kiliedi ndakabila abeinzu ya Makiri, aboluyia lwa Manase.

¹⁶Ne khuboluyia lwa Rubeni nende Gadi ndabakabila omukunda kurula khu Kiliedi okhuula khu mwalo kwa Arinoni. Hakari womwalo okwo nilwo olwali olwakho lwabwe lwemulambo, ne olwakho lwelubeka lwemasaba lwali omwalo kwa Yaboki, khandi nilwo olwali olwakho lwa Abamori.

¹⁷Elubeka lwomumbo lihanga liabwe liolanga khumwalo kwa Yorodani, okhurula khunyanza ya Kalilaya eyili elubeka lwemasaba nokholomokha okhuula khunyanza yomunyu elubeka lwomumbo, ne elubeka lwebukwe olwakho lwabwe lwolanga hasi weshikulu shia Pisiga.

¹⁸“Ne ndamulachilisia khubise biene ebio nemboola endi, ‘OMWAMI Nyasaye wenywe umuhelesiye eshialo shino eshili elubeka lwebukwe womwalo kwa Yorodani okhuba eshienywe. Bulano recheshe abandu benywe bokhulwana mana mubarume okhutsia imbeli wetsimbia tsindi tsia Isiraeli okhwambukha omwalo kwa Yorodani, kho mbu babakhoonye okhubukula eshialo eshio.

¹⁹Habula abakhasi benywe, nabaana benywe nende emiruko chienywe, emanyile muli nemiruko eminji muleshe mumatookho aka ndalamuhelesia.

²⁰Mukhoonye abaana benywe Abaisiraeli okhuula olwa baba nibabukule eshialo eshia OMWAMI Nyasaye abahelesinjia, eshili elubeka lwomumbo lwomwalo kwa Yorodani. Mubakhoonye okhuula olwa OMWAMI Nyasaye alabanyalila okhumenya mumulembe shinga olwa yamukholele inywe hano. Olunyuma lwako munyala okhukalukha mumukunda okwa OMWAMI Nyasaye yamuhelesia okhuba okwenywe kuno.’

²¹“Mana nendachilisia Yoshwa khubise biene ebio endi, ‘Omalile okhulola netsimonitsio amakhuwa koosi aka OMWAMI Nyasayewo yakholeele abaruchi babili bano mbu; Sihoni nende Ogu, nolwa atsia okhukholela abandu bandi boosi abamutsia okhuseera.

²²Mulabarie ta, shichila OMWAMI Nyasaye wenywe niye oumulwanilanga.’

²³“Mana nesaaya OMWAMI Nyasaye nomwoyo kwosi mubise ebio nemboola endi,

²⁴‘OMWAMI Nyasaye, emanyile mbu umanyiyekhwo butswa obuchachilo bwamakhuwa amakhongo khandi akamakana aka otsitsanga okhukhola. Abulaho omunyasaye undi mwikulu kata khushialo, ounyala okhukhola amakhuwa amakhongo shinga akokholile kano tawe!

²⁵Ekhusaaya nochama, lekha ndambushe omwalo kwa Yorodani, esenekhwo butswa mumukunda omunulu okuli injelekha eyo; eshialo eshilayi eshiebikulu nende ebikulu bia Lebanoni.’

²⁶“Nebutswa OMWAMI Nyasaye yasinyishila isie khulwokhubela inywe, ne nalambulilisia tawe. Habula yamboolela ari, ‘Kahelile yaho! Shiolaralakhwo khandi khwikhuwa lino tawe.

²⁷Tikulukha khubutenje bweshikulu shia Pisiga mana ohenje obulayi ebukwe nende mumbo, emasaba nende emulambo. Ololekhwo butswa netsimonitsio shichila shiolambukhakhwo omwalo kwa Yorodani kuno tawe.

²⁸Nebutswa ohelesie Yoshwa amalachilisio kano khandi omutinyie ikholo, shichila niye oulemilila abandu okhwambukha nende okhubukula eshialo eshia witsa okhulola.’

²⁹“Kho nikutong'a mwibanda lihengane nende litookho lia Betsipeori.”