Read wanga OKHUKALUSHILA MUMALAKO KA MUSA 30 Bible Online

OKHUKALUSHILA MUMALAKO KA MUSA 30 - wanga bible

OKHUKALUSHILA MUMALAKO KA MUSA 30

¹Musa naboolela abandu ari, “Bulano endeere imbeli wenywe amakhuwa kabili, ikhabi nende eshilaamo shiobubi, mwahule elala khuko. Olwa amakhuwa ako koosi kalaba nikamalile okhwikholekha khwinye khandi nimumenyanga mumahanga aka OMWAMI Nyasaye wenywe amusalaasiliamwo, nolwa mwekhetsulile amakhuwa akandamuboolela mbu mwahule elala khuko.

²Ne inywe nende abolwibulo lwenywe nimuba nimumukalushila OMWAMI Nyasaye nende okhuhulila amalakoke nomwoyo kwosi, aka emuhelesinjia inyanga yino,

³kho OMWAMI Nyasaye wenywe alimubeela tsimbabasi. Alimuchelesia okhurula mumahanga aka yamusalasiamwo nende okhumukhola okhuba abayinda khandi.

⁴Kata nimuba nimwasalasibwa okhuula ehale khunduulo weshialo, OMWAMI Nyasaye wenywe yakhamukhung'asia mwesi halala namukalusia, kho mbu munyalilwe khandi okhubukula eshialo shiabakuuka benywe bamenyamwo olwambeli.

⁵Khandi OMWAMI Nyasaye alamukhola muyindihale muno nende okhwibulana nimwinjiha okhushilakhwo kata abakuuka benywe.

⁶OMWAMI Nyasaye wenywe alarusia amapaaro amabi koosi mumioyo chienywe nende chiabetsinzibulo tsienywe, kho mbu mumuheele nemioyo chienywe chiosi nende amaani kenywe koosi mana mube abalamu.

⁷Naye OMWAMI Nyasaye wenywe alara ebilaamo bino biosi khubasuku benywe abamusila khandi abamusandi.

⁸Ne okhuula khandi muhulile aka OMWAMI Nyasaye wenywe aboola, mulinde amalakoke koosi akemulakanga inyanga yino.

⁹OMWAMI Nyasaye alamukhola okhuba abayinda mushiosi eshiamukhola; mulebula abaana abanji, mulaba nemiruko eminji, khandi emikunda chienywe chilacheswa ebiokhulia ebinji. OMWAMI Nyasaye alasaangaala okhumukhola okhuyindihala shinga olwa yasaangaala okhukhola abakuuka benywe okhuyindihala.

¹⁰Nebutswa okhuula muhulile OMWAMI Nyasaye nimulinda amalakoke koosi akahandikwa mushitabo shino shiamechesioke. Okhuula mumukalushile nomwoyo kwosi.

¹¹“Lilako liemulachilisinjia inyanga yino lino, shilili litinyu muno khwinywe okhulilinda kata shilili ehale muno eliamulanyala okhuulakhwo tawe.

¹²Shilili hekulu mwikulu kho mbu mureebe mbu, ‘Niwiina oulakhutsila mwikulu akhureerele mana akhuyaalile kho mbu khunyalilwe okhuhulila nende okhulilinda,’ tawe.

¹³Kata shilili ehale injelekha weinyanza, ahamunyala okhureeba muri, ‘Niwiina oulambukha inyanza akhureerele nakhuyaalila kho mbu khunyalilwe okhulihulila nikhulilinda,’ tawe.

¹⁴Lilako lili butswa hano ninenywe, lili muminwa chienywe nende mumioyo chienywe, kho munyala okhulihulila nende okhulilinda.

¹⁵“Khulweshio inyanga yino era imbeli wenywe amakhuwa kabili, Lilayi nende Libi, Obulamu nende Olufu, mwahulekhwo elala.

¹⁶Nimuba nimuhulila nende okhukhola amalako aka OMWAMI Nyasaye wenywe, akemuhelesinjia inyanga yino, nimumuheela nende okhumuria, nimulinda amalakoke koosi, OMWAMI Nyasaye alamukhola okhuyindihala nende okhukhola lihanga lienywe okhuba eliabandu abanji muno. OMWAMI Nyasaye wenywe alamuhelesia ikhabi mushialo shiamuli ahambi okhumenyamwo.

¹⁷Nebutswa nimuba nimuloba okhumuhulila nimwinamila abanyasaye bandi nende okhubakhalabanila,

¹⁸kho mulamululwa mwesi pe. Emuchetsiyia inyanga yino mbu, nimukhola ako, shimulamenyakhwo oluhoono mushialo eshia mutsitsanga okhwinjilamwo nende okhushibukula eshili injelekha womwalo kwa Yorodani tawe.

¹⁹Inyanga yino enanga likulu nende eshialo okhuba abaloli khwinywe mbu, endeere imbeli wenywe obulamu nende olufu, tsikhabi nende ebilaamo ebibi. Bulano mwahule okhuba nobulamu, kho mbu inywe nende abolwibulo lwenywe munyale okhumenyaho oluhoono,

²⁰khandi munyale okhuheela OMWAMI Nyasaye wenywe, nimuhulila amakhuwake nimuhanda khuye obutinyu. Shichila OMWAMI Nyasaye nobulamu bwenywe khandi alamuhelesia tsinyanga tsinyinji okhumenya mushialo shiayasuubisia okhuhelesia abakuuka benywe Aburahamu, Isaka nende Yakobo.”