Read wanga OKHUKALUSHILA MUMALAKO KA MUSA 31 Bible Online

OKHUKALUSHILA MUMALAKO KA MUSA 31 - wanga bible

OKHUKALUSHILA MUMALAKO KA MUSA 31

¹Kho Musa natsiililila okhuboolela Abaisiraeli boosi amakhuwa kano ari,

²“Inyanga yino isie ndusiiye emiyika eshikhumi namakhumi kabili, shienyalilwa okhuba omwimilisi wenywe tawe. OMWAMI Nyasaye yamboolele ari, ‘Shiolambukha otsie injelekha womwalo kwa Yorodani tawe.’

³OMWAMI Nyasaye wenywe omwene alamuranjilila imbeli wenywe okhutsia, alakwisia nende okhusasia amahanga imbeli wenywe kho mbu, mubukule eshialo shiabwe. Naye Yoshwa alamwimilila shinga OMWAMI Nyasaye alachilisiye.

⁴OMWAMI Nyasaye alasasia amahanga ako shinga olwa yakhola khu Sihoni nende Ogi abaruchi ba Abamori khandi nende eshialo shiabwe olwa yabasasia.

⁵OMWAMI Nyasaye alamunyalila okhubahula, nenywe okhuula mubakholele okhulondana nelilachilisio liosi liemulachile.

⁶Mutinye khandi mume ikholo, mularie kata okhutechesibwa ninabo ta, shichila OMWAMI Nyasaye wenywe niye oulamulwanila; shialamwibala kata okhumulekha tawe.”

⁷Mana Musa nalanga Yoshwa imbeli wabandu ba Isiraeli boosi namuboolela ari, “otinye khandi, wume ikholo, shichila olatsia nende okhwinjila nabandu bano mushialo eshia OMWAMI Nyasaye yasuubisia okhuhelesia abakuuka babwe mbu shibe eshiabwe, obaremwo nobakabulila kho mbu shibe eshiabwe.

⁸OMWAMI Nyasaye alakhwimilila khandi alaba ninawe buli lwosi, shialakhwibala kata okhukhulekha tawe. Shiolaria kata okhufwa omwoyo tawe.”

⁹Mana Musa nahandika Lilako elia OMWAMI Nyasaye nahelesia abesaaliisi abasiani ba Lawi, abachinganga lisanduku lieindakano elia OMWAMI Nyasaye nende abakofu boosi aba Isiraeli.

¹⁰Musa nalachilisia abandu ari, “Buli olunyuma lwemiyika musafu, khunyanga yamwahula mumuyika kwobulekhulwi, okhuula musome nomwoyo omukhongo amalako kano khunyanga yamukhola lisabo liamatili.

¹¹Musomele abandu ba Isiraeli boosi lilako lino olwa betsa okhwinamila OMWAMI Nyasaye wenywe habundu aha yahula ahokhumwinamilaho.

¹²Okhung'asie abandu boosi, abasaatsa, abakhasi, abaana nende abarende abamenyanga mumatookho kenywe kho mbu buli mundu ahulile khandi yeche okhuria OMWAMI Nyasaye wenywe, nende okhulonda amalako ke habwene.

¹³Kho mbu, abaana babwe abatiiti, abalamanyile lilako lino ta, okhuula balihulile nende okhumanya okhumuria OMWAMI Nyasaye wenywe olwa muba nimushimenyile mushialo shiamulabukula injelekha womwalo kwa Yorodani.”

¹⁴Mana OMWAMI Nyasaye naboolela Musa ari, “Oli ahambi okhufwa. Kho langa Yoshwa mwitse ninaye mwiheema litakatifu, emuhelesia amebaalo.” Kho Musa nende Yoshwa nibetsa nibenjila mwiheema litakatifu.

¹⁵Ne OMWAMI Nyasaye nabaloleshela mwiheema musiilo yelileesi. Lileesi elo liasinjila hamuliango kweliheema litakatifu.

¹⁶OMWAMI Nyasaye naboolela Musa ari, “Oli ahambi okhufwa, ne niwakhafwa abandu balachaaka okhwinamila abanyasaye bandi nibafwola indakano yandakaasia ninabo. Balandekha nibenamila abanyasaye beshialo shiabali ahambi okhwinjilamwo.

¹⁷Olwa ako kekholekha ndalabatililwa liruma, ndalabalekha nabo balamululwa. Amanyakhano amanji khandi akamakana kalabetsela, mana baleyitsusia mbu, ako kekholekhanga khubo shichila isie OMWAMI Nyasaye wabwe shieshili halala ninabo tawe.

¹⁸Khandi ndalalekha okhubahabina ebise ebio, shichila bakholile amabi nokhwinamila abanyasaye bandi.

¹⁹“Khulweshio bulano ohandiche olwimbo luno mana wechesie abandu ba Isiraeli, balumanye mumakhuwa, kho mbu lube eshilolelo shianje khubandu ba Isiraeli.

²⁰Ndalabenjisia mushialo eshiyinda khandi eshinulu, eshia ndasuubisia okhuhelesia abakuuka babwe. Nibalimwo olwa bakhabe nibalile nibekure khandi nibakhomeele, bakhakalukhane nibenamila abanyasaye bandi nibabakhalabanila, ne nibafwola nende okhubiyia indakano yanje.

²¹Ne olwa amabi nende amatinyu ako kakhabetsele, olwimbo luno lwakharumbule obuloli imbeli wabwe shichila shilulibililwakhwo mubolwibulo lwabwe ta, okhuba kata bulano neshili okhubayila mushialo shiandasuubisia okhubahelesia, emanyile akali mumioyo chiabwe.”

²²Kho Musa nahandika olwimbo olwo, ne khunyanga eyo niyechesia abandu ba Isiraeli okhulwimba.

²³Mana OMWAMI Nyasaye naboolela Yoshwa omusiani wa Nuni, ari, “otinye khandi wume ikholo, shichila olareera abandu ba Isiraeli mushialo shiandasuubisia okhubahelesia, nasi ndalaba ninawe.”

²⁴Musa yahandika lilako elia Nyasaye mushitabu, nahenjelesinjia obulayi obulalekhakhwo eshindu shiosi elwanyi tawe.

²⁵Olwa yali namalile okhuhandika, yaboolela abesaaliisi abasiani ba Lawi abali abalindi belisanduku lieindakano eya OMWAMI Nyasaye ari,

²⁶“Bukule eshitabu shielilako elia Nyasaye shino, mana mushire halubeka welisanduku lieindakano eya OMWAMI Nyasaye wenywe, kho mbu shibetsenjeho shinga obuloli khubandube.

²⁷Emanyile shinga olwa bali abakhayi khandi abelikosi eliumu. Bo baba abakhayi khu OMWAMI Nyasaye munyanga tsiobulamu bwanje tsiosi, kata olwa efwa balatsiililila okhuba abakhayi bario.

²⁸Khung'asia abakofu betsimbia tsienywe boosi nende abakhongo benywe kho mbu ebaboolele amakhuwa kano. Ndalanga likulu nende eshialo okhuba abaloli banje khubo.

²⁹Emanyile mbu olunyuma lwokhufwa khwanje, abandu balakhola obwonooni nibakhaya okhukhola aka ebechesiiye. Ne mutsinyanga tsitsanga mubulamu bwabwe balinyoola amatinyu, shichila baliba nibakholile OMWAMI Nyasaye okhuba neliruma khulwa okhukhola aka yabakaya okhukhola.”

³⁰Mana Musa narumbula obutinyu amakhuwa akolwimbo luno, okhuula okhuhwa khwalwo, abomukhung'ano kwa Isiraeli boosi nibahulilanga ari,