Read wanga OKHUKALUSHILA MUMALAKO KA MUSA 32 Bible Online

OKHUKALUSHILA MUMALAKO KA MUSA 32 - wanga bible

OKHUKALUSHILA MUMALAKO KA MUSA 32

¹“Iwe likulu nende eshialo hulile amakhuwa kanje, recheresie obulayi akemboola.

²Amechesio kanje kalaronya buronya shinga ifula, khandi kalaama khushialo shinga lime. Amakhuwa kanje kalaronya shinga olunyilila khumisaala emitooro, khandi shinga olunyilila lweifula khubunyasi obutorotoro.

³Ndaletsoomia eliira lia OMWAMI Nyasaye, nabo abandube balarumbula akobukhongobwe.

⁴“OMWAMI Nyasaye niye eshikhumba shiefwe eshiamani, owahabwene khandi ouli omulunjishi munjilatsie tsiosi. Nyasaye wenywe nomuusubilwa khandi owobwatieli akholanga buli lwosi obulunjishi khandi akakhoyeele.

⁵Nebutswa inywe shimuli abasuubilwa khandi abakhoyeele okhuba kata abandube ta. Inywe muli lihanga liobwonooni khandi eliobwikaati.

⁶Inywe abandu abamayanu khandi abalayililisinjia ta, ako nakamukhoyile okhukholela OMWAMI Nyasaye? Niye senywe khandi omulonji wenywe, owamukhola inywe okhuba lihanga.

⁷Yililisiekhwo khukakhale, akatsinyanga tsiabira, reebekhwo abebusi benywe akekholekha, reebekhwo abakofu bamuboolele akekholekha khale.

⁸Olwa Nyasaye Omukhongo Muno yahelesia amahanga obulaame bwabwe, nakabulila buli mundu habunduwe. Yaraho tsinzakho tsiokhukabula abandu okhulondana nende obunji bwabaana babwe.

⁹Nebutswa aboluyia lwa Isiraeli yababukula okhuba obulaamebwe omwene.

¹⁰OMWAMI Nyasaye yabanyoola nibatimatimanga mushitsiimi, eshialo eshiumu, eshikhaya khandi eshihutsungwa neimbumbuyeka. OMWAMI Nyasaye yabalinda nende okhubaaya shinga olwa yakhelinda omwene.

¹¹OMWAMI Nyasaye yalinda Abaisiraeli baleshe okhukwa, shinga olwa indutsu yibambulanga tsimbaha tsiayo okhutiila abaana bayo mbu baleshe okhukwa hasi ta.

¹²OMWAMI Nyasaye yenyene niye owemilila abandu halali obukhoonyi bwosi okhurula khumunyasaye undi tawe.

¹³OMWAMI Nyasaye yabakhola okhuba khwikulu khwetsingulu khandi balia ebiabaraka mumikunda chiabwe. Banyoola obuushi mumbangatsi tsietsinyanda, emisaala chiemiseituni chiabwe chiakhula mwiloba eliumu.

¹⁴Tsing'ombe nende tsimbusi tsiabwe tsiashelwa amabeele amanji. Bali namakondi, tsimbusi nende tsing'ombe, tsindayi okhushila abandu bandi. Bali neingano inyushe khandi inzahule mutsiosi.

¹⁵Abandu ba OMWAMI Nyasaye bayindihala nibanera nibetsula nebiokhulia, nebutswa nibamuloba Nyasaye. Nibalekha Nyasaye omulonji wabwe khandi omuhonia wabwe wobunyali

¹⁶Abanyasaye babwe abacheni, bachila OMWAMI Nyasaye natiilwa neimbalikha, nibamukhola okhuba neliruma khulwa ebifwanani biabwe ebieshisinyo

¹⁷Bakholela ebifwanani emisango ebilali Nyasaye ta, abanyasaye ababakuuka babwe balamanyakhwo ta, aba abakuuka bebwe balayenamilakhwo ta.

¹⁸Baloba Nyasaye wabwe khandi omuhonia wabwe, nibebilila Nyasaye owabebula.

¹⁹Olwa OMWAMI Nyasaye yalola ako yatiilwa noburuma, ne naloba abaanabe abasiani nende abakhaana.

²⁰Ne naboola ari, ‘Ndalabafuuba, mana endolekhwo mbu, obumalilishi bwabwe bulaba burie. Okhuba nabandu abemirwe emiumu, khandi abalali abasuubilwa ta.

²¹Baasinyisia nebifwanani biabwe, baahafia imbalikha khulwa ebifwanani biabwe ebilali Nyasaye ta. Khulweshio ndalabakhola okhutiilwa neimbalikha nabandu abalalikhwo eshindu ta, ndalabasinyisia nelihanga liabandu abayingwa.

²²Liruma lianje lilarubukha shinga omulilo nilisamba buli shindu khushialo. Liloola hasi mwiloba nende okhusamba okhuula hasi webikulu.

²³Nditsa okhubareerela amanyakhano akalahwa ta, khandi ndalekhoonyela obuyingo bwanje bwosi khubo.

²⁴Inzala nende omurengo bilabeera, obulwale obutinyu bulabeera. Ndalaruma tsisolo nabulimo okhubaseera, nende tsinzokha tsiobufwisi okhubaluma.

²⁵Olukanga lulabeera khumihanda, amariisia kalabetsakhwo mumataala kabwe. Abasiani ababuukha nende abakhaana ababukha balafwa, abaana abatoro kata abakofu shibalalekhwakhwo tawe.

²⁶Ndalabamulule boosi pe kho mbu, baleshe okhwitsulilwakhwo tawe.

²⁷Nebutswa shindafuchilila abasuku babwe okhwiyitsiala mbu bahulile abandu banje tawe ne nisie omwene owabamulula.’

²⁸“Isiraeli nelihanga elibula obumanyilisi, khandi elibula obuchesi.

²⁹Shiabalolanga eshifune shichila nibahulwa ta, shibanyala okhumanyilisia eshiekholekha tawe.

³⁰Mbushina omundu mulala nahula abandu eshikhumila, nabo abandu babili nibahula abandu ebikhumila ekhumi? OMWAMI Nyasaye wabwe yali nabaleshile, Nyasaye, owamaani wabwe yali nabebaale.

³¹Abasuku babwe bamanya mbu, abanyasaye babwe shibali abamaani shinga Nyasaye wabandu ba Isiraeli tawe.

³²Abasuku babwe bali abeshifwabi shinga eshia Sodomu nende Komora, bali shinga emiseituni echiamanga tsinzabibu tsindulu khandi etsiobufwisi,

³³khandi bali shinga idivai eyikasibwe okhurula khubufwisi bweinzokha.

³⁴“OMWAMI Nyasaye yetsulilanga akabasuku babwe bakholile, OMWAMI Nyasaye alindililanga ebise bikhoyeele okhubahelesia eshinyasio.

³⁵OMWAMI Nyasaye omwene alamala eshikwoli, khandi alabahelesia eshinyasio. Inyanga yitsanga olwa balakwa hasi, ebise biobusasishi bwabwe bili ahambi, okhumululwa khwabwe khuli ahambi.

³⁶OMWAMI Nyasaye alahabina abandube olwa amaani kabwe kalaba nikahwelelelanga. Ne alalolesia tsimbabasitsie khubakhalabanibe, olwa alola amaani kabwe nikahwele, khandi nabulaho ousikaale omusumba noho omulekhuule.

³⁷Mana OMWAMI Nyasaye alareeba abandube ari, ‘Abanyasaye benywe bobunyali bamwesika bali heena?’

³⁸Mwabalisia amasinya kemisango chienywe, khandi nimubahelesia idivai okhuywa. Leshe bulano beetse bamuhabine, leshe bamwitsile tsimbilo bamuhonokosie.

³⁹“Isie, Isie sienyene, nisie Nyasaye; omunyasaye undi watoto shialiho tawe. Isie ndiranga khandi ehananga obulamu, esalisinjia khandi emboninjia, khandi abulaho omundu yesi ounyala okhuyinga isie.

⁴⁰Enjinguula omukhono kwanje mwikulu ninditsuba mbu, olwa eshiliho mwoyo,

⁴¹ndalayiakala olukanga lwanje lumwesukhanga mana endole mbu aka habwene kakholwa. Ndalakhola eshikwoli khubasuku banje, ndalahana eshinyasio khu ababaasila isie.

⁴²Obuyingo bwanje bulakwa hasi namatsayi kabwe, nalwo olukanga lwanje luleera abandu boosi abayingananga ninasi. Shindilalekhakhwo omundu yesi yesi ounwana tawe, kata abasalisibwe nende ababohe balafwa.

⁴³Inywe amahanga, okhuula mwitsoomie abandu ba OMWAMI. OMWAMI Nyasaye ahelesinjia eshinyasio abandu boosi abeeranga abandube. OMWAMI Nyasaye akholanga eshikwoli shiabasukube, naleshela abandube obwonooni bwabwe.”

⁴⁴Musa nende Yoshwa omusiani wa Nuni nibarumbula amakhuwa akolwimbo olwo obutinyu kho mbu abandu ba Isiraeli baluhulile.

⁴⁵Olwa Musa yali niyakhamala okhurumbula amakhuwa koosi akolwimbo olwo khu Abaisiraeli boosi,

⁴⁶yababoolela ari, “Mutile amakhuwa koosi akemurumbulile inyanga yino, kho mbu munyala okhwechesia abaana benywe okhulonda nibakakhola obulayi amakhuwa koosi akelilako elo.

⁴⁷Amakhuwa kano shikali butswa khwinywe amakhuwa amakhaya butswa akabula eshifune ta, niko obulamu bwenywe. Mukalonde mana mulamenya tsinyanga tsinyinji mushialo eshili injelekha womwalo kwa Yorodani, eshia mutsitsanga okhumenyamwo.”

⁴⁸Khunyanga tsana eyo, OMWAMI Nyasaye naboolela Musa ari,

⁴⁹“Tikulukha mubikulu bia Abarimu okhuula khushikulu shia Nebo eshili Moabu, eshihengane nende Yeriko, ohenje olole eshialo shia Kanani, eshialo shiehelesinjia Abaisiraeli okhuba eshiabwe.

⁵⁰Olafwila khushikulu eshio, shinga olwa Haroni, omusiani wenywe yafwila khushikulu shia Hori,

⁵¹okhuba inywe bombi shimwali abasuubilwa khwisie imbeli wabandu ba Isiraeli, habundu hamaatsi ka Meriba ahambi nelitookho lia Kadeshi elili mushitsiimi shia Zini tawe. Khandi shimwalinda obutakatifu bwanje mu Abaisiraeli tawe.

⁵²Khulweshio olalolakhwo butswa eshialo eshio noli ehale, shiolenjilakhwo mushialo eshia ehelesinjia abandu ba Isiraeli tawe.”