Read wanga OKHUKALUSHILA MUMALAKO KA MUSA 33 Bible Online

OKHUKALUSHILA MUMALAKO KA MUSA 33 - wanga bible

OKHUKALUSHILA MUMALAKO KA MUSA 33

¹Tsino nitsio tsikhabi etsia Musa, omundu wa Nyasaye yarumbula khubandu ba Isiraeli nashili okhufwa.

²Yaboola ari: OMWAMI Nyasaye yetsa narula khushikulu shia Sinai, yetsa shinga eliuba khwikulu khweshikulu shia Edomu mana niyakha khubandube nali khushikulu shia Parani. Abamalaika eshikhumila ekhumi bali ninaye, natilile omulilo kumwesukhanga mumukhonokwe omusaatsa.

³OMWAMI Nyasaye yaheela abandube, khandi alindanga boosi abali abebe. Kho khwiname hamakuluke nende okhulonda amalakoke.

⁴Khuhulile lilako elia Musa yakhuhelesia, lilako elo neshindu eshiolukoosi muno mwihanga liefwe.

⁵OMWAMI Nyasaye yekhola omuruchi wabandube ba Isiraeli. Olwa abemilisi babwe nende abetsimbia tsiabwe bakhung'ana halala.

⁶Musa yarumbula khu oluyia olwa Rubeni ari: “Rubeni abeho mwoyo, alafwa ta, nebutswa abandube balaba abatiiti.”

⁷Ne Musa narumbula khu oluyia olwa Yuda ari, “OMWAMI Nyasaye recheresia okhulila khwabwe khulwa obuhabini; Balimasie halala khandi netsimbia tsindi balwanile, OMWAMI Nyasaye Khandi obahabine, nolwana abasuku babwe.”

⁸Musa narumbula khu oluyia lwa Lawi ari, “Iwe, OMWAMI Nyasaye, lolesia akokhwenyakhwo okhubirira mu Urimu nende Tsumimu Okhubirila mubakhalabanibo abesikwa Abalawi, wabateema nibali mushitsiimi Masa mana nobaloola mbu nabobwatieli hamatsi ka Meriba.

⁹Bakhuhelesia oluyali olukhongo okhushila olwa bahelesia abebusi babwe, abasiani babwe kata abaana babwe abatiiti. Bahulila amalakoko khandi bali abasuubilwa khundakanoyo.

¹⁰Balechesia abandubo Abaisiraeli okhuhulila lilakolio; Balahana emisango khushimalilo shiemisangoshio.

¹¹OMWAMI Nyasaye khoonya oluyia lwabwe lube olwamaani; Osangasibwe nende akabakhola. Mulula abasuku babwe boosi; abasuku abo balabukhakhwo khandi tawe.”

¹²Musa narumbula khu oluyia lwa Benjamini ari; “Luno nilwo oluyia olwa OMWAMI Nyasaye yaahula khandi alindanga, OMWAMI Nyasaye abalindanga buli lwosi, khandi abetsanga hakari mubo.”

¹³Musa narumbula khu oluyia lwa Yosefu ari; “OMWAMI Nyasaye ahelesia omukunda kwabwe ikhabi yeifula nende amaatsi karula hasi weliloba.

¹⁴Omukunda kwabwe kube neikhabi yebiamo biomusaibibu kwenjile obulayi. Omukunda kwabwe kwitsule nebiamo ebilayi ebia buli khushise eshiomuyika.

¹⁵Ebikulu biabwe bietsulamwo nebiamo ebilayi ebiahule.

¹⁶Omukunda kwabwe kwitsulemwo nende ebindu biosi ebilayi; khulwa obulayi bwa OMWAMI Nyasaye banyoole ikhabi, owasinjila mushitsakha shiali nishiyitsanga. Tsikhabi tsino tsitse khuboluyia lwa Yosefu shichila Yosefu yali omwimilisi mubasiani babwe.

¹⁷Yosefu ali namaani shinga akeisurusi, netsinzika shinga etsia imboko. Alatsikhoonyela okhuluuma tsimbia tsiosi tsiabandu, okhuula khundulo weshialo. Nitsio ebikhumila bia Manase. Nende abikhumi biebikhumila bia Efuraimu khandi. Ne alaluuma amahanga okhuula khundulo khweshialo.”

¹⁸Musa narumbula khu oluyia lwa Zebuluni nende Isakari ari: “Zebuluni akhoya yayindihala mubukhala bwabwe khunyanza, khandi obuyinda bwa Isakari bumeeteshe mungomwe.

¹⁹Balenjisia abacheni khubikulu biabwe, nende okhuhana emisango chiobulunjishi habwene yaho. Banyoolanga obuyinda bwabwe okhurula munyanza. Nende okhurula mumuyeshe okuli khulukuku lweinyanza.”

²⁰Musa narumbula khu oluyia lwa Gadi ari: “Nyasaye yetsoomibwe owakaliyia eshialo shia Gadi. Gadi akoneshelanga shinga italanyi, okhwabula omukhono kata omurwe.

²¹Gadi omwene yeyahulila omukunda omulayi muchiosi omukabo kwabemilisi kwaleshelwa ye. Yahulila nalonda amalako aka OMWAMI olwa abemilisi Abaisiraeli bakhung'ana.”

²²Musa narumbula khu oluyia lwa Dani ari “Dani ali shinga italanyi imbuukha, eyibuukha tsimbilo okhurula Bashani.”

²³Musa narumbula khu oluyia lwa Nafutali ari; “Nafutali yetsule netsimbabasi etsia OMWAMI Nyasaye. Khandi yetsule netsikhabi tsia OMWAMI Nyasaye; Nafutali alalamilwa obulaame bwelubeka lwemulambo okhuula khunyanza eya Galilaya.”

²⁴Musa narumbula khu oluyia lwa Asheri naboola ari, “Asheri ali neikhabi muno okhushila tsimbia tsindi tsiosi Alachamwa nabasiani babwe khandi eshialoshie shibe eshiyinda shiemisaala chiemiseituni.

²⁵Amatookhoke kakhoya kekalilwa nemiliango chiebibia biemikasa. Ne buli lwosi abetsenje mumulembe.”

²⁶Inywe abandu ba Isiraeli, abulaho oufwanana nende Nyasaye wenywe ouchendanga mwikulu okhumuhabina khandi nende khumumaleesi mubunyalibwe tawe.

²⁷Nyasaye buli lwosi niye oumulindanga khubasuku; amakhonoke keinziayo niko obukhonyi bwenywe. OMWAMI Nyasaye yerusia elwanyi obusuku bwenywe shinga olwa mwali nimuulanga. Mana namuboolela okhubamulula boosi.

²⁸Kho abolwibulo lwa Yakobo mumenye mumulembe, mumenye obulayi mumukunda okwetsulamwo imele nende idivai, aha ifula okhurula mwikulu ikwitsanga niyinyisia hasi.

²⁹Iwe Isiraeli sangaala! Ouli shinga iwe niwiina, abandu ba OMWAMI Nyasaye yahonia? OMWAMI Nyasaye niye eshikhumba shiokhumukhonya khandi omuhabini wenywe khandi olukanga lwenywe lwoluyali Abasuku benywe balamwitsila nibasaba okhubeelwa tsimbabasi nenywe mulabasenachila hasi.