Read wanga OKHUKALUSHILA MUMALAKO KA MUSA 34 Bible Online

OKHUKALUSHILA MUMALAKO KA MUSA 34 - wanga bible

OKHUKALUSHILA MUMALAKO KA MUSA 34

¹Musa natikulukha okhurula mumuhololokhwe kwa Moabu niyola khushikulu shia Nebo, khubutenje bweshikulu shia Pisiga eshihengane nende Yeriko. Mana OMWAMI Nyasaye namumanyisia omukunda kwosi; okwa Giliadi, okhuula Dani,

²eshialo shiosi shia Nafutali, eshialo shiosi shia Efuraimu nende Manase, eshialo shiosi eshia Yuda elubeka lwa Mumbo okhuula khunyanza ya Meditereniani;

³Eshialo shiemulambo eshia Negebu nende omuhololokho okuli mwibanda lia Yeriko, litookho lili nemisaala chiamashindu okhuula Zoari.

⁴Mana OMWAMI Nyasaye naboolela Musa ari, “Shino nishio eshialo eshiandasuubisia Aburahamu, Isaka nende Yakobo mbu ndilihelesia abolwibulo lwabwe. Ekhukholile oshiloolekhwo netsimonitsio, nebutswa shiolambukha okhuulayo tawe.”

⁵Kho Musa omukhalabani wa OMWAMI Nyasaye nafwilaho mumukunda kwa Moabu, shinga olwa OMWAMI Nyasaye yali yaboola;

⁶Mana OMWAMI Nyasaye namuyabila mwibanda liomukundakwe Moabu okuhengane nende Betsipeori; nebutswa omundu yesi abulaho oumanyile aha Musa yayabilwa okhuula olwa leelo.

⁷Musa yali nemiyika eshikhumi shilala namakhumi kabili (120) olwa yafwa. Tsimonitsie tsiali nitsishilolanga obulayi khandi nashili namani shinga olwambeli.

⁸Abandu ba Isiraeli nibekhuula Musa nibali mumuhololokhwe okwa Moabu khulwa tsinyanga amakhumi kataru.

⁹Yoshwa omwana wa Nuni naba neiroho wobuchesi obunji shichila Musa yali yamwahula okhukalukha mushilenjeshie. Abandu ba Isiraeli bahelesia Yoshwa oluyali nende okhulonda amalako aka OMWAMI Nyasaye yali yabaheelesia okhubirila mu Musa.

¹⁰Omulakusi ashili okhubakhwoho mu Isiraeli ouli shinga Musa tawe; OMWAMI Nyasaye yaboola ninaye moni namoni.

¹¹Abulaho omulakusi wa Nyasaye owakholakhwo akamayia nende akamakana shinga aka OMWAMI Nyasaye yaruma Musa okhukhola khumuruchi wa Misiri, abakhongobe nende khwihanga liosi tawe.

¹²Omulakusi wa Nyasaye yesi abulaho owanyalilwa okhukhola amakhuwa amakhongo kandi akamarisia shinga aka Musa yakhola Abaisiraeli boosi nibaloolanga tawe.