Read wanga OKHUKALUSHILA MUMALAKO KA MUSA 4 Bible Online

OKHUKALUSHILA MUMALAKO KA MUSA 4 - wanga bible

OKHUKALUSHILA MUMALAKO KA MUSA 4

¹Mana Musa naboolela Abaisiraeli ari, “Bulano muhulile nokhutiila amalako koosi aka ndamwechesia khandi mukakhole, kho mbu mumenye khandi mubukule eshialo eshia OMWAMI Nyasaye wabakuuka benywe amuhelesinjia.

²Shimulameetekhwo noho kata okhurusiakhwo kata elala khumalako kemulachilisiye ako tawe, habula mulinde amalako aka OMWAMI Nyasaye wefwe aka emulachilisiye.

³Abene mwalutsi netsimoni tsienywe aka OMWAMI Nyasaye yakholile nikhuli hashikulu shia Peori. Yasasia okhurula mwinywe abandu boosi abenamilanga omunyasaye Baali.

⁴Nebutswa inywe abatiila amalako aka OMWAMI Nyasaye nokhukalonda mushiliho mwoyo okhuula olwa leelo.

⁵“Ndamwechesiye amalako koosi shinga olwa OMWAMI Nyasaye wanje yandachilisia mbu emwechesie. Mukatiile nende okhukakhola olwa muula mushialo shiamuli ahambi okhwinjilamwo nimushibukula.

⁶Mukatiile khandi mukakhole, okhuba niko aketsa okhuchila abandu bamahanga bamanye mbu muli abachesi khandi muli nobumanyilisi. Olwa bahulilakhwo amalako kano balaboola bari, ‘toto mwene abandu belihanga likhongo lino nabachesi khandi abobumanyilisi.’

⁷“Okhuba lihanga lindi libulahokhwoho elili nende omunyasaye walio ouli ahambi khulio shinga olwa OMWAMI Nyasaye wefwe ali ahambi ninefwe olwa khuba nikhumwenya tawe. Akhukhoonyanga buli lwosi olwa khumureeba obukhoonyi.

⁸Lihanga lindi libulaho elili namalako kahabwene shinga aka emwechesiye inyanga yino tawe.

⁹Habula mube meeso, ne shinga mushiliho mwoyo mulebililakhwo akamulutsi netsimoni tsienywe abeene kata kalarulakhwo mumioyo chienywe tawe. Mukechesia abaana benywe nende abetsukhulu benywe

¹⁰shinga olwa mwasinjila imbeli ewa OMWAMI Nyasaye. Khushikulu shia Sinai inyanga ya yamboolela ari; ‘Khung'asia abandu. Ndenyanga barecheresie amakhuwa aka enzenya okhuboola kho mbu, beche okhumbulila tsinyanga tsiabashiliho mwoyo tsiosi, khandi mbu bechesie abaana babwe okhukhola bario.’

¹¹“Muboolele abaana benywe shinga olwa mwatsia nimusinjila hasi weshikulu olwa shiali nishiyitsanga omulilo okhuula mumumaleesi, ne nishifunikhwe namumaleesi amasiro nomwosi omukhongo.

¹²Mana OMWAMI Nyasaye naboola ninenywe okhurula hakari womulilo okwo, nimuhulila naboolanga, nebutswa nimulalolakhwo okhufwanakhwe ta.

¹³Yamuboolela akamukhoyile okhukhola khulwa okhulinda indakano ya yakhola ninenywe mbu, okhuula mulinde amalako ekhumi aka yahandika khumachina kabili.

¹⁴Mana OMWAMI Nyasaye niyandachilisia olwenolo mbu emwechesie amalako koosi akamukhoyile okhutiila olwa mwinjila mushialo shiamuli ahambi okhuseera nokhushibukula.

¹⁵“Olwa OMWAMI Nyasaye yaboola ninenywe okhurula hakari womulilo khushikulu shia Sinai, shimwalolakhwo eshifwanani shiosi shiosi tawe. Kho mwiyile kaala,

¹⁶muleshe okhwonoona khulwa okhwikasilia eshifwanani mubukondo bwosi bwosi shibe mukhufwana khwomundu musaatsa noho omukhasi,

¹⁷isolo noho kata linyonyi tawe.

¹⁸Kata shinga isolo eyimoolanga khushialo noho kata inyeni tawe.

¹⁹Muletsukhana mwenamila kata okhukhalabanila ebilonje biamulolanga mumumaleesi shinga eliuba, omwesi, noho tsing'ining'ini tawe. OMWAMI Nyasaye wenywe yahana ebindu bino khubandu bamahanga kandi koosi okhubinamila.

²⁰Nebutswa OMWAMI Nyasaye yamubukula inywe, namurusia mumulilo omululu Misiri. Namukhola okhuba abandube omwene shinga olwa muli okhuula olwa leelo.

²¹Okhumeeta khwako, OMWAMI Nyasaye yasinyishila isie, khulwa obwonooni bwenywe, mana niyanzitsubila mbu, shindiliambukhakhwo omwalo kwa Yorodani tawe. Khandi mbu shindilinjilakhwo mushialo eshinulu eshia amuhelesinjia okhuba eshienywe tawe.

²²Isie ndafwila mushialo shino, ne shindalambukhakhwo omwalo kwa Yorodani tawe, habula inywe mwambushe mutsie mubukule eshialo eshinulu eshio.

²³Mwiyile kaala muleshe okhwibilila indakano eya OMWAMI Nyasaye wenywe, eya yakhola ninenywe. Mulinde amalakoke ne mulekasilia eshifwanani mukhufwana khweshindu shiosi shiosi tawe.

²⁴Okhuba OMWAMI Nyasaye wenywe ali shinga omulilo kusambanga, khandi niye Nyasaye weimbalikha.

²⁵“Kata olwa muba nimwakhamenya mushialo eshio emiyika eminji, nimwakhebula ebisoni, shimulonoonakhwo khulwa okhwikasilia eshifwanani shiokhwinamila mukhufwana khwosi khwosi tawe. Buno nobwonooni imbeli ewa OMWAMI Nyasaye, ne bulachila atiilwe oburuma.

²⁶Enanga likulu nende eshialo okhuba abaloli banje inyanga yino mbu, nimulambulila ta mwitsa okhusikha okhurula khushialo. Shimulamenya oluhoono mushialo shili injelekha womwalo kwa Yorodani eshiamuli ahambi okhubukula tawe, mulasasilibwa elala.

²⁷Ne OMWAMI Nyasaye alamusalasia mubandu khandi mulasikala batiti mumahanga ka atsia okhumuyilamwo.

²⁸Ebweneyo mulenamila ebifwanani biabanyasaye ebiakasibwa namakhono kabandu okhurula khutsimbao nende khumachina, abanyasaye abalanyala okhulola, okhuhulila, okhulia noho kata okhuhunyilisia tawe.

²⁹Ne nimuli ebweneyo mulakhaaba OMWAMI Nyasaye wenywe, ne mulamunyoola nimuba nimumukhaaba nomwoyo kwosi nende amakani kenywe koosi.

³⁰Olwa muba nimuli mubutinyu ne ebindu bino biosi nibimwikholekhakhwo mutsinyanga tsitsanga mulikalukha khu OMWAMI Nyasaye wenywe ne nimumuhulila.

³¹Ne okhubela ye ni Nyasaye weshisa shialamulekha noho okhumusasia kata okhwibilila indakano eya yetsubila abakuuka benywe tawe.

³²“Khabilisie okhurula khale inywe nimushili okhwibulwa, okhurula khukhulongwa khwomundu khushialo, mureebelesie okhurula ebukwe okhuula mumbo nikali mbu amakhuwa amakhongo shinga kano kayekholekhakhwo noho kata okhuhulilikhakhwo!

³³Balikhwoho abandu abahulilakhakhwo omunyasaye wabwe naboolanga ninabo shinga olwa mwahulila mana nibabaho abalamu?

³⁴Noho alikhwoho omunyasaye undu owatemakhwo omwene okhwibukulila lihanga okhurula hakari welihanga lindi mana nabakhola ebebe shinga olwa OMWAMI Nyasaye wenywe yamukholela okhurula Misiri? Abene mwalola netsimoni tsienywe shinga olwa OMWAMI Nyasaye wenywe yareera amanyakhano nende lihe, nakhola ebikhole biamakana khandi nakhola ebindu biokhuchenya khulwa obunyalibwe obukhongo namaanike.

³⁵OMWAMI Nyasaye yamukholela kano khulwa okhumumanyia mbu, ye niye OMWAMI Nyasaye ne oundi shialiho tawe.

³⁶Yaboola ninenywe okhurula mwikulu khulwa okhumwibalila ne khushialo khuno yamumanyia omulilo omukhongo khandi naboola ninenywe okhurula hakari wamumulilo okwo.

³⁷Ne khulwa okhubela yaheela abakuuka benywe yamwahula inywe ne khulwa obunyalibwe obukhongo ye omwene yamurusia Misiri.

³⁸Olwa mwali khuluchendo yarusia imbeli wenywe amahanga amakhongo khandi akobunyali obukhongo okhushila obwenywe khulwa okhumuhelesia eshialo shiabwe okhuba eshienywe, shinga olwa shili okhuula bulano.

³⁹Kho manyilisie inyanga yino nimwitsulila mbu, OMWAMI Nyasaye niye Nyasaye, mwikulu nende khushialo oundi shialiho tawe.

⁴⁰Khulweshio mutiile amalakoke akemulachilisiye inyanga yino, kho mbu amakhuwa koosi kabetsenje amalayi khwinywe nende khubana benywe. Khandi mbu emiyika chienywe chibe eminji mushialo eshia OMWAMI Nyasaye wenywe amuhelesiye mbu shibe eshienywe emiyika chiosi.”

⁴¹Mana Musa niyaahula amatookho kataru ebukwe womwalo kwa Yorodani,

⁴²komundu yesi yesi owitsukhana niyerire owashie oulali omusukuwe ta, anyala okhwilushilamwo khulwa okhuhonokosia obulamubwe.

⁴³Khulwa abolwibulo lwa Rubeni liali litookho lie Bezeri eliali khushialo shialenjeela mushitsiimi. Khulwa abolwibulo lwa Gadi liali litookho lia Ramotsi eliali mwihanga lia Kiliedi. Ne khulwa abolwibulo lwa Manase liali litookho lia Golani eliali mwihanga lia Bashani.

⁴⁴Kano niko amalako ka Nyasaye, aka Musa yahelesia Abaisiraeli.

⁴⁵Nibwo obwali obuloli, amalako nende amalachilisio aka Musa yaboolela Abaisiraeli olwa bali nibarulile Misiri,

⁴⁶nibali mwibanda lili ebukwe womwalo kwa Yorodani elihengane nende litookho lia Betsipeori. Kano kekholekha nibali mwihanga liali lia Sihoni omuruchi wa Abamori, owali niyaruka mwitookho lia Heshiboni. Musa nabandu ba Isiraeli bamuhula olwa bali nibarulile Misiri.

⁴⁷Babukula eshialoshie nende eshia Ogu omuruchi wa Bashani, abali abaruchi babili ba Abamori abarukanga okhuula ebukwe womwalo kwa Yorodani.

⁴⁸Lihanga lino liarulanga khwitokho lia Arori khundulo khwomwalo kwa Arinoni okhutsia okhuula khushikulu shia Sirioni nishio eshikulu shia Herimoni.

⁴⁹Omukunda kwabwe kwalinji halala nende omukunda kuli ebukwe womwalo kwa Yorodani okhutsia okhuula emulambo khunyanza yomunyu, ne ebukwe kwolanga hasi weshikulu shia Pisiga.