Read wanga OKHUKALUSHILA MUMALAKO KA MUSA 5 Bible Online

OKHUKALUSHILA MUMALAKO KA MUSA 5 - wanga bible

OKHUKALUSHILA MUMALAKO KA MUSA 5

¹Mana Musa nalanga Abaisiraeli boosi halala nababoolela ari, “Abandu ba Isiraeli, recheresie amalako kemuboolelanga inyanga yino. Mukahulile obulayi mana mukakhole.

²OMWAMI Nyasaye yakaasia indakano ninefu khushikulu shia Sinai.

³Shiyakaasia nabakuuka befwe bonyene ta, habula kata nende ifwe fwesi abakhuliho mwoyo inyanga yino.

⁴OMWAMI Nyasaye yaboola ninenywe moni namoni hakari womulilo khushikulu.

⁵Mubise ebio, ndasinjila hakari wenywe nende OMWAMI Nyasaye, okhumurumbulila likhuwalie shichila mwaria omulilo, ne nimulatikulukha khushikulu tawe.” OMWAMI Nyasaye naboola ari,

⁶“Nisie OMWAMI Nyasaye wenywe, owamurusia mushialo eshia Misiri ewa mwali abasumba.

⁷“Shiolenamilakhwo abanyasaye bandi halali isie tawe.

⁸“Shiolekasiliakhwo omwene eshifwanani shieshindu shiosi eshili ikulu mwikulu, noho hasi khushialo, noho mumaatsi kali hasi weshialo tawe.

⁹Shiolenamilekhwo eshifwanani shiosi shiosi kata okhushikhalabanila ta, shichila nisie OMWAMI Nyasayewo, ne endi Nyasaye weimbalikha. Ehananga eshinyasio khubandu abaasila nende khubolwibulo lwabwe lwosi okhuula khulwibulo lwakhataru nende olwakhane.

¹⁰Habula emanyinjia obuheeli bwanje oburalilu khubikhumila bietsinzibulo tsia abo abaheelanga khandi abahulilanga amalako kanje.

¹¹“Shiolarumbulanga eliira lianje eshikhaya butswa tawe, shichila isie OMWAMI Nyasayewo ndalahana eshinyasio khumundu yesi oulekhoonyela eliira lianje obulayi tawe.

¹²“Yitsulilanga inyanga ya Isabato nochikhola okhuba indakatifu shinga olwa isie OMWAMI Nyasayewo ndakhulaka.

¹³Oli netsinyanga tsisasaba etsiokhukhola emilimochio,

¹⁴nebutswa inyanga yomusafu neyinyanga yokhuhuluukha eyahanwa khulwanje. Khunyanga eyo omundu yesi alakholakhwo omulimo tawe, obe iwe omwene, noho abaanabo noho abasumbabo noho emirukochio noho kata omurende wamenya mushialoshio. Omusumbawo okhuula ahuluushe shinga iwe.

¹⁵Witsulile mbu wali omusumba mushialo shia Misiri, ne isie OMWAMI Nyasayewo khulwobunyali bwanje obukhongo nende amaani kanje ndakhurusiayo. Niko akachilanga nekhulaka okhulinda inyanga ya Isabato.

¹⁶“Ohelesinjie papawo nende mamawo oluyali shinga olwa isie OMWAMI Nyasayewo ndalachilisia, kho mbu amakhuwako koosi kabetsenje amalayi khandi omenye tsinyanga tsinyinji mushialo shiekhuhelesinjia.

¹⁷“Shioleeranga omundu ta.

¹⁸“Shiolaheyanga ta.

¹⁹“Shiolebanga ta.

²⁰“Shiolachikhanga owashio ta.

²¹“Shiolekombanga omukhasi noho omusaatsa wowashio noho okhwikomba inzuye, omukundakwe, abakholibe, tsing'ombetsie, tsisishilitsie noho kata eshindushie shiosi shiosi eshia ali ninashio tawe.

²²“Kano niko amalako aka OMWAMI Nyasaye yamuhelesia mwesi olwa mwakhung'ana khushikulu. Olwa yaboola ninenywe nomwoyo omukhongo okhurula mumulilo nende mumumaleesi amasiro yamuhelesia butswa amalako kano ne shiyameetakhwo elindi liosi liosi tawe. Mana nakahandika khumachina kabili ne niyambelesia.

²³“Ne olwa mwahulila omwoyo okhurula mushiilima, nashio eshikulu nishiyitsanga, abemilisi benywe nabakhulundu betsimbia tsienywe banzitsakhwo,

²⁴nibamboolela bari, “OMWAMI Nyasaye wefwe akhumanyiye obukhongobwe noluyalilwe olwa khuhulile naboola okhurula mumulilo! Inyanga yino khwakhalola mbu, Nyasaye anyala okhuboola nomundu mana omundu oyo atsililile okhubaho mwoyo.

²⁵Ne bulano shichila shiina khufwe? Omulilo omukhongo okwo kunyala okhukhusamba. Nikaba mbu OMWAMI Nyasaye wefwe aboola ninefu khandi, toto mwene khulafwa.

²⁶Alikhwoho omundu owatsiililila okhuba mwoyo olunyuma olwa OMWAMI Nyasaye ouliho mwoyo okhuboola ninaye okhurula mumulilo?

²⁷Musa kalukhayo orecheresie amakhuwa koosi aka OMWAMI Nyasaye alaboola. Mana okalushe okhuboolele akakhuboolela, nefu khulakahulila khandi khulakakhola.”

²⁸Olwa OMWAMI Nyasaye yahulila amakhuwa kenywe yamboolela ari, “Embuliile amakhuwa kabandu bano bakhuboolele, ne bali habwene.

²⁹Bwakhabele obulayi nibakhambulilenje bario buli lwosi, nibakhambelenje oluyali nende okhuhulila amalako kanje, kho mbu amakhuwa kabwe nende akabolwibulo lwabwe kabetsenje amalayi emiyika chiosi!

³⁰Tsia obaboolele bakalushe mumaheema kabwe;

³¹Nebutswa iwe Musa, sinjila hano ninasi ne ndalakhuboolela amalako nende amalachilisio kanje koosi. Wechesie abandu kho mbu, bakahulile nende okhukakhola mushialo shiebahelesinjia eshio.

³²“Inywe abandu ba Isiraeli murekhwo eshinani okhukhola shinga olwa OMWAMI Nyasaye wenywe amulachilisiye. Mulalekha okhutiila kata elala khumalakoke tawe.

³³Mutiile amalakoke ako koosi kho mbu, amakhuwa kenywe koosi kabetsenje amalayi khandi kho mumenye oluhono mushialo eshiamuhelesinjia.”