Read wanga OKHUKALUSHILA MUMALAKO KA MUSA 6 Bible Online

OKHUKALUSHILA MUMALAKO KA MUSA 6 - wanga bible

OKHUKALUSHILA MUMALAKO KA MUSA 6

¹“Kano niko amalako aka OMWAMI Nyasaye wenywe yandachilisia mbu emwechesie, kho mbu mukakhole mushialo shiamutsitsanga okhubukula.

²Khulwa oluhono lwamushiliho mwoyo inywe nende abolwibulo lwenywe okhuula muhelesie OMWAMI Nyasaye wenywe oluyali nende okhulonda amalakoke koosi akemuhelesinjia, kho mbu obulamu bwenywe bube oburambi mushialo.

³Mukahulile inywe abandu ba Isiraeli, mana mukakhole kho amakhuwa kenywe koosi kabetsenje amalayi, khandi mulaba lihanga liamaani nimumenya mushialo eshiyinda khandi eshinulu shinga olwa OMWAMI Nyasaye wabakuuka benywe yasuubisia.

⁴“Abandu ba Isiraeli, enzenya mwitsulile likhuwa lino mbu, OMWAMI Nyasaye wefwe niye Nyasaye yenyene.

⁵Muheele OMWAMI Nyasaye wenywe nomwoyo kwosi, namakani kenywe koosi nende amaani kenywe koosi.

⁶Ne amakhuwa kemulachilisinjia inyanga yino kano okhuula muketsulilenje buli lwosi.

⁷Ne okhuula mukechesie abaana benywe obulayi. Mukakalushilenjemwo nimuli ingo, nimuchendanga khunjila, nende olwa muba nimuhuluukhanga hango nende kata olwa muba nimukholanga emilimo.

⁸Mukabohe khumikhono chienywe nende khubweni bwenywe kabe shinga eshitsulilo.

⁹Khandi mukahandiche khumiliango chienywe, nende khutsinzu tsienywe nende khubilibwa bwenywe.

¹⁰“Ne olwa OMWAMI Nyasaye wenywe amureera mushialo shia yasuubisia okhuhelesia abakuuka benywe Aburahamu, Isaka, nende Yakobo, alamuhelesia eshialo shili namatookho amakhongo khandi amalayi aka inywe mulayombakha tawe.

¹¹Alamuhelesia tsinzu tsietsulamwo ebindu ebilayi ebia inywe mwalaramwo tawe, eshialo eshio shilabamwo amayabo ketsulamwo amaatsi aka inywe mulayaba tawe, nende emikunda chiemitsabibu nemiseituni echia inywe mularaaka tawe. Ne olwa OMWAMI Nyasaye amureera mushialo shino nimulia khu shiosi shiosi eshiamwenya okhulia nimwikura,

¹²mwitsulilenje buli lwosi OMWAMI Nyasaye wenywe owamurusia Misiri ewa mwali ababohe.

¹³Muhelesinjie OMWAMI Nyasaye wenywe oluyali, nimumwinamila; khandi mwitsubenje muliiralie lionyene.

¹⁴Shimulenamilakhwo abanyasaye bandi kata aba abandu bamumenyile ahambi ninabo tawe.

¹⁵Nimwinamila abanyasaye bandi, OMWAMI Nyasaye alatiilwa noburuma, ne namusasia mwesi pe, shichila OMWAMI Nyasaye ouli hakari wenywe ni Nyasaye weimbalikha.

¹⁶“Shimulamuteema OMWAMI Nyasaye wenywe shinga olwa mwakhola nimuli Masa tawe.

¹⁷Mutiile obulayi amalako aka OMWAMI Nyasaye wenywe nende oburumbusibwe nende amalachilisioke kamulachilisiye.

¹⁸Mukhole akahabwene khandi amalayi imbeli ewa OMWAMI Nyasaye, kho mbu amakhuwa kenywe koosi kabetsenje amalayi. Mana mulenjila nende okhubukula eshialo eshinulu eshia OMWAMI Nyasaye yasuubisia abakuuka benywe.

¹⁹Khandi mulahula abasuku bali imbeli wenywe boosi shinga olwa OMWAMI Nyasaye yasuubisia.

²⁰“Mutsinyanga tsitsanga, abaana benywe nibamureeba bari, ‘Mbushina OMWAMI Nyasaye nakhulachilisia okhulinda amalako kano koosi?’

²¹Mulimala mwabakalusia muri, ‘Khwali abasumba bomuruchi wa Misiri, ne OMWAMI Nyasaye yakhurusiayo okhubirila mubunyalibwe obukhongo.

²²Khwalola netsimoni tsiefwe abeene OMWAMI Nyasaye nakhola ebikhole biamakana khandi ebiokhuhuchisia khubamisiri nomuruchi wabwe nende abakholibe boosi.

²³Yakhurusiayo nakhuhelesia eshialo shino eshia yasuubisia abakuuka befwe.

²⁴Mana OMWAMI Nyasaye wefwe nakhulaka okhutiila amalako kano koosi nende okhumuhelesinjia oluyali. Ne nikhukhola khurio alakhulinda nende okhukhusia lihanga liefwe shinga olwa akholanga bulano.

²⁵Nikhukhola amakhuwa koosi obulayi shinga olwa yakhulaka alakhulinda khandi alachila amakhuwa kefwe koosi kabe amalayi.’ ”