Read wanga OKHUKALUSHILA MUMALAKO KA MUSA 7 Bible Online

OKHUKALUSHILA MUMALAKO KA MUSA 7 - wanga bible

OKHUKALUSHILA MUMALAKO KA MUSA 7

¹“OMWAMI Nyasaye wenywe alamwinjisia mushialo shia muli ahambi okhubukula, ne alamurusiliamwo amahanga amanji. Olwa muba nimutsiilililanga okhwinjilamwo alarusia imbeli wenywe amahanga amakhongo musafu khandi akamani okhumushila; ngakano mbu, Abahiti, Abagirigashi, Abamori, Abakanani, Abaperisi, Abahiwi, nende Abayebusi.

²Ne olwa OMWAMI Nyasaye wenywe amuhelesia amahanga ako, ne nimukahula okhuula mukamululile elala. Shimulakasiekhwo indakano ninabo kata okhubalolela tsimbabasi tawe.

³Shimulateshianiakhwo ninabo tawe. Abaana benywe abasiani balateshiakhwo abakhaana okhurula mumahanga ako tawe. Nabo abaana benywe abakhaana balateshelakhwo abasiani bomumahanga ako tawe.

⁴Shichila balachila abaana benywe bashiukhane okhurula khu OMWAMI Nyasaye, ne nibenamila abanyasaye bandi. Ne nibakhola bario OMWAMI Nyasaye alatiilwa noburuma, ne namumulula mwesi pe lulala.

⁵Ne bulano mulakhola murinanwa: mulikulule ebimalilo biemisango biabwe, mukhisie hasi tsisiilo tsiabwe tsiamachina, muremache ebifwanani biabwe bia Ashera omunyasaye wabwe nende okhusamba ebifwanani biabwe biabanyasaye.

⁶Mukhole murio shichila muli abandu abaahule aba OMWAMI Nyasaye wenywe. Okhurula mutsimbia tsiosi tsiokhushialo OMWAMI Nyasaye yamwaahule inywe okhuba abandube.

⁷“OMWAMI Nyasaye shiyamuheela inywe shichila mbu muli abanji okhushila abandu bandi khushialo ta, ninywe abatiiti muno mutsimbia tsiosi.

⁸Habula OMWAMI Nyasaye yamuheela khandi yenyanga okhulinda akayetsubila abakuuka benywe. Niko akachila namurusia Misiri khulwa obunyalibwe obukhongo, namulekhuula okhurula khumuruchi wa Misiri.

⁹Khulweshio mumanye mbu, OMWAMI Nyasaye, Nyasaye wenywe niye Nyasaye yenyene, khandi nomwisiikwa, ne alindanga indakanoye. Khandi alamanyia obuheelibwe oburalilu khu abamuheelanga nende abahulilanga amalakoke okhuula khunzibulo eshikhumi.

¹⁰Habula shialachweya okhumulula abo abamusira tawe.

¹¹Khulweshio mulindenje amalakoke, amalachilisio nende obukhalachi obwa emulachile inyanga yino.

¹²“Ne nimuba nimuhulila nende okhulinda amalako kemulachilisinjia inyanga yino, OMWAMI Nyasaye wenywe alatsiililila okhulinda indakano ya yakaasia ninenywe, ne khandi alatsiilila okhumumanyia obuheelibwe oburalilu shinga olwa yasuubisia abakuuka benywe.

¹³Naye alamuheela inywe, nende okhumuhelesia tsikhabi, kano kalachila mwibulane nimumetekha. Khandi alamuhelesia abaana abanji nara tsikhabi mumikunda chienywe, ne mulaba nende imele, idivai, nende amafura mubunji. Khandi alamuhelesia tsing'ombe namakondi amanji. Ebindu bino biosi OMWAMI Nyasaye alamuhelesia mushialo eshia yasuubisia abakuuka benywe mbu alimuhelesia.

¹⁴Mulinyoola tsikhabi tsinyinji okhushilakhwo abandu bandi boosi, shibalabaho abasaatsa noho abakhasi balebulanga abaana ta, noho kata tsing'ombe tsilebulanga tawe.

¹⁵OMWAMI Nyasaye alamurusiakhwo obulwale bwosi, kata amalwale kamwalola nimuli Misiri shikalabakhwo khwinywe khandi tawe. Habula alakareeranga khubasuku benywe boosi.

¹⁶Ne musasie amahanga koosi aka OMWAMI Nyasaye ara mumakhono kenywe, mulabalolelakhwo tsimbabasi. Shimulenamilakhwo abanyasaye babwe tawe, nimubenamila mulafwa.

¹⁷“Munyala okhuba nimuboolanga mbu, ‘amahanga kano namakhongo okhukhushila nikhukahule khurie?’

¹⁸Mulakarie ta, habula mwitsulile aka OMWAMI Nyasaye wenywe yakholela omuruchi wa Misiri nabandube boosi.

¹⁹Mwitsulile amateemo amakhongo kamwalola netsimoni tsienywe abeene nende ebilolelo nebikhole biamakana ebia yakhola. Mwalola shinga olwa OMWAMI Nyasaye yamurusia Misiri okhubirila mumaanike nobunyalibwe obukhongo. Munjila ndala eya yasasiliamwo Abamisiri, nolwa atsia okhusasia abandu boosi abamuhendinjia abo.

²⁰Okhumeetakhwo abo abetsa okhutong'a nibefisa okhurula khwinywe, OMWAMI Nyasaye wenywe alaruma amaalaamba mubo okhubalasa okhuula olwa boosi bafwa.

²¹Mulabaria ta, shichila OMWAMI Nyasaye wenywe ali hakari wenywe, ni Nyasaye nomukhongo khandi owokhuribwa.

²²OMWAMI Nyasaye, Nyasaye wenywe alarusinjia amahanga kali imbeli wenywe hatiiti hatiiti, shimwitsa okhukasasia butswa lulala tawe, shichila nimukasasia bwangu tsisolo nabulimo tsinyala okhushila nitsimuhendia omwoyo.

²³Habula OMWAMI Nyasaye wenywe alara abandu abo mumakhono kenywe nende okhubahendia omwoyo okhuula olwa muba nimubasasiye.

²⁴Khandi alara abaruchi babwe mumakhono kenywe; mulabeera ne ameera kabwe kalebililwa. Abulaho omundu witsa okhumusinjisia, boosi mulabeera.

²⁵Mwitsa okhusamba ebifwanani biabwe biabanyasaye, ne mulekomba ifetsa noho itsahabu yiba niyili khubio kata okhuchibukula tawe. Nimuchibukula mulafwa shichila muba mureerile eshisinyo khu OMWAMI Nyasaye wenywe.

²⁶Khandi mulareelekhwo ebifwanani biabanyasaye bino mutsinzu tsienywe ta, shichila nimukhola murio mulaba nimwireerele eshilaamo shilala eshio. Okhuula musile nende okhuloba ebifwanani ebio shichila OMWAMI Nyasaye yamala okhubirakhwo eshilaamo.”