Read wanga OKHUKALUSHILA MUMALAKO KA MUSA 8 Bible Online

OKHUKALUSHILA MUMALAKO KA MUSA 8 - wanga bible

OKHUKALUSHILA MUMALAKO KA MUSA 8

¹“Muhenjelesie nimukhola amalako koosi akemulachilisiye inyanga yino. Nimukhola murio mulebulana nimwinjiha, ne mulabukula eshialo eshia OMWAMI Nyasaye yasuubia abakuuka benywe

²Mwitsulile shinga olwa OMWAMI Nyasaye wenywe yamwimilila muluchendo olurambi mushitsiimi khulwemiyika amakhumi kane. Yakhola kano khulwa okhumusandia nende okhumuteema okhumanya akali mumioyo chienywe; nende okhumanya nikali mbu munyala okhutiila amalakoke noho ta.

³Yamusandia namuhonjia inzala, mana namuhelesia imana mbu mulie; eshiokhulia eshia inywe nende abakuuka benywe mwali nimushili okhuliakhwo ta. Yakhola ario okhumanyia mbu, omundu shiamenyanga khulwa omukaate kwonyene ta, habula khulwa bulishindu eshia OMWAMI Nyasaye aboola.

⁴Khulwa oluhoono lwemiyika amakhumi kane echio, tsingubo tsienywe shitsiarandukhakhwo kata ebilenje bienywe okhufimbakhwo tawe.

⁵Mwitsulile bulano mbu OMWAMI Nyasaye amukoosinjia bukoosia namuhelesia eshinyasio shinga olwa samwana omwana yechesinjia nakololosia omwanawe.

⁶Kho mulinde amalako aka OMWAMI Nyasaye wenywe nimumenya shinga olwa yamulachilisia khandi mumuhelesinjie oluyali.

⁷OMWAMI Nyasaye wenywe alamuyila mushialo eshinulu, eshili nemialo nende tsisebele tsiamatsi, nende oruchela orukholomokhanga mumabanda okhurula mubikulu.

⁸Alamuyila mushialo eshili nende ingano, ishayiri, emitsabibu, emikhuyu nende emikomamanga. Eshialo shili nemiseituni chiamafura nende obuushi.

⁹Eshialo eshia mwakhalitsenje emikaate buli lwosi, shimwakhatambekhwo eshindu shiosi shiosi tawe. Tsinyanda tsieshialo eshio tsilimwo ebibia, ne mubikulu biashio munyala okhuyabamwo ebibia biomukasa.

¹⁰Ne mulilia nimwikura khandi nimukhupila OMWAMI Nyasaye wenywe orio khulwa okhumuhelesia eshialo eshilayi eshio.

¹¹“Muletsukhana nimwibilila OMWAMI Nyasaye wenywe kata okhwibilila amalakoke nobukhalachibwe obwemulachilisinjia inyanga yino tawe.

¹²Olwa muba nimuliile nimwikure, nimumbashe tsinzu tsindayi tsiokhumenyamwo,

¹³khandi olwa tsing'ombe namakondi kenywe biba nibimeeteshe, khandi nimuli nende ifetsa neyitsahabu inyinji, kata olwa ebindu biosi ebiamuli ninabio bimeetekha,

¹⁴muletsukhana mwechinjimisia mwebilila OMWAMI Nyasaye wenywe, owamurusia Misiri ewamwali abasumba tawe.

¹⁵Yamwimilila okhubira mushitsiimi eshikhongo khandi eshiokhuriisia, eshialimwo tsinzokha tsikhongo khandi etsiobufwisi obululu nende amakatia. Nimuli mushialo eshiumu, eshibulamwo amaatsi, yakhola amaatsi okhurula mulwanda nimunywa.

¹⁶Mushitsiimi eshio, yamulisia nende imana, eshiokhulia eshiabakuuka benywe bali nibashili okhuliakhwo tawe. Yamusandia namuteema kho mbu, mukhumalilikha amuhelesie tsikhabi namukholela amakhuwa amalayi.

¹⁷Muletsukhana nimuboola mumioyo chienywe mbu, ‘Khwanyoola obuyinda buno okhubirira mubunyali nende amaani kefwe abeene,’ tawe.

¹⁸Mwitsulile mbu, OMWAMI Nyasaye wenywe niye oumuhelesinjia obunyali bwokhuba abayinda. Akholanga ario kho mbu, amumanyie mbu ashili omusuubilwa okhuula olwa leelo khuindakano eya yetsubila abakuuka benywe.

¹⁹Ne nimuba nimwibilila OMWAMI Nyasaye wenywe, nimuchaaka okhwinamila nokhukhalabanila abanyasaye bandi; emuchetsiyinjia inyanga yino mbu, nimukhola murio, toto mwene mutsia okhusikha.

²⁰Nimuba nimularia OMWAMI Nyasaye wenywe, mumanye mbu mulasasibwa shinga amahanga akatsitsanga okhusasibwa imbeli wenywe.”