Read wanga OKHUKALUSHILA MUMALAKO KA MUSA 9 Bible Online

OKHUKALUSHILA MUMALAKO KA MUSA 9 - wanga bible

OKHUKALUSHILA MUMALAKO KA MUSA 9

¹“Hulile inywe, abandu ba Isiraeli! Inyanga yino mwakhaba ahambi okhwambukha omwalo kwa Yorodani nende okhubukula eshialo shiamahanga amakhongo khandi akamaani okhumushila. Amatookho kabwe namakhongo khandi akali namasiisi namarambi okhuula mumaleesi.

²Nabo abandu beene nabamani khandi abarambi shinga abolwibulo lwa Anakimu, bamwamanya khandi abamuhulilanga nibaboolwakhwo mbu, ‘Niwiina owakhasinjila okhulwana nende Abanakimu?’

³Kho mumanye inyanga yino mbu, OMWAMI Nyasaye wenywe alamwimilila imbeli shinga omulilo okusambanga. Kho olwa museera abasuku benywe bulaba obwangu khwinywe okhubahula nimubukula eshialo shiabwe shinga olwa OMWAMI Nyasaye yasuubia.

⁴“Ne olunyuma olwa OMWAMI Nyasaye wenywe aba namukhoonyile okhubahula nimubarusia mushialo eshio, mulaboola mumioyo chienywe mbu, ‘OMWAMI Nyasaye yakhunyalile okhubukula eshialo shino shichila khuli abakhoyeele’ tawe. OMWAMI Nyasaye atsitsanga okhumukhoonya okhurusia amahanga kano mushialo shino shichila abandu bamahanga ako nabamayanu.

⁵OMWAMI Nyasaye shiamukhoonyanga okhubukula eshialo eshio shichila mbu muli abalunjishi noho mbu mukholanga akakhoyile tawe. Habula alamukhoonya okhushibukula shichila abandu bamahanga ako nabamayanu, khandi alakhola ario khulwa okhulinda akayetsuba nasuubia abakuuka benywe; Aburahamu, Isaka nende Yakobo.

⁶Mwitsulile mbu, OMWAMI Nyasaye, Nyasaye wenywe shialamukhoonya okhubukula eshialo eshilayi eshio shichila mbu muli abalunjishi tawe. Inywe muli abandu aboluyia lwobukhayi.

⁷“Shimulebilila shinga olwa mwasinyisia OMWAMI Nyasaye wenywe natiilwa noburuma mushitsiimi tawe. Okhurula khunyanga ya mwarula Misiri okhuula khunyanga eya mwola hano, mukhayanga okhuhulila OMWAMI Nyasaye.

⁸Kata olwa mwali hashikulu shia Sinai, mwasinyisia OMWAMI Nyasaye, nimuchila natiilwa noburuma; naba ahambi okhumumulula inywe.

⁹Ndatikulukha mushikulu okhuheebwa amachina keindakano akali nikahandikwakhwo amakhuwa keindakano eya OMWAMI Nyasaye yakaasia ninenywe. Ndamenya mushikulu tsinyanga amakhumi kane eshilo neshiteere, ne shindaliakhwo eshindu kata okhunywakhwo amaatsi tawe.

¹⁰Mana OMWAMI Nyasaye niyambelesia amachina keindakano kabili, aka yali nahandichekhwo nomukhonokwe omwene amakhuwa ka yali namuboolele okhurula hakari womulilo khunyanga ya yaboola ninenywe nimukhung'anile hashikulu.

¹¹Kho olunyuma lwetsinyanga amakhumi kane eshilo neshiteere etsio, OMWAMI Nyasaye yambelesia amachina keindakano kabili, akali nikahandikwekhwo indakano.

¹²“Mana OMWAMI Nyasaye niyamboolela ari, ‘Sumukha okholomoshe bwangu okhurula hano shichila abandubo aba wayemilile okhurula Misiri beyonooniye abeene khulwa okhukhola obwonooni. Bamalile okhushiukhana okhurula khu akandabalachilisia, ne bekasiliye eshifwanani shiokhwinamila.’

¹³“Khandi OMWAMI Nyasaye nameeta okhumboolela ari; ‘Emanyile shinga olwa abandu bano bali abakhayi.

¹⁴Lekha butswa, isie omwene ebamulule boosi pe okhurula khushialo mana abandu boosi babebilile. Ne ndalabuusia lihanga lindi likhongo khandi eliamaani okhubashila okhurula khwiwe.’

¹⁵“Kho ndashiukhana mana nekholomokha okhurula mushikulu, nenjinjile amachina kabili keindakano mumakhono. Nashio eshikulu shiali nishiakhanga omulilo.

¹⁶Ndahenga, ne nendola toto mwali nimwonoonele OMWAMI Nyasaye wenywe. Mwali nimukhayile okhutiila amalako aka OMWAMI Nyasaye wenywe yali niyamulachilisia, ne nimwikasiliye eshifwanani eshilonje shieing'ombe.

¹⁷Kho abwene yaho butswa ndasukuna hasi amachina kabili keindakano aka ndali nendilile mumakhono nekaara nimulolanga.

¹⁸“Mana khandi nengona hasi nefumamiye obweni bwanje hasi imbeli ewa OMWAMI Nyasaye shinga olwa ndali nekholile olwambeli khulwa tsinyanga amakhumi kane eshilo neshiteere; khutsinyanga etsio tsiosi shindaliakhwo eshindu kata okhunywakhwo amaatsi tawe. Ndakhola kano koosi shichila mwali nimwonoonele OMWAMI Nyasaye, naye natililwe oburuma.

¹⁹Ndaria liruma likhongo elia OMWAMI Nyasaye yali ninalio, shichila yali namusinyishile inywe okhushila, niyenyanga okhumumulula mwesi. Halali OMWAMI Nyasaye khandi yahulila amakhuwa kanje.

²⁰Ne OMWAMI Nyasaye khandi yatililwa Haroni oburuma niyenyanga okhumwira, kho khandi nesaayila Haroni khubise ebio.

²¹Mana nimbukula eshindu shiobwonooni eshio eshifwanani shieing'ombe eshia mwali nimulonjile eshio, neshisasaka nokhushisamba mumulilo, neshisia okhuula nishikwa obuusie obunyushe mana nesukuna obuusie obwo mumwalo kwarulanga mushikulu.

²²“Khandi olwa mwali Tabera, Masa nende Kibirotsi-hatava, mwasinyisia OMWAMI Nyasaye wenywe.

²³Khandi olwa OMWAMI Nyasaye yamuruma Kedeshibarinea naboola ari, ‘tikulushe mutsie mubukule eshialo shiandamuhelesia,’ mwakhaya okhuhulila lilakolie, nimulamusuubilila kata okhuhulila amakhuwake tawe.

²⁴Okhurula nemumanya, inywe mwaba butswa abakhayi bamalako aka OMWAMI Nyasaye.

²⁵“Kho nengona nefumamiye obweni bwanje hasi imbeli ewa OMWAMI Nyasaye khulwa tsinyanga amakhumi kane eshilo neshiteere, shichila OMWAMI Nyasaye yali naboolile mbu, atsitsanga okhumusasia mwesi pe.

²⁶Mana nesaaya khu OMWAMI Nyasaye nemboola endi, ‘Iwe, OMWAMI Nyasaye, Omwene Obunyali bwosi, shiolasasia abandubo aba wahonokosia nobarusia Misiri okhubirira mumaaniko nende obunyalibwo obukhongo tawe.

²⁷Yitsulila abakhalabanibo Aburahamu, Isaka nende Yakobo, ne shiolahenga khubukhayi, noho khubumayanu noho khubwonooni bwabandu bano tawe.

²⁸Abandu beshialo shia Misiri shiakhurulamwo bakhaboola mbu: OMWAMI Nyasaye yakhayilwe okhuusia abandube mushialo shia yabasuubia, yabarusia yino nabayila mushitsiimi okhubeerelamwo shichila yali niyabasira.

²⁹Ne kata kario nabandu aba waahula okhuba abandubo omwene, khandi abawarusia Misiri okhubirila mumaaniko nobunyalibwo obukhongo.’