Read wanga YOHANA 1 Bible Online

YOHANA 1 - wanga bible

YOHANA 1

¹Mukhuchaaka, Likhuwa yalinjiho, ne Likhuwa oyo yali halala nende Nyasaye, ne Likhuwa oyo yali Nyasaye.

²Okhurula mukhuchaaka Likhuwa oyo yalinjiho halala nende Nyasaye.

³Okhubirira muye, Nyasaye yalonga ebindu biosi, ne shibulaho eshindu kata shilala eshilaalongwa okhubirira muye tawe.

⁴Likhuwa oyo niye owali eshinoko shiobulamu, mana obulamu obwo nibureelera abandu obulafu.

⁵Obulafu obwo bwakhanga mushiilima, ne eshiilima shishinyala okhubwikalila okhwakha tawe.

⁶Nyasaye yaruma omundu owalangwa mbu, Yohana,

⁷owetsa okhuboolela abandu akobulafu obwo kho mbu, abandu boosi bahulile oburume obwo mana basuubile.

⁸Yohana oyo shiyali niye obulafu obwo ta, nebutswa yetsa mbu, aboole khukobulafu obwo.

⁹Obwo nibwo obwali obulafu obwatoto, obwetsa mushialo nibwashila abandu boosi.

¹⁰Likhuwa oyo yalinji mushialo, ne eshialo shialongwa okhubirira muye, nebutswa abeshialo shibamumanya tawe.

¹¹Yetsa mushialoshie shiene, nebutswa abali abebe beene shibamwinjisia tawe.

¹²Ne boosi abamwinjisia, nibamusuubilila, yabahelesia obunyali bwokhuba abaana ba Nyasaye.

¹³Abenabo shibayekhola okhuba abaana ba Nyasaye mumelo ndala yabandu bekholelangamwo okhuba abaana babandu tawe. Nyasaye mwene niye sabwe.

¹⁴Likhuwa oyo yekhola omundu ne namenya mwifwe, khwalola oluyalilwe, niyetsulemwo obukoosia nende obwatoto. Oluyali olwo nilwo olwa yanyoola shinga omwana omutelwa wa Samwana, ouli Nyasaye.

¹⁵Yohana yarumbula khuye naboola ari, “Uno niye owandaboolakhwo mbu, ‘Yetsanga inyuma wanje, nebutswa nomukhongo okhuushila isie, shichila yaranjilila okhubaho isie neshili okhwibulwa.’ ”

¹⁶Okhurula mumwitsulu mwobukoosiabwe yakhulaamila tsikhabi, ifwe fwesi nikhunyoola ikhabi okhumeeta khuyindi.

¹⁷Nyasaye yahaana amalako okhubirira mu Musa, nabwo obukoosia nende obwatoto nabihaana okhubirira mu Yesu Kristo.

¹⁸Abulakhwoho owalolakhwo Nyasaye ta, habula Omwanawe omutelwa, ouli shinga Nyasaye tsana, ne ali khulubafu lwa Samwana, niye owamufwimbuule namanyikha khwifwe.

¹⁹Abemilisi ba Abayahudi mu Yerusalemu baruma balala khubesaaliisi nende Abalawi khu Yohana okhumureeba bari, “Niwe wina?”

²⁰Naye Yohana shiyaloba okhukalusia ta, yeyama habulafu naboola ari, “Isie shindi nisie Kristo tawe.”

²¹Kho nibamureeba bari, “Kho niwe wina? Niwe Eliya noho?” Naye Yohana nakalusia naboola ari, “Tawe. Shiendi nisie Eliya ta.” Nibamureeba khandi bari, “Oli omulakusi noho?” Naye nabakaania ari, “Tawe!”

²²Nibamureeba bari, “Kho khuboolelekhwo mbu, niwe wina? Khukhoyile okhukalusilia abakhurumile likalusio. Omwene oboola mbu, niwe wina?”

²³Kho Yohana nabakalusia, khulwa okhubaboolela akomulakusi Isaya yali niyaboola, ari, “Isie nisie, ‘Omwoyo okwa oyo, oulanjilisinjia mushitsiimi mbu, Mukololosie injila eya Omwami abirilakhwo!’ ”

²⁴Abarume aba Abafarisayo abo bali nibarumilwe

²⁵okhureeba Yohana bari, “Noba nolali Kristo watsana ta, noho Eliya ta, noho kata omulakusi oyo ta, kho obatisiinjia abandu mbushiina?”

²⁶Naye Yohana nabakalusia naboola ari, “Isie embatiisinjia abandu namaatsi, ne aliho ousinjiile hakari mwinywe owamulamanyile tawe.

²⁷Naye niye ouletsa inyuma wanje, ne isie shingwanile kata okhuboholola tsikhoba tsiebilaarobie tawe.”

²⁸Amakhuwa ako koosi kekholeshela Betsania, ebukwe womwalo kwa Yorodani, ewa Yohana yali nabatiisinjia abandu.

²⁹Inyanga yalondakhwo, Yohana yalola Yesu niyetsanga wa yali, ne naboola ari, “Lole! Ouli shinga eshimeeme shielikondi shia Nyasaye, ourusiaho obwonooni bweshialo ngwoyo!

³⁰Omwenoyo niye owandaboolakhwo olwa ndaboola endi, ‘Aliho owitsanga munyuma wanje, ne nomukhongo muno okhuushila isie, shichila yalinjiho isie nishili okhwibulwa.’

³¹Nasi shindali nindamumanya mbu niwina ta, nebutswa ndetsa nimbatiisia namaatsi mbu, amanyishile abandu ba Isiraeli.”

³²Mana Yohana narumbula akobuloli naboola ari, “Ndalutsi Roho okhurula mwikulu niyekhanga shinga lihusi namuyeelakhwo.

³³Nasi nindalamanya mbu niye tawe. Nebutswa Nyasaye, owaruma okhubatiisia namaatsi, yali niyamboolela ari, ‘Olwa wakhalole Roho niyekhanga hasi nayeela khuye, omwenoyo niye oubatiisia nende Roho Omutakatifu!’

³⁴Isie emalile okhumulola, ne emuboolela mbu, niye Omwana wa Nyasaye.”

³⁵Inyanga yalondakhwo, Yohana yali nasinjiile halala nende babili bokhubeechibe.

³⁶Olwa yalola Yesu nabirangaho, yaboola ari, “Lole! Ouli shinga eshimeeme shielikondi shia Nyasaye, ngwoyo.”

³⁷Abeechi babili abo bamuhulila naboola ario, ne nibaloonda khu Yesu.

³⁸Yesu nashiukhana nalola nibamulondangakhwo, ne nabareeba ari, “Mukhaabanga shiina?” Nabo nibamukalusia bari, “Rabi[1], omenyile hena?”

³⁹Nababoolela ari, “Yitse mulole”. Kho nibatsia ninaye ne nibalola aha yali namenyile, nibahoonga ninaye inyanga eyo yosi, (tsiali ahambi tsisa ekhumi tsieshiteere).

⁴⁰Mulala khu abahulila aka Yohana yaboola ne nalonda khu Yesu yali Andereya, owali omusiani wabwe Simoni Petero.

⁴¹Yatsia bwangu nanyoola omusiani wabwe oulangwa mbu Simoni, ne namuboolela ari, “Khunyoolile Masihi[2].”

⁴²Mana nareera Simoni khu Yesu. Yesu namuhenga ne naboola ari, “Niwe Simoni omwana wa Yohana. Nebutswa bulano olalangwa mbu, Kefa.” (Nilio Petero mulugiriki, eshisina mbu, “olwanda.”)

⁴³Inyanga yalondakhwo, Yesu yalola mbu, nobulayi atsie Galilaya. Kho namunyoola Filipo ne namuboolela ari, “Nondakhwo”

⁴⁴Filipo oyo yarulanga mwitookho lia Betsisaida, ewa Andereya nende Simoni bali nibamenya.

⁴⁵Filipo naye natsia nanyoola Natsanieli namuboolela ari, “Khwamunyoolile omwene oyo owa Musa yahandikakhwo mushitabu shiamalako, khandi owabalakusi bahandikakhwo amakhuwake. Niye Yesu omwana wa Yosefu okhurula Nazareti.”

⁴⁶Naye Natsanieli namureeba ari, “Shilikhwoho eshindu shiosi shiosi eshilayi eshiakharula Nazareti?” Naye Filipo namukalusia naboola ari, “Yitsa olole.”

⁴⁷Ne olwa Yesu yalola Natsanieli niyetsanga, yaboola khuye ari, “Lole, Omuisiraeli watoto ngwoyo. Shialikhwomwo obubatsa bwosi bwosi tawe!”

⁴⁸Natsanieli namureeba ari, “Waamanya isie orie?” Naye Yesu namukalusia naboola ari, “Ekhuluutsi niwikhaale hasi womukhuyu, Filipo nashili okhukhulanga.”

⁴⁹Mana Natsanieli namukalusia naboola ari, “Omwechesia, toto oli Omwana wa Nyasaye! Niwe Omuruchi wa Isiraeli.”

⁵⁰Yesu naboola ari, “Osuubila shichila mbu, ekhubooleele mbu ekhuluutsi noli hasi womukhuyu? Witsa okhulola amakhongo kashilakhwo ako!”

⁵¹Mana nababoolela ari, “Emuboolela toto mbu, namulole likulu niliikushe ne abamalaika ba Nyasaye nibatikulukha nende okhwishila khu Omwana womundu.”