Read wanga YOHANA 10 Bible Online

YOHANA 10 - wanga bible

YOHANA 10

¹Yesu naboola ari, “Emuboolela toto mbu, omundu oulenjilila mushilibwa shieikhoonje yamakondi ta, ne naniina niyenjilila haundi, nomwifi khandi omunuuli.

²Nebutswa omundu owinjila nabirira mushilibwa, niye omwayi wamakondi.

³Omulindi weshilibwa, amwikulila eshilibwa niyenjila, nako amakondi kahulila omwoyokwe olwa akalanga ameera, nakayila okhwaya.

⁴Ne olwa aba nakarusiiye koosi elwanyi, akemililanga, nako kamulondakhwo, okhuba kamanya omwoyokwe.

⁵Shikanyala okhulonda butswa khumundu oundi omucheni tawe. Kalamwilukha, okhuba shikamanyile omwoyokwe tawe.”

⁶Yesu yababoolela oluchelo olwo, nebutswa shibamanyilisia eshisina shiamakhuwa ako tawe.

⁷Mana Yesu nababoolela khandi ari, “Emuboolela toto mbu, isie nisie eshilibwa shiamakondi.

⁸Ne abandi boosi abaaranjilila isie bali abefi khandi abanuuli, ne amakondi shikabahulila tawe.

⁹Isie nisie eshilibwa shiamakondi. Omundu yesi yesi owitsa nabirira khwisie, alahonibwa, alenjila khandi alarula, khandi alanyoola obwayilo.

¹⁰Omwifi yetsanga khulwa okhwiba, okhwira nende okhusasia khwonyene. Isie ndetsa mbu, munyoole obulamu, khandi mube ninabwo mubwitsulu.

¹¹“Isie nisie omwayi omulayi. Omwayi omulayi ahaananga obulamubwe khulwa amakondike.

¹²Nebutswa omwayi womurungo, oulali mwene amakondi ta, olwa alola lifunyisi niliitsanga yelukhanga nalekha amakondi, mana lifunyisi elo likakwakhwo nende okhukasalaasia.

¹³Omwayi womurungo oyo yelukhanga shichila nomwayi womurungo, ne khandi shiahendelanga amakondi tawe.

¹⁴Isie nisie omwayi omulayi. Ndamanya amakondi kanje, nako kamanya isie,

¹⁵shinga olwa Papa yamanya isie, ne nasi nimumanya Papa, nolwa amakondi kanje koosi kamanya isie, kho ndalahana obulamu bwanje khulwa amakondi ako.

¹⁶Ne kaliho amakondi kandi, akali akanje nebutswa shikali mukhoonje muno tawe. Okhuula ekakhung'asie koosi. Khandi koosi kalahulila omwoyo kwanje, ne kalaba lituuli elala elili nomwayi mulala yenyene.

¹⁷“Papa yaaheela isie, shichila ndafuchilila okhuhaana obulamu bwanje buno mbu, ebunyoole khandi.

¹⁸Abulaho omundu ounyala okhuurusiakhwo obulamu bwanje tawe. Ebuhaana mukhwenya khwanje omwene. Endi nobunyali bwokhubuhaana, khandi endi nobunyali bwokhububukula. Kano niko aka Papa wanje yandachilisia okhukhola.”

¹⁹Mana obwahukhani nibubaho khandi mu Abahudi, khulwa amakhuwa ka Yesu yali naboolile ako.

²⁰Abanji khubo baboola bari, “Ali neshishieno khandi nomulalu! Eshichila nimurecheresia akaboolanga nishina?”

²¹Nebutswa abandi khubo baboola bari, “Omundu ouli neshishieno shiyakhaboola ario ta! Eshishieno shinyala shirie okhukhola abandu ababofu okhulola?”

²²Mana lisabo liokhwitsulila okhwahulwa khwehekalu ya Yerusalemu okhuba indakatifu nilibaho mutsinyanga tsiomunyiri.

²³Naye Yesu yali nachendanga muhekalu, mushisika shia Solomoni.

²⁴Abayahudi nibakhung'ana aha yali, nibamureeba bari, “Olatsiililila okhukhulekha nikhukanakaninjia okhuula liina? Khuboolele habulafu, niwe Kristo watsana noho?”

²⁵Yesu nabakalusia naboola ari, “Ndamala okhumuboolela, nebutswa shimusuubilanga tawe. Akekholanga khulwa obunyali bwa Papa wanje nakobuloli khwisie.

²⁶Nebutswa inywe shimusuubilanga ta, okhuba shimuli amakondi kanje tawe.

²⁷Amakondi kanje karecheresinjia omwoyo kwanje, nasi ekamanyile, nako kanondangakhwo.

²⁸Ekahelesinjia obulamu bweinziayo, ne shikalifwa tawe. Shialiho kata mulala ounyala okhuunuula yatsia ninako tawe.

²⁹Papa wanje, owambelesia amakondi ako koosi nomukhongo okhushila boosi. Ne shialiho kata mulala ounyala okhukabukula okhurula mubulindi bwa Papa wanje tawe.

³⁰Papa ninasi, khuli eshindu shilala.”

³¹Abayahudi nibukula amachina mbu, bamulase.

³²Yesu nababoolela ari, “Ndakholile ebikhole ebilayi ebinji okhurula khu Papa. Kho neshileena khubio eshichila nimwenya okhundasa namachina?”

³³Nibakalusia nbamuboolela bari, “Shikhwenyanga okhukhulasa khulwa ebikhole ebilayi ta, habula khulwa okhunyeka Nyasaye! Iwe oli butswa omundu namundu, ne bulano oteemanga okhwikhola mbu, oli Nyasaye!”

³⁴Yesu nabakalusia naboola ari, “Shikahandikwa mumalako kenywe mbu, Nyasaye yaboola ari, ‘Inywe muli abanyasaye.’

³⁵Ne khumanyile mbu, aka Amahandiko kaboolanga nakatoto ebisoni nebisoni. Ne Nyasaye yalanga abandu abo mbu, abanyasaye, abandu abaheebwa oburumebwe.

³⁶Nasi, Papa yanzahula mana niyaruma mushialo. Kho nenywe mwakhaboola murie mbu, isie enyekanga Nyasaye shichila mbu, emboolile mbu, endi Omwana wa Nyasaye?

³⁷Nemba nindalakholanga aka Papa wanje yenyanga ta, kho shimulasuubila isie ta.

³⁸Nebutswa nemba nekakholanga, nenywe nimulasuubila isie ta, mukhoya okhusuubila akekholanga, kho mbu mumanyile elala mbu, Papa ali mwisie nasi endi mu Papa.”

³⁹Mana khandi nibateema okhutiila Yesu, nebutswa yarula mumakhono kabwe niyelukha.

⁴⁰Yesu yamala akalushe injelekha womwalo kwa Yorodani, aha Yohana yali nabatiisiliyenje abandu, ne namenyayo.

⁴¹Abandu abanji betsa khuye nibaboola bari, “Yohana shiyakhola ebikhole biamakana tawe, nebutswa aka yaboola khumundu uno koosi kali habwene.”

⁴²Mana abandu abanji ebweneyo nibasuubila muye.