Read wanga YOHANA 11 Bible Online

YOHANA 11 - wanga bible

YOHANA 11

¹Omundu undi yaliho owali omulwale owalangwa mbu Lazaro, owokhurula mwitaala lia Betsania, ewa Mariamu nende omukhaana wabwe mbu Maritsa bali nibamenya.

²Mariamu oyo niye owabakha amafura keshing'ari khubilenje ebia Omwami mana niyeeya ebilenje ebio neliswilie, naye Lazaro owali nalwala yali omusiani wabwe.

³Abakhaana babwe abo baruma amakhuwa khu Yesu nibaboola bari, “Omwami, omwitsawo owa waheela nomulwale.”

⁴Ne olwa Yesu yahulila amakhuwa ako, yaboola ari, “Obulwale obwo shibuleera Lazaro tawe, kano kekholeshe kho mbu, kareere oluyali khu Nyasaye, ne khandi yilaba injila eya Omwana wa Nyasaye alanyoolelamwo oluyali.”

⁵Yesu yali niyaheela Maritsa, Mariamu nende Lazaro.

⁶Kata kario olwa yahulila amakhuwa mbu Lazaro alwala, yashinda aha yali nali khulwa tsinyanga tsindi tsibili.

⁷Kho naboolela abeechibe ari, “Chende khukalushe mulukongo lwa Yudea.”

⁸Abeechibe abo nibamukalusia bari, “Omwechesia, nitsiyanga tsindiiti etsiabirile olwa Abayahudi babeele nibenya okhukhulasa namachina. Nawe khandi wenyanga okhukalukhayo?”

⁹Yesu nabakalusia naboola ari, “Eshiteere shishili netsisaa ekhumi natsibili? Shikali kario? Kho ouchenda mubulafu bweshiteere shialesichirala ta, okhuba alolanga obulafu bweshialo shino.

¹⁰Nebutswa naba nachenda mushilo yesichirala, okhuba shiali nobulafu tawe.”

¹¹Yesu yaboola ako, ne nameeta okhuboola ari, “Omwitsa wefwe Lazaro akonile tsindoolo, nebutswa ndalatsia okhumubuusia okhurula mutsindoolo.”

¹²Nabo Abeechi nibamukalusia bari, “Omwami, naba nakonanga alabuukha.”

¹³Yesu yechooma okhuboola toto mbu, Lazaro yali nafwile. Nebutswa abeechibe nibapaara mbu, aboolanga khuketsindoolo tsioburulanda.

¹⁴Kho Yesu namala nababoolela habulafu ari, “Lazaro afwile,

¹⁵ne khulwenywe esaangaalile shichila shindabeeleho ta, kho mbu musuubile. Habula chende khutsie ingowe.”

¹⁶Tomasi, owalangwa khandi mbu, Likhwana, naboolela abeechi bashie ari, “Chende khutsie fwesi halala nende omwechesia kho mbu, khufwe halala ninaye!”

¹⁷Ne olwa Yesu yolaho, yanyoola mbu, Lazaro yali niyakhamala mung'ani tsinyanga tsine.

¹⁸Okhurula Betsania okhuula Yerusalemu tsiali ahambi tsikilomita tsitaru.

¹⁹Nabo Abayahudi abanji bali nibetsile okhulola Maritsa nende Mariamu mbu babalemie omwoyo khulwa okhufwa khwomusiani wabwe.

²⁰Ne olwa Maritsa yahulila mbu Yesu yetsanga, yarula natsia okhumwakanila, naye Mariamu natong'a munzu.

²¹Maritsa naboolela Yesu ari, “Omwami, oba niwakhabeleho, khane omusiani wefwe shiyakhafwile tawe!

²²Ne emanyile mbu, kata bulano Nyasaye alakhuhelesia shiosi shiosi eshiomusaba.”

²³Yesu namuboolela ari, “Omusiani wenywe alalamukha.”

²⁴Maritsa nakalusia naboola ari, “Emanyile mbu, alilamukha khandi mubulamushi bwokhunyanga yobumalilishi.”

²⁵Yesu namuboolela ari, “Isie nisie obulamushi khandi obulamu. Omundu yesi yesi ousuubila mwisie, alaba omulamu kata naba nafwa.

²⁶Ne yesi yesi oumenya ne nasuubila mwisie, shialifwa tawe. Osuubila ako?”

²⁷Maritsa namukalusia ari, “Omwami Esuubila! Esuubile mbu niwe Kristo, Omwana wa Nyasaye, owabandu basuubisibwa mbu yakhetse mushialo.”

²⁸Olwa Maritsa yamala okhuboola amakhuwa ako, yatsia nalanga Mariamu omukhaana wabwe masiliisi, ne namuboolela ari, “Omwechesia yetsile ali hano, ne akhulanganga.”

²⁹Ne olwa Mariamu yahulila amakhuwa ako, yasinjila bwangu natsia okhumwakanila.

³⁰Yesu yali nashili okhuula mwitaala elo, yali nashili ahabali nibabukanile nende Maritsa.

³¹Olwa Abayahudi abali munzu nibaleminjia Mariamu omwoyo balola nasinjila bwangu natsia elwanyi, bamulondakhwo. Bapaara mbu, atsitsanga hang'ani okhwikhuula.

³²Olwa Mariamu yola aha Yesu yali nali ne namulola, yasikama habilenje bia Yesu namuboolela ari, “Omwami, olaba mbu, wabeele hano, omusiani wefwe shiyakhafwile tawe!”

³³Yesu yamulola niyekhuulanga, khandi nalola abandu bandi abaliho boosi nibekhuulanga. Yabeelela muno ne nanyakhana muno mumwoyokwe.

³⁴Kho nabareeba ari, “Nihena aha mwamuyabiile?” Nabo nibakalusia nibaboola bari, “Omwami, yitsa olole.”

³⁵Yesu nalila amasika.

³⁶Abayahudi nibaboola bari, “Lolekhwo shinga olwa yali niyamuheela!”

³⁷Nabo abandi nibaboola bari, “Yatiimbusia tsimoni tsiomubofu, shiyakhekaliile okhufwa khwa Lazaro ta?”

³⁸Yesu nashibeeleele mumwoyo, yatsia hang'ani eya bali nibareere lichina habwinjililo bwayo.

³⁹Yesu nababoolela ari, “Rusiekhwo lichina elo!” Maritsa, owali omukhaana wabwe omufu nakalusia naboola ari, “Omwami, bulano ahunya, shichila netsinyanga tsine okhurula nayabilwa!”

⁴⁰Yesu namuboolela ari, “Shiekhubooleele mbu, noba nosuubila, olalola oluyali lwa Nyasaye?”

⁴¹Mana nibarusiakhwo lichina elo. Yesu nahenga mwikulu, ne nasaaya naboola ari, “Papa, ekhupila orio muno shichila iwe umbulilanga.

⁴²Emanyile mbu, umbulilanga buli lwosi, nebutswa emboolanga kano khulwa abandu abali hano bano kho mbu, basuubile mbu, niwe owaruma.”

⁴³Olwa yali niyakhasaaya ario, yaboola nomwoyo omukhongo ari, “Lazaro, rula elwanyi!”

⁴⁴Mana Lazaro narula mung'ani omwo, amakhonoke nende ebilenjebie nibiboyilwe neyisanda, khandi naboyilwe eshitambaya mubwenibwe. Yesu nababoolela ari, “Muboholole mana muleshe atsie.”

⁴⁵Mana Abayahudi abanji abali nibetsile okhukoonya Mariamu, balola aka Yesu yali nakholile ako, ne nibasuubila muye.

⁴⁶Nebutswa abandi khubo batsia khu Abafarisayo ne nibababoolela aka Yesu yali nakholile.

⁴⁷Kho Abafarisayo nende abesaaliisi abakhulundu nibekhung'asia mushiina ne nibareebana bari, “Khukhole khurie? Lole, omundu uno akholanga akamakana amanji!

⁴⁸Nikhuba nikhumulekha mbu atsiililile ario, abandu boosi balamusuubilila, ne abaruchi beshialo shia Roma baletsa nende okhusasia Ihekalu yefwe halala nende lihanga liefwe!”

⁴⁹Mulala khubo, owalangwa mbu, Kayafa, owali nali omwisaaliisi omukhulundu muhekalu khumuyika okwo, naboola ari, “Inywe muli abayingwa murie!

⁵⁰Shimumanyilekhwo mbu nobulayi khwinywe omundu mulala okhufwila abandu abanji, okhushila lihanga liosi okhusikha ta?”

⁵¹Ne shiyaboola ako khululwe omwene ta, nebutswa shinga omwisaaliisi omukhulundu khumuyika okwo. Yali nalakulanga mbu, Yesu alafwila aboluyia lwa Abayahudi,

⁵²nende khandi okhukhung'asia halala abandu ba Nyasaye abasalaana boosi.

⁵³Okhuchaaka inyanga eyo, Abayahudi bakhaaba tsinjila tsiokhwira Yesu.

⁵⁴Khulweshio, Yesu shiyachenda mu Abayahudi habulafu ta, nebutswa yarulaho natsia ahambi mushitsiimi, mwitaala lilangwa mbu, Efuraimu, namenyayo nende abeechibe.

⁵⁵Ne inyanga yelisabo elia Pasaka yali niyili ahambi okhuula, mana abandu abanji nibarula nibatsia mwitookho lia Yerusalemu, khulwa okhuranjilila okhwisiiya inyanga ya Pasaka niyishili okhuula.

⁵⁶Bali nibakhaabanga Yesu, ne nibabreebana abeene khu beene nibasinjiile muhekalu bari, “Mupaara murie? Kalolekhanga mbu, shialetsa mwisabo tawe, noho?”

⁵⁷Abesaaliisi abakhulundu nende Abafarisayo bali nibalachilisiye mbu, omundu yesi yesi oumanyile aha Yesu ali abamanyie, kho mbu bamutiile.