Read wanga YOHANA 12 Bible Online

YOHANA 12 - wanga bible

YOHANA 12

¹Nitsishili tsinyanga tsisasaba okhuula khwisabo lia Pasaka, Yesu yatsia Betsania, ewabwe Lazaro, owa yali nalamusiye okhurula mukhufwa.

²Bamukaasiliayo eshiokhulia eshiokhubwile. Maritsa niye owabakhlabanila, naye Lazaro yali mulala khubekhala nibalia halala nende Yesu.

³Mana Mariamu nabukula eshimuka shiamafura akeshing'ari, akobukusi obweikulu muno, akakaasibwa okhurula khumisaala chieshing'ari eshilayi, nabakha khubilenje bia Yesu, ne nabieya neliswilie. Inzu yosi niyiitsulamwo eshiuya shiamafura ako.

⁴Mulala khubeechi ba Yesu, oweliira mbu, Yuda Isikarioti, owali natsia okhumukhoba naboola ari,

⁵“Nishiina eshichila amafura keshing'ari kano nikalakusibwa tsidinari ebikhumi bitaru mana amapesa ako kakabilwe abatakha?”

⁶Shiyaboola ako shichila mbu, yahendela abatakha ta, nebutswa shichila mbu, yali omwifi. Yachinganga omufuuko kwamapesa mana yabukulangakhwo niyekhoonyela omwene.

⁷Nebutswa Yesu yaboola ari, “Leshe omukhasi uno abe! Leshe akabiishe khulwa inyanga eyokhuyabilwa khwanje.

⁸Okhuba muli nabatakha buli lwosi, nebutswa isie shindalabetsanga ninenywe buli lwosi tawe.”

⁹Ne lwomukanda omukhongo kwa Abayahudi kwahulila mbu, Yesu ali Betsania, nibetsayo okhulola Yesu khandi nende okhulola Lazaro, owa Yesu yali nalamusiye okhurula mukhufwa.

¹⁰Mana abesaaliisi abakhulundu nibarechekha shinga olwa banyala okhwira Lazaro yesi.

¹¹Ne khulwa akali nikekholeeshe khuye, Abayahudi abanji, beyahula okhurula mubayahudi bashiabwe ne nibetsa nibasuubila mu Yesu.

¹²Inyanga yalondakhwo, omukanda omukhongo, okwali nikwitsile mwisabo lia Pasaka kwahulila mbu, Yesu yali niyetsanga Yerusalemu.

¹³Kho nibanoka amasaka kemishindu ne nibatsia okhumwakanila, nibayiba nibaboola bari, “Hosana! Noweikhabi owitsa muliira elia Omwami! Nyasaye amulaamile tsikhabi muliira elia Omwami! Nyasaye alaamile omuruchi wa Isiraeli tsikhabi!”

¹⁴Yesu yanyoola eshimoosi eshia Isishili, ne niyekhalakhwo shinga olwa Amahandiko kaboolanga kari,

¹⁵“Shiolaria ta, iwe litookho lia Zayuni, omuruchiwo ngwoyo yetsanga, naniinile khushimoosi eshia Isishili.”

¹⁶Mukhuchaaka, abeechibe shibamanyilisia eshisina shiamakhuwa ako tawe. Nebutswa olwa Yesu yali nalamusiibwe muluyali lwa Nyasaye, betsulila mbu, Amahandiko kaboola kario, mbu, ako kalikhola kario khuye khandi mbu, bali nibamukholeele akatsana ako.

¹⁷Abandu bali nibabeele nende Yesu, olwa yalanga Lazaro okhurula mung'ani namulamusia okhurula mukhufwa, bali nibakholile obuloli khu akali nikekholeeshe khu Lazaro.

¹⁸Ne eshifune shiachila omukanda omukhongo nikwitsa okhwakaanila Yesu shiali mbu, bali nibahuliile mbu, akholile eshilolelo shiakamakana eshio.

¹⁹Abafarisayo nabo nibaboola abeene khubeene bari, “Shinga olwa mulola, shikhunyala okhukhola eshindu shiosi shiosi tawe. Lole, abandu boosi barulile bamulondangakhwo!”

²⁰Abagiriki bandi bosi bali balala khu abali nibatsiile Yerusalemu, okhwinamila Nyasaye khunyanga yelisabo lia Pasaka.

²¹Kho nibatsia khu Filipo, omwechi warulanga Betsisaida mu Galilaya ne nibamuboolela bari, “Omwami, khwenya okhulola Yesu.”

²²Naye Filipo natsia naboolela Andereya, mana boosi babili nibatsia nibaboolela Yesu.

²³Yesu nabakalusia naboola ari, “Bulano eshise eshia Omwana womundu anyoolelamwo oluyali olukhongo shiakhoola.

²⁴Emuboolela toto mbu, imwo yeingano niyilakwa mwiloba yafwa ta, yibetsanga butswa yirio yonyene. Ne niyiba niyifwa, yamanga ingano inyinji.

²⁵Omundu yesi yesi ouheela obulamubwe omwene alabukosia, naye ousila obulamubwe omwene mushialo muno alaba ninabwo okhuula khubulamu bweinziayo.

²⁶Ne yesi yesi owenya okhuukhalabanila isie, okhuula yanondekhwo, ne ewa emba nendi, yesi khandi alabetsangaho. Naye Papa wanje alakoosia yesi yesi ouba niyakhalabanila.”

²⁷“Bulano omwoyo kwanje kunyakhananga. Kho nekhakhole shiina? Emboola endi, ‘Papa, olafuchilila ebise biokhuteemwa khwanje biola ta,’ noho? Nebutswa ako, niko akachila nenzitsa, kho mbu, enyalilwe okhubirira mukhunyakhana khwebise bino khuno.

²⁸Papa, omwene wihelesie oluyali!” Mana ebise ebio, omwoyo nikuhulilikha okhurula mwikulu nikuboola kuri, “Ndamala okhumuhelesia oluyali, khandi ndalameeta okhumuhelesia oluyali.”

²⁹Omukanda kwabandu okwali nikusinjiileho kwahulila omwoyo okwo, ne abandi khubo nibaboola mbu, nokhukukuma khwelikulu, nabo abandi nibaboola bari, “Omumalaika niye ouboolile ninaye.”

³⁰Mana Yesu nababoolela ari, “Omwoyo okwo shikuhuliliishe khulwa isie tawe, habula khulwa inywe.”

³¹“Eshise shino nishio eshieshialo okhukhalachilwakhwo eshiina, bulano omuruchi weshialo shino alaahulwa narusibwa khuburuchi.

³²Ne olwa emba nerusibwa khushialo nenjinguulwa ikulu khumusalaba, ndalareera abandu boosi khwisie.”

³³Yaboola ako khulwokhumanyia shinga lwokhufwakhwe khwitsa okhuba.

³⁴Nabo abomukanda abo nibamukalusia nibaboola bari, “Amalako kefwe kaboolanga mbu, Kristo alimenyaho inziayo. Kho nawe wakhaboola orie mbu, okhuula Omwana womundu achinguulwe ikulu? Omwana womundu tsana niwiina?”

³⁵Yesu nabakalusia naboola ari, “Obulafu bulaba mwinywe khulweshise shituutu butswa. Mutsiililile muluchendo lwenywe olwa mushilikhwo nobulafu, eshiilima shiakhetsukhana shiamunyoola, shichila ouchenda mushiilima shiamanyanga ewatsia tawe.

³⁶Olwa mushilikhwo nobulafu obwo musuubilile mubwo kho mbu, mube abandu bobulafu.” Olwa Yesu yamala okhuboola amakhuwa ako, yabebisakhwo ne narulaho natsia.

³⁷Kata olwa yali nakholile akamakana ako koosi nibalola, shibamusuubililamwo ta,

³⁸Kekholekha kario kho mbu, akomulakusi Isaya yarumbula koosibwe, olwa yaboola mbu, “Omwami, owasuubila oburume bwefwe niwiina? Ne niwiina owa Omwami yafwimbulila obunyalibwe?”

³⁹Khulweshio shibanyalilwa okhusuubila ta, okhuba Isaya khandi yaboola ari;

⁴⁰“Nyasaye yabofusia tsimoni tsiabwe, khandi natinyia amapaaro kabwe kho mbu tsimoni tsiabwe tsileshe okhulola, khandi amapaaro kabwe kaleshe okhumanyilisia. Nyasaye omwene aboola mbu; ‘Ndakhola kano kho mbu bangalushile mana embahonie’ ”

⁴¹Isaya yaboola kano shichila yalola oluyali lwa Yesu mana naboola khuye.

⁴²Kata kario, abemilisi abanji aba bayahudi basuubila mu Yesu; nebutswa khulwa okhuria Abafarisayo shibali abanyala okhukaboolakhwo habulafu ta, shichila bakhalondilwe okhurula musinagogi.

⁴³Bekhoyanga okhufuchililwa nabandu okhushila okhufuchililwa nende Nyasaye.

⁴⁴Yesu nalanjilisia nomwoyo omukhongo naboola ari, “Omundu yesi ousuubila mwisie, asuubilanga khandi mu oyo owaruma isie.

⁴⁵Naye yesi oundola isie, alolanga khandi oyo owaruma.

⁴⁶Isie ndetsa mbu embe obulafu mushialo, kho mbu yesi ousuubila mwisie aleshe okhutsiililila okhuba mushiilima.

⁴⁷Omundu yesi yesi ouhulila amakhuwa kanje, ne naloba okhukaloonda, isie shimukhalachila eshiina tawe. Okhuba shindayetsa okhukhalachila eshialo eshiina ta, habula okhushihonia.

⁴⁸Omundu yesi oundoba isie nende amakhuwa kanje, owokhumukhalachila eshiina aliho. Amakhuwa kene aka emuboolele niko akaliba omukhalachi weshiina khunyanga eyobumalilishi.

⁴⁹Okhuba shimboolanga khulwa obunyali bwanje mwene ta, habula Papa owaruma isie niye owandachilisia aka emboola nende shinga olwa emboola.

⁵⁰Nasi emanyile mbu, lilakolie lireeranga obulamu obulahwaho ta. Khulweshio, emboolanga aka Papa yandachilisia okhuboola.”