Read wanga YOHANA 13 Bible Online

YOHANA 13 - wanga bible

YOHANA 13

¹Bulano yali niyishile inyanga ndala okhuula khunyanga yelisabo lia Pasaka. Yesu yamanya mbu eshiseshie shiokhurula mushialo nakalukha ewa Samwana shiulile. Yali niyaheela abo abali mushialo abali abebe, ne yali niyabaheelela elala.

²Yesu nende abeechibe bali nibaliitsanga eshiokhulia eshia hamukoloba. Setani yali namalile okhura mu Yuda, omwana wa Simoni Isikarioti amapaaro kokhukhoba Yesu.

³Yesu yamanya mbu, yahebwa obunyali bwosi nende Nyasaye khandi yarula khu Nyasaye, ne akalukhanga khu Nyasaye.

⁴Kho yasinjila, nafwalula ikanzuye nachira hasi, ne niyebohela itawulo mushishienjeshie.

⁵Mana natsukha amaatsi khulukaraya, ne nachaaka okhwosia ebilenje biabeechibe. Nabieya neyitawulo eya yali niyebohele mushishienje eyo.

⁶Mana niyola khu Simoni Petero, ne Simoni namuboolela ari, “Omwami, toto mwene wenyanga okhwosia ebilenje bianje?” .

⁷Yesu namukalusia ari, “Iwe shionyala okhumanya bulano eshia isie ekholanga ta, habula olamanyilisia olunyuma.”

⁸Petero naboola ari, “Shikanyalikha kata nahatuutu iwe okhwosia ebilenje bianje tawe!” Yesu namukalusia ari, “Nindalakhwosia ebilenjebio ta, kho shiolaba omwechi wanje khandi tawe.”

⁹Simoni Petero namukalusia ari, “Omwami, olanzosia butswa ebilenje bionyene ta! Habula wunzosie amakhono nende omurwe.”

¹⁰Yesu naboola ari, “Omundu yesi yesi oumalile okhwisinga abetsanga nalabiile elala, ne shiakhoyile okhwisinga khandi ta, habula okhwosia ebilenjebie bionyene. Inywe mwesi muli abasiiyikhu halali mulala khwinywe shiali omusiyikhu tawe.”

¹¹Yesu yali namanyile owali natsia okhumukhoba; nishio eshiachila naboola mbu, “Mwesi shimuli abasiiyikhu ta.”

¹²Olwa Yesu yali niyakhoosia ebilenje biabeechibe boosi, yefwale ikanzu mana nakalukha niyekhala. Ne nabareeba ari, “Mumanyile eshiandakhakhola khwinywe bulano?

¹³Munanganga isie mbu, Omwechesia khandi mbu Omwami, ne muli habwene, okhuba nolwa endi.

¹⁴Kho nikaba isie ouli Omwami khandi Omwechesia wenywe, ndakhosia ebilenje bienywe, mwesi khandi, mukhoyile okhwosanie ebilenje murio.

¹⁵Ekholile eshia mukhoyile okhulolelakhwo, kho nenywe mwesi mukhole murio shinga olwa emukholeele.

¹⁶Emuboolela toto mwene mbu, abulaho omukhabani ouli omukhongo okhushila omwamiwe tawe, khandi shialikhwoho omurumwa ouli omukhongo okhushila owamuruma tawe.

¹⁷Ne okhuba inywe bulano mumanyile amakhuwa kano, mulaba abeikhabi nimuba nimukakhola.

¹⁸“Shimboolanga khukenyu mwesi ta, isie emanyile abo abandalobola. Nebutswa Amahandiko okhuula kosibwe akaboolanga mbu, ‘Omundu owandalia ninaye ebiokhulia bianje niye oungalukhanekhwo.’

¹⁹Isie emuboolela kano nikashili okhwikhola, mbu olwa kaba nikakhekholekha, mulasuubila mbu, ‘Isie Nisie.’

²⁰Emuboolela toto mwene mbu, owinjisia omundu yesi yesi owa isie eruma, yanzinjisia isie, ne owinjisia isie amwinjisia oyo owaruma isie.”

²¹Olwa Yesu yamala okhuboola amakhuwa ako, yanyakhana muno mumwoyokwe, ne naboola habulafu ari, “Emuboolela toto mbu, mulala khwinywe alakhoba isie.”

²²Abeechibe nibahengana abeene khubeene nibahuka muno, nibalamanya owa yali naboolangakhwo tawe.

²³Mulala khubeechi abo, owa Yesu yali niyaheela muno, yali niyekhaale ahambi nende Yesu.

²⁴Simoni Petero namukhomola ne namuboolela ari, “Muureebe mbu niwiina owaboolangakhwo.”

²⁵Kho omwechi oyo nasita ahambi khu Yesu, mana namureeba ari, “Omwami, niwiina owoboolangakhwo?”

²⁶Naye Yesu namukalusia ari, “Owa ndalahelesia eshitonye shiomukaate eshietonjile mushikaye, niye omwene oyo.” Mana nabukula eshitonye shiomukaate, natong'a mushikaye ne nahelesia Yuda, omwana wa Simoni Isikarioti.

²⁷Ne olwa Yuda yalia eshitonye shiomukaate eshio, Setani yamwinjilamwo. Kho Yesu namuboolela ari, “Khola bwangu elia wenya okhukhola!”

²⁸Abulaho khu abali nibaliitsanga ebiokhulia abo, owamanyilisia eshiachila Yesu namuboolela ario tawe.

²⁹Ne shichila mbu, Yuda niye owachinganga omufuko kwamapesa, balala khubeechi bapaara mbu, Yesu yali namubooleele okhutsia okhukula ebienyekha khulwa lisabo, noho okhuhaanakhwo eshindu khubamanani.

³⁰Olwa Yuda yamala okhulia eshitonye shiomukaate eshio, yarula lwangu natsia elwanyi. Ne shiali eshilo.

³¹Olunyuma lwa Yuda okhutsia, Yesu yaboola ari, “Bulano oluyali olwa Omwana womundu lulafwimbulwa, nalwo oluyali lwa Nyasaye lufwimbuliilwe muye.

³²Ne oluyali lwa Nyasaye niluba nilufwimbulilwa muye, kho Nyasaye alafwimbulila oluyali olwa Omwana womundu muye omwene, ne alakhola ario lwangu.

³³Baana banje, shienzia okhuba ninenywe eshise eshiraambi tawe. Mulakhaaba, nebutswa emuboolela bulano akandaboolela abemilisi ba Abayahudi endi, ‘Shimunyala okhutsia aha isie enzitsanga tawe.’

³⁴Ne bulano emuhelesia inywe lilako liyia mbu, muheelanenje abeene khubeene. Shinga olwa isie ndamuheela inywe, kho nenywe okhuula muheelanenje abeene khubeene.

³⁵Nimwakhaheelana abeene khubeene, abandu boosi balamanya mbu, muli abeechi banje.”

³⁶Simoni Petero nareeba Yesu ari, “Omwami, otsitsanga hena?” Yesu namukalusia naboola ari, “Shionyala okhunondakhwo bulano ewa isie enzitsanga tawe, nebutswa olunyumakhwo olanondakhwo.”

³⁷Petero namureeba ari, “Omwami, nishiina eshichila endeshe okhukhulondakhwo bulano? Isie ndirecheeshe okhufwa khulwa iwe!”

³⁸Yesu namureeba ari, “Iwe toto wirecheshe okhufwa khulwanje? Ekhuboolela toto mbu, itaywa niyishili okhulakula, olaba niunzikaanile akhandi khataru.”