Read wanga YOHANA 14 Bible Online

YOHANA 14 - wanga bible

YOHANA 14

¹Yesu yaboolela abeechibe ari, “Muleshe okhubeyabeya nende okhuhenda emioyo chienywe. Suubile mu Nyasaye khandi musuubile mwisie.

²Munzu mwa Papa wanje, mulimwo ebimenyo ebinji, okhuba enzitsanga okhumukaasilia habundu. Nikalakhabeele kario ta, shindakhamubooleele ako tawe.

³Olwa ndakhabe nenziile, khandi nebakaasiliye eshimenyo, ndakhakalushe okhumwenda inywe kho mbu, mwesi mube aha endi.

⁴Inywe mumanyile injila eyitsia aha isie enzitsanga.”

⁵Tomasi namureeba ari, “Omwami, shikhumanyile ewa otsitsanga tawe. Kho khwakhamanya khurie injila eyitsiayo?”

⁶Yesu namukalusia naboola ari, “Isie nisie injila, abwatoto khandi obulamu. Abulaho ounyala okhutsia khu Papa nalabiriire khwisie tawe.

⁷Nimwakhabeele mbu, mwamanya isie, mwakhabeele nimwamanya Papa wanje. Ne okhuchaaka bulano, mumumanyile khandi mumuluutsi.”

⁸Filipo namuboolela ari, “Omwami, khumanyie Papa tsana oyo, elo nilio eliakhwenya lionyene.”

⁹Yesu namukalusia naboola ari, “Filipo, ndabelenje ninenywe khulwa oluhoono olurambi, ne khane shiwumanyile tawe? Omundu yesi yesi oundola isie, alutsi Papa. Kho nishiina eshichila noboola mbu, ‘Khumanyie Papa?’

¹⁰Filipo, shiosuubilanga mbu isie endi mu Papa, naye Papa ali mwisie ta?” Yesu naboolela abeechibe ari, “Amakhuwa kandamuboolela inywe, shinakanje tawe. Papa ouli mwisie, niye oukholanga emilimochie omwene.

¹¹Musuubile mbu, Isie endi mu Papa naye Papa ali mwisie.

¹²Emuboolela toto mbu, omundu yesi yesi ousuubila mwisie, yesi alakhola aka isie ekholanga. Khandi anyala okhukhola kata amakhongo okhushila kano, shichila enzitsanga khu Papa.

¹³Ne ndalakhola likhuwa liosi liosi eliamulasaba muliira lianje kho mbu, oluyali lwa Papa lulolesibwe okhubirira mu Omwana.

¹⁴Nimuba nimusaba eshindu shiosi shiosi muliira lianje, ndalashikhola.

¹⁵“Nimuba nimuuheela, mulakhola kamalako kanje kenya.

¹⁶Nasi ndalasaba Papa, naye alamuhelesia Omuhabini undi, oulabetsanga ninenywe buli lwosi.

¹⁷Niye Roho oufwimbulilanga abandu obwatoto bwa Nyasaye. Abomushialo shibanyala okhumwinjisia ta, okhuba shibanyala okhumulola kata okhumumanya tawe. Nebutswa inywe mwamumanya, okhuba amenyanga ninenywe khandi ali mwinywe.

¹⁸“Olwa enzia, shindalamulekha butswa shinga ababisandu tawe, ndalakalukha khandi khwinywe.

¹⁹Khulwa eshise shitiiti, abomushialo shinibandolekhwo khandi ta, nebutswa inywe namundole. Ne khulwa okhuba isie endi omulamu, mwesi khandi mulaba abalamu.

²⁰Ne khunyanga eyo, mwakhamanye toto mbu, endi mu Papa wanje, khandi mbu inywe muli mwisie shinga olwa nasi endi mwinywe.

²¹“Omundu yesi yesi oufuchilila amalako kanje nakakhola, niye owaheela isie. Naye Papa wanje alaheela oyo owaheela isie, nasi siesi ndalamuheela owatsana oyo nindifwimbula khuye.”

²²Yuda (oulali Yuda Isikarioti ta) namureeba ari, “Omwami, kanyalikha karie mbu, iwe wifwimbule omwene khwifwe, ne nolefwimbula khubomushialo ta?”

²³Yesu namukalusia ari, “Omundu yesi yesi ouheela isie alakhola akamechesio kanje kaboola. Naye Papa wanje alamuheela, khandi khuletsa nende Papa wanje khuye mana khumenye ninaye.

²⁴Omundu yesi yesi oulaheela isie ta, shiahulilanga amechesio kanje tawe. Nako amechesio akamwahuliile khwisie shikali akanje ta, nebutswa karulanga khu Papa, owaruma isie.

²⁵“Isie emubooleele ako olwa eshili ninenywe.

²⁶Omuhabini, ouli Roho Omutakatifu, owa Papa alaruma muliira lianje, alamwechesia amakhuwa koosi mana khandi alamwitsusia koosi akandamuboolela inywe.

²⁷“Omulembe nikwo kwemuleshela. Emuhelesia omulembe kwanje. Shiekuhaananga shinga olwa eshialo shikuhaananga khubandu tawe. Mulahenda emioyo noho okhubeelela tawe, khandi mularie tawe.

²⁸Mwahuliile nimuboolela mbu, ‘Enzitsanga, nebutswa ndalakalukha khwinywe khandi.’ Nimuba nimwaheela isie, mwakhekhoyile, okhuba enzitsanga ewa Papa, shichila ye nomukhongo okhushila isie.

²⁹Emubooleele ako nikashili okhwikholekha kho mbu, olwa kaba nikekholeeshe, musuubile mbu akemubooleele nakatoto.

³⁰Shindalaboola ninenywe khulwa oluhoono olurambi ta, shichila omuruchi weshialo shino yetsanga, ne shiali nobunyali khwisie tawe.

³¹Nebutswa abomushialo okhuula bamanye mbu, ndamuheela Papa, niko akachila nekholanga koosi akayandaka okhukhola.” Chende bulano khurule habundu hano.