Read wanga YOHANA 15 Bible Online

YOHANA 15 - wanga bible

YOHANA 15

¹“Isie nisie omutsabibu kwatoto, naye Papa wanje niye omukholi womumukunda wakwo.

²Aremanga buli lisaka mwisie elilamanga ebiamo ta, ne akhalilanga buli lisaka eliamanga ebiamo kho mbu, libe lilayi nilimeeta okhwama ebiamo ebinji.

³Ne inywe bulano mumalile okhusiiywa khulwa amechesio ka ndamwechesiye.

⁴Mumenyenje mwisie, nasi ndalamenya mwinywe. Lisaka shilinyala okhwama ebiamo khubwalio lionyene tawe, habula liamanga nilishili khumutsabibu. Munjila ndala yene eyo, inywe shimunyala okhwama ebiamo nimulamenya mwisie tawe.

⁵“Isie nisie omutsabibu, nenywe ninywe amasaka. Omundu yesi yesi oumenya mwisie, nasi nimenya muye, alama ebiamo ebinji, shichila shimunyala okhukhola eshindu shiosi shiosi nimulamenya mwisie tawe.

⁶Omundu yesi yesi oulamenya mwisie ta, alasukunwa elwanyi shinga lisaka ne naniala. Amasaka shinga kano kakhung'asibwa nikasukunwa mumulilo nikasaambwa.

⁷Nimuba nimumenya mwisie, nako amakhuwa kanje nikamenya mwinywe, mulasaba eshindu shiosi shiosi ne mulahebwa.

⁸Oluyali lwa Papa wanje lulolesibungwa ninenywe khulwa inywe okhwama ebiamo ebinji, ne munjila yino mwikhola abeechi banje.

⁹Shinga olwa Papa yaaheela isie, nolwa siesi ndamuheela inywe, kho mumenye mubuheeli bwanje.

¹⁰Nimuba nimukhola kamalako kanje kenya, mulamenya mubuheeli bwanje, shinga olwa siesi ekholanga kamalako ka Papa yenya mana emenyanga mubuheelibwe.

¹¹“Emubooleele amakhuwa ako kho mbu, omwikhoyo kwanje kube mwinywe khandi mbu, okhwikhoya khwenywe khube okhwitsuule.

¹²Lilako lianje khwinywe ndielino mbu muheelanenje abeene khu beene, shinga olwa isie ndamuheela inywe.

¹³Obuheeli obukhongo bwomundu akhoyile okhuba ninabwo khubetsabe, nokhuhaana obulamubwe khulwa bo.

¹⁴Ne inywe muli abetsa banje nimuba nimukhola aka emulaka.

¹⁵Isie shiemulanga inywe khandi mbu abasumba ta, shichila omukhabani shiamanyanga akomwamiwe akholanga tawe. Habula emulanga inywe mbu abetsa, shichila ndamuboolela amakhuwa koosi akandahulila okhurula khu Papa wanje.

¹⁶Inywe shimwayanzahula ta, habula nisie owamwahula inywe ne nimuraho mbu, mutsie mwame ebiamo ebinji, ebimenya inziayo. Mana Papa alamuhelesia inywe liosi liosi elia mumusaba muliira lianje.

¹⁷Kho bulano emulaka inywe mbu, muheelanenje abeene khu beene.”

¹⁸“Abomushialo nibaba nibamusila, mwitsulile mbu, baranjilila okhuusila isie.

¹⁹Nimwakhabeele abomushialo, khane abomushialo bakhamuheelile shinga abashiabwe. Nebutswa ndamwahula okhurula mushialo shino, khulweshio, shimuli abomushialo shino ta, niko akachila abomushialo nibamusila inywe.

²⁰Mwitsulile amakhuwa kanje aka ndamuboolela endi, ‘Omusumba shiabetsanga omukhongo okhushila omwamiwe tawe.’ Abandu nibaba nibaasandia isie, mwesi khandi balamusandia. Nibaba nibahulila amechesio kanje, khandi balahulila amechesio kenywe.

²¹Nebutswa balamukholela ako koosi shichila muli abeechi banje, balamukholela bario okhuba shibamanyile owaruma isie tawe.

²²Shibakhabeleekhwo neshikha shiobwonooni ta, nikakhabeele mbu, shindayetsa nimboola ninabo ta, nebutswa shinga olwa kali bulano, shibalikhwo nende eshia babeyela khulwa obwonooni bwabwe tawe.

²³Omundu yesi yesi owaasila isie, yasila kata nende Papa wanje.

²⁴Shibakhabeelekhwo neshikha shiobwonooni ta, nikakhabeele mbu, shindakhola emilimo mubo echia oundi yesi alaakholakhwo ta, nebutswa shinga olwa kali bulano, balola aka ndakhola, ne nibaasila isie halala nende Papa wanje.

²⁵Kata kario okhuula ako kekholeshe kho mbu, akahandikwa mumalako kabwe koosibwe mbu, ‘Baasila butswa ahalali eshifune shiosi shiosi tawe.’

²⁶“Ne omuhabini oyo aletsa, naye niye Roho, oufwimbulilanga abandu obwatoto bwa Nyasaye, khandi arulanga khu Papa. Ndakhamurume okhwitsa khwinywe okhurula khu Papa, naye yakhakhole obuloli khwisie.

²⁷Khandi mwesi muli abaloli khwisie, okhuba mwabelenje ninasi okhurula mukhuchaaka.”