Read wanga YOHANA 16 Bible Online

YOHANA 16 - wanga bible

YOHANA 16

¹“Emubooleele ako kho mbu, muleshe okhwisichirala mubusuubili bwenywe.

²Bakhamulonde okhurula mutsisinagogi, khandi ebise bitsanga ebia omundu yesi yesi oumwira inywe, alapaara mbu akhalabanilanga Nyasaye.

³Abandu balamukholela inywe ako koosi shichila shibamanyile Papa, kata isie tawe.

⁴Nebutswa emubooleele ako, kho mbu olwa ebise biabwe biula ebia okhumukholela inywe ako, mwakhetsulile akandamuboolela. “Shindamuboolela amakhuwa ako okhurula mukhuchaaka ta, shichila ndali ninenywe.

⁵Ne bulano enzia khu oyo owaruma. Ne shialikhwoho kata mulala khwinywe oureebanga isie aha enzitsanga tawe.

⁶Ne okhuba mbu, emubooleele amakhuwa ako, emioyo chienywe chibeeleele.

⁷Nebutswa isie emuboolelanga akatoto mbu, nobulayi muno isie okhutsia, okhuba nindalatsia ta, Omuhabini oyo shialetsa khwinywe tawe. Nebutswa ninzia, ndalamuruma khwinywe.

⁸Ne olwa aba niyetsile, alamanyia abandu abomushialo mbu, nabamayanu khulwa obwonooni bwabwe, nende khukobulunjishi, halala nende khukobukhalachi bwa Nyasaye.

⁹Nabamayanu khulwa akobwonooni, shichila shibasuubilanga isie tawe.

¹⁰Nabamayanu khukobulunjishi, shichila enzia ewa papa, ne shimulandolakhwo khandi tawe.

¹¹Nabamayanu khukobuchalachi, shichila omuruchi weshialo shino amalile okhuyaasibwa nakhalachilwa eshiina.

¹²“Isie endi namakhuwa amanji akokhumuboolela, nebutswa bulano shimunyala okhukefwila tawe.

¹³Ne olwa Roho oufwimbulanga obwatoto bwa Nyasaye alitsa, yakhamwimilile mubwatoto bwosi. Shiyakhaboole khulwa obunyalibwe omwene ta, habula yakhaboole aka yahulila khandi yakhamuboolele khuketsanga.

¹⁴Yakhambelesie isie oluyali, shichila yakhabukule akemuboolela, ne namuboolela inywe.

¹⁵Koosi aka Papa ali ninako nakanje, niko akachila nimboola mbu, Roho alabukula akemuhelesia naye namuboolela inywe.

¹⁶“Mushise shituutu shinamundolekhwo isie khandi ta, ne olunyuma lweshise shituutu, mulandola khandi.”

¹⁷Balala khubeechibe nibareebana abeene khubeene bari, “Eshisina shiamakhuwa ako nishiina? Akhuboolelanga mbu mushise shituutu shinakhumulole ta, khandi mbu, olunyuma lweshise shindi shituutu nakhumulole. Khandi aboolanga ari, ‘Kali kario shichila enzitsanga ewa Papa.’

¹⁸Eshisina shiamakhuwa mbu, ‘Mushise shituutu,’ nishiina? Shikhumanyile eshisina shiamakhuwa ako tawe!”

¹⁹Yesu yamanya mbu benyanga okhumureeba, kho nababoolela ari, “Isie emubooleele endi, ‘Mushise shituutu shinamundole tawe, khandi mbu, mushise shindi shituutu namundole.’ Ako niko akamureebananga abeene khubeene?

²⁰Emuboolela toto mbu, namulile amasika khandi namwikhuule, nebutswa abomushialo balekhoya. Mulabeelela, nebutswa eshibeela shienywe shilakalukhana nishikwa omwikhoyo.

²¹Olwa omukhasi alumungwa inzibula, abeelelanga shichila eshiseshie shiokhulumwa shibetsanga nishiulile. Nebutswa lwomwana yebulwa, ne yebilila okhulumwakhwe okhwo, okhuba abetsanga niyekhoya mbu, omwana yebuulwe mushialo.

²²Nolwa kali kario ninenywe. Bulano mubeeleele, nebutswa ndakhamulole khandi, mana emioyo chienywe chiakhekhoye, ne shialiho owakhamuyiniekhwo omwikhoyo kwenywe okwo tawe.

²³“Olwa inyanga eyo yakhoole, shimwakhaareebekhwo likhuwa liosi liosi tawe. Emuboolela toto mbu, Papa alamuhelesia shiosi shiosi eshia mulamusaba muliira lianje.

²⁴Okhuula bulano mushili okhusabakhwo eshindu shiosi shiosi muliira lianje ta. Sabe ne mulanyoola, kho mbu obusangaafu bwenywe bwitsule.

²⁵“Isie emubooleele amakhuwa ako koosi mutsinjelo. Nebutswa ebise bitsanga, ne shindakhamuboolele mutsinjelo khandi ta, habula ndakhamuboolele habulafu khu aka Papa.

²⁶Olwa inyanga eyo yakhoole, mwakhasabe muliira lianje. Ne shiemuboolela inywe mbu, ndalamusabila khu Papa tawe.

²⁷Okhuba Papa mwene yamuheela inywe. Yamuheela inywe shichila inywe mwaheela isie, khandi mwasuubila mbu ndarula khu Nyasaye.

²⁸Isie ndarula khu Papa, ne ninditsa mushialo, bulano isie erulanga mushialo ne enzitsanga khu Papa.”

²⁹Mana abeechibe nibamuboolela bari, “Bulano oboolanga amakhuwa habulafu, shioboolanga mutsinjelo tawe.

³⁰Khumanyile bulano mbu, iwe wamanya amakhuwa koosi, shiokhoyile okhureebwa amareebo tawe. Ako niko akachilanga nikhusuubila mbu, iwe warula khu Nyasaye.”

³¹Yesu nabakalusia ari, “Bulano musuubile?

³²Ebise bitsanga, ne bimalile okhuula, olwa mulasalaasibwa mwesi, buli mundu natsia mwitaalalie, nasi ndalatong'a sienyene. Ne shiendi sienyene ta, shichila Papa ali halala ninasi.

³³Isie emubooleele ako, kho mbu nimuli halala ninasi, mube nomulembe. Abomushialo balamusandia, nebutswa mube abeitswoni! Isie emalile okhuhula eshialo.”