Read wanga YOHANA 17 Bible Online

YOHANA 17 - wanga bible

YOHANA 17

¹Olwa Yesu yali namalile okhuboola amakhuwa ako, yahenga ikulu mwikulu ne naboola ari, “Papa, eshise shimalile okhuula. Helesia omwanawo oluyali, kho naye akhuhelesie iwe oluyali.

²Iwe wamuhelesia obunyali khubandu boosi, kho mbu naye ahaane obulamu obulahwaho ta khwabo aba wamuhelesia boosi.

³Ne obulamu obulahwaho ta obwo, nibwo okhukhumanya iwe, ouli Nyasaye watoto wenyene, nende okhuumanya isie, Yesu Kristo owa iwe waruma.

⁴Isie emalile okhumanyia eshialo oluyalilwo, ndamalile emilimo echia wambelesia okhukhola.

⁵Papa, bulano mbelesia oluyali imbeliwo, oluyali lwene olwa ndali ninalwo ninawe eshialo nishishili okhulongwa.

⁶“Isie ndakhukholile iwe okhumanyikha khwabo aba iwe wambelesia mushialo. Bali abobo ne niumbelesia isie. Bahulilanga likhuwalio,

⁷Khandi bulano bamanyile mbu, koosi akawambelesia karulanga khwiwe.

⁸Ndabahelesiye oburume obwa wambelesia, nabo nibabufuchilila. Bamanyiile elala mbu, toto isie ndarula khwiwe, khandi basuubiile mbu, niwe owaruma.

⁹“Isie ebasaayila, ne shiesaayilanga abomushialo ta, habula aba wambelesia shichila nabobo.

¹⁰Boosi aba endi ninabo nabobo, nabo boosi aba oli ninabo nabanje, nalwo oluyali lwanje lulolekhanga okhubirira mubo.

¹¹Bulaano isie nditsanga khwiwe, shieshili mushialo ta, nebutswa bo bali mushialo. Papa Omutakatifu, khulwa obunyali bweliiralio, elia wambelesia obalide, mbu babe eshindu shilala shinga olwa isie ninawe khuli mulala.

¹²Olwa ndali neshili ninabo, ndabalinda obulayi khulwa obunyali bweliralio, elia wambelesia. Isie ndabalinda obulayi, ne abulaho kata mulala khubo owakora ta, habula omwana wobukori oyo, kho mbu Amahandiko koosibwe.

¹³Ne bulano nditsanga khwiwe, ne emboola amakhuwa kano mushialo kho mbu, babe nomwikhoyo kwanje okwitsuule mumioyo chiabwe.

¹⁴Isie ndabahelesia likhuwalio, nebutswa abomushialo babasila, okhuba shibali abomushialo ta, shinga olwa isie siesi ndalali owomushialo tawe.

¹⁵Shiesaayanga mbu, obarusie mushialo ta, habula mbu, obalinde obulayi okhurula khu Omubi oyo.

¹⁶Shinga olwa isie ndalali owomushialo ta, kho boosi khandi shibali abomushialo tawe.

¹⁷Obaahule, babe abobo mubwatoto. Likhuwalio, nobwatoto.

¹⁸Isie ebaruma mushialo shinga olwa iwe waaruma isie mushialo.

¹⁹Ne khulwabo, isie mwene ndihaananga khwiwe kho mbu, nabo khandi behaanile elala khwiwe mubwatoto.

²⁰“Shiesaayila bano bonyene ta, habula esaayila khandi boosi abasuubila mwisie okhubirira muburume obwa barume bano.

²¹Esaaya mbu, boosi babe eshindu shilala. Papa, chama mbu, boosi babe mwifwe, shinga olwa iwe oli mwisie nasi mwiwe. Boosi babe mubulala kho mbu, abomushialo basuubile mbu toto waaruma isie.

²²Oluyali olwa wambelesia, nilwo olwa siesi khandi ndabahelesia, kho mbu, babe eshindu shilala shinga olwa isie ninawe khuli mulala.

²³Isie embe mubo nawe obe mwisie, kho mbu, babe toto eshindu shilala, kachile abomushialo bamanye mbu, niwe owaaruma khandi mbu, wabaheela shinga olwa waaheela isie.

²⁴“Papa, enzenya mbu, aba wambelesia, babe ninasi ewa endi, kho mbu, balole oluyali lwanje, oluyali lwene olwa wambelesia. Okhuba waaheela isie eshialo nishishili okhulongwa.

²⁵Papa omulunjishi, abomushialo shibakhumanyile iwe ta, nebutswa isie ndakhumanya, ne bano bamanyile mbu, niwe owaaruma.

²⁶Isie ndakhukholile iwe okhumanyikha khubo, ne ndalatsiililila okhukhola endio kho mbu, obuheelibwo khwisie, bube mubo, nasi siesi khandi embe mubo.”