Read wanga YOHANA 18 Bible Online

YOHANA 18 - wanga bible

YOHANA 18

¹Olwa Yesu yali namalile okhusaaya ario, yarula nabeechibe nibatsia injelekha womwalo kwa Kidironi. Ebweneyo omukunda kwaliyo, ne nibenjilamwo.

²Naye Yuda owamukhoba, yali niyamanya omukunda okwo, shichila Yesu yaakaanilangamwo nabeechibe akhandi akhanji.

³Mana Yuda natsia mumukunda omwo nali nomukanda kwabelihe Abaroma, nende abalindi bomuhekalu, abali nibarumilwe nende abesaaliisi abakhulundu nende Abafarisayo. Bali nibachinjile ebimanulwa bielihe, tsitaha nende ebitseso biomulilo.

⁴Yesu namanyile koosi akali niketsa okhwikholekha khuye, yasita hambeli nabareeba ari, “Mukhaabanga wina?”

⁵Nibamukalusia nibaboola bari, “Yesu wa Nazareti.” Naye nababoolela ari, “Nisie uno,” ne Yuda owamukhoba oyo yali nasinjiileho ninabo.

⁶Ne olwa Yesu yababoolela ari, “Nisie uno,” besundukha, nibesuundula inyuma ne nibakwa hasi.

⁷Yesu khandi nabareeba ari, “Mukhaabanga wina?” Nabo nibamukalusia bari, “Yesu wa Nazareti.”

⁸Yesu nababoolela ari, “Isie emalile okhumuboolela mbu, nisie uno. Kho nimuba nimuukhaabanga isie, leshe abandi bano batsie.”

⁹Yaboola amakhuwa ako kho mbu, aka yali niyaboola koosibwe habwene mbu, “Papa, shindakosiakhwo kata mulala khu abawambelesia tawe.”

¹⁰Simoni Petero, owali nolukanga, yalutsomola mana narema eshirwi shiomukhono musaatsa shiomusumba womwisaaliisi omukhongo nishikwa hasi. Eliira liomusumba oyo liali mbu, Maliku.

¹¹Yesu naboolela Petero ari, “Kalusia olukangalwo muluula lwalwo! Opaaranga mbu shiekhoyile okhunywa eshikombe eshiobusandibwi shino eshia Papa yambelesiye ta?”

¹²Kho abelihe Abaroma, omukhongo wabwe nende abalindi Abayahudi nibatiila Yesu, nibamuboha.

¹³Mana nibaranjilila okhumuyila khu Anasi. Anasi yali nyakhufialanyene Kayafa owali Omwisaaliisi Omukhongo womuhekalu omuyika okwo.

¹⁴Kayafa uno niye owali nabooleele abakhongo ba Abayahudi mbu, nobulayi omundu mulala afwe khulwa abandu boosi.

¹⁵Simoni Petero nende omwechi undi baloonda khu Yesu. Omwechi undi oyo yali niyamanyikha obulayi khumwisaaliisi omukhongo oyo. Kho natsia nende Yesu okhuula mulwanyi lweinzu yomwisaaliisi omukhongo oyo.

¹⁶Naye Petero natong'a elwanyi hashiliibwa. Kho omwechi undi oyo, owali niyamanyikha khumwisaaliisi omukhulundu, nakalukha elwanyi, naboola nende omukhaana owali hashiliibwa, ne niyenjisia Petero mukari.

¹⁷Omukhaana owali nalindile hashiliibwa oyo, naboolela Petero ari, “Wesi shioli mulala khubeechi bomundu uno?” Petero nakalusia ari, “Tawe! Isie shiendi omwechiwe tawe.”

¹⁸Khulwa okhuba omunyiri kwaliho omunji, abakholi nende abalindi bali nibabwanile omulilo kwamanda nibasinjiileho nibooranga. Kho Petero natsia nasinjilaho ninabo yesi niyoora omulilo.

¹⁹Mana Omwisaaliisi omukhulundu nareeba Yesu amareebo okhulondana nabeechibe nende okhwechesiakhwe.

²⁰Yesu nakalusia ari, “Isie buli lwosi ndaboolilenje amakhuwa habulafu khu buli mundu, nindechesia mutsisinagogi nende muhekalu, ewa Abayahudi boosi bakhung'anilanga. Shindaboolakhwo likhuwa liosi liosi mumasilisi tawe.

²¹Kho eshichila niureeba nishiina? Reeba abandu abaarecheresiyenje akandaboolilenje. Bareebe aka ndababoolile, bamanyile aka ndababoolile.”

²²Olwa Yesu yaboola ario, ne mulala khubalindi, owali niyemileho namupaama olukhofi, nareeba Yesu ari, “Nolwa oboola orio imbeli womwisaaliisi omukhulundu!”

²³Yesu namukalusia naboola ari, “Nemba nemboolile likhuwa liosi liosi libi, boolela buli mundu ouli hano likhuwa elo. Nebutswa nemba nemboolile habwene, eshichila niwukhupa nishiina?”

²⁴Mana Anasi nababoolela mbu bayile Yesu nashiboyilwe ario, imbeli wa Kayafa omwisaaliisi omukhulundu.

²⁵Petero yali nashisinjiileho niyooranga omulilo. Kho abandi nibamureeba bari, “Iwe wesi shioli mulala khubeechi bomundu uno?” Petero niyekaana naboola ari, “Tawe, isie shiendi omwechiwe tawe.”

²⁶Mulala khubasumba bomwisaaliisi omukhulundu, omwikho womundu owa Petero yali naremile eshirwi, naboola ari, “Isie ekhuluutsi noli nende Yesu mumukunda”

²⁷Petero khandi niyekaana naboola ari, “Tawe.” Mana itaywa niyilakula.

²⁸Mumabwibwi Yesu yarusibwa munzu mwa Kayafa, nayilwa itookho ewa Omukafuna. Nebutswa abemilisi ba Abayahudi shibayenjila itookho ta, kho mbu baleshe okhwifwabia, ne mbu balie lisabo lia Pasaka.

²⁹Kho Pilato narula natsia elwanyi ewa bali, ne nabareeba ari, “Nimakhuwa shiina aka mwinjililanga omundu uno itookho?”

³⁰Nibamukalusia bari, “Omundu uno naba mbu shiali omwonooni ta, shikhwakhamureerire khwiwe tawe.”

³¹Naye Pilato nababoolela ari, “Bulano inywe abeene mumubukule mumuyaasie okhulondana namalako kenywe.” Nabo nibamukalusia nibaboola bari, “Ifwe shikhufuchililungwa okhukhalachila omundu yesi yesi eshiina shiokhufwa tawe.”

³²Ako kekholekha kario, khulwa okhuusia aka Yesu yali naboolile okhumanyia shinga olwa nafwe.

³³Pilato nakalukha itookho, ne nalanga Yesu, namureeba ari, “Iwe niwe omuruchi wa Abayahudi?”

³⁴Yesu nakalusia ari, “Lireebo lino lirula khwiwe noho abandu bandi nibo abakhubooleele amakhuwa kanje?”

³⁵Pilato namukalusia naboola ari, “Iwe opaaranga mbu, isie endi Omuyahudi noho? Abandubo beene nende abesaaliisi abakhulundu, nibo abakhureerire khwisie. Nishiina eshiokholile?”

³⁶Yesu namuboolela ari, “Oburuchi bwanje shibuli bwomushialo muno tawe. Nikakhabeele mbu, oburuchi bwanje nobwomushialo muno, abalondi banje bakhaalwaniile kho mbu, endeshe okhuhaanwa khubemilisi ba Abayahudi. Nebutswa oburuchi bwanje shibuli obwomushialo muno tawe!”

³⁷Pilato namureeba ari, “Kho iwe oli omuruchi?” Yesu namukalusia ari, “Niwe ouboolile mbu, endi omuruchi. Isie ndebulwa ninditsa mushialo khulwa eshifune shilala eshio mbu, okhuboola obwatoto. Ne omundu yesi yesi owobwatoto ahulilanga amakhuwa kanje.”

³⁸Pilato namureeba ari, “Obwatoto nishio shiina?” Mana Pilato nakalukha elwanyi khandi khu Abayahudi abo, ne nababoolela ari, “Shienyoolilekhwo eshikha shiosi shiosi muye tawe.

³⁹Nebutswa okhulondana neshiima shienywe, ekhoyile okhumulekhuulila omubohe mulala buli khunyanga yelisabo lia Pasaka. Kho mwenya mbu, emulekhuulile omuruchi wa Abayahudi?”

⁴⁰Nabo nibamukalusia nibaboola nomwoyo omukhongo bari, “Tawe, oyo tawe! Khwenya okhulekhuulile Baraba!” Baraba yali omunuuli.