Read wanga YOHANA 20 Bible Online

YOHANA 20 - wanga bible

YOHANA 20

¹Ne mumabwibwi, khunyanga yambeli yelichuma, eshialo nishishiiliime, Mariamu Magadalene yatsia khung'ani, nalola lichina nilirusibwekhwo.

²Mana natsia tsimbilo, niyoola khu Simoni Petero nende omwechi undi, owa Yesu yali niyaheela. Nababoolela ari, “Barusiye Omwami mung'ani, ne shikhumanyile aha bamureere tawe!”

³Kho Petero nende omwechi oyo, nibatsia khung'ani eyo.

⁴Mana boosi babili nibatsia tsimbilo, nebutswa omwechi undi oyo yelukha okhushila Petero, mana naranjilila okhuula khung'ani.

⁵Yenama nahengamwo ne nalola tsingubo tsieisanda yeikitani tsionyene, nebutswa shiyayenjilamwo tawe.

⁶Simoni Petero yesi niyetsa, ne niyenjila mung'ani. Nalola tsingubo tsieisanda yeikitani nitsilimwo tsionyene.

⁷Khandi nalola eshitambaya eshiali nishiboyilwe khumurwe kwa Yesu. Nebutswa shishiali halala nende tsingubo tsieisanda yeikitani eyo tawe, nebutswa shiali nishikanyiilwe habundu shionyene.

⁸Mana omwechi undi oyo, owali naranjiliile okhuula khung'ani, yesi niyenjilamwo nalola ne nasuubila.

⁹Bali nibashili okhumanyilisia Amahandiko akaboolanga mbu, okhuula alamushe okhurula mukhufwa.

¹⁰Mana abeechi abo nibakalukha ingo wabwe.

¹¹Mariamu yasinjila hang'ani nalilanga. Ne olwa yali nashililanga ario, yenama nahenga mung'ani.

¹²Nalolamwo abamalaika babili nibefwalile ebifwalo ebilafu tswe, abali nibekhaale ahomubili kwa Yesu kwali nikubelenje, mulala namurwe noundi nabilenje.

¹³Nibamureeba bari, “Mukhasiiwe, olilanga mbushiina?” Naye nabakalusia ari, “Babukuule Omwami wanje, ne shiemanyile aha bamureere tawe!”

¹⁴Mana nashiukhana nalola Yesu nasinjiileho, nebutswa nalamanya mbu ni Yesu tawe.

¹⁵Yesu namureeba ari, “Mukhasiiwe, olilanga mbushiina? Ne okhaabanga wina?” Naye Mariamu napaara mbu, nomukholi womumukunda okwo, mana namuboolela ari, “Omwami, noba nomubukuule, chama umboolela aha omureere, nasi ndalatsia emubukule.”

¹⁶Yesu yamulanga ari, “Mariamu!” Naye Mariamu nashiukhana nahenga ewa Yesu yali, ne naboola muluheburania ari, “Raboni!” Eshisina mbu, “Omwechesia.”

¹⁷Mana Yesu namuboolela ari, “Shiolandiilakhwo ta, shichila eshili okhukulukha okhutsia ewa Papa ta. Nebutswa tsia oboolele abaana befwe mbu, engalukhanga khu Papa wanje khandi Papa wenywe, Nyasaye wanje khandi Nyasaye wenywe.”

¹⁸Kho Mariamu Magadalene natsia naboolela abeechi abo mbu, aluutsi Omwami. Ne nababoolela koosi aka Yesu yali namubooleele.

¹⁹Mana khunyanga eyo nibwakheela, abeechi bali nibakhung'anile halala munzu. Ne emiliango chiali nichikaalwe obutinyu, shichila bali nibariire abemilisi ba Abayahudi. Mana Yesu niyetsa nasinjila hakari mubo. Nababoolela ari, “Omulembe kube ninenywe.”

²⁰Olunyuma lwokhuboola ako, yabamanyia amakhonoke nende mumbafumwe. Olwa abeechi abo balola Omwami, bekhoya muno.

²¹Yesu nababoolela khandi ari, “Omulembe kube ninenywe. Shinga olwa Papa yaaruma isie, nolwa siesi emuruma inywe.”

²²Mana nabahelela omuya, ne nababoolela ari, “Munyoole Roho Omutakatifu.

²³Nimuba nimuleshela abandu obwonooni bwabwe, balaleshelwa, ne nimuba nimulabaleshela ta, shibalaleshelwa tawe.”

²⁴Tomasi, owalangwa mbu Likhwana, owali mulala khubeechi ekhumi nababili, shiyali halala nende abeechi abo olwa Yesu yabaloleshela tawe.

²⁵Kho abeechi bandi nibamuboolela bari, “Khuluutsi Omwami!” Tomasi nababoolela ari, “Isie neshili okhulolakhwo tsimbala tsiemisumari mumakhonoke, endiilemwo olwala lwanje, khandi omukhono kwanje kutiile mumbafumwe, shienyala okhusuubila tawe.”

²⁶Olunyuma lwetsinyanga munane, abeechi bali nibali halala khandi munzu, naye Tomasi yali ninabo. Emiliango chiali nichikaalwe, nebutswa Yesu yetsa nasinjila hakari mubo, ne naboola ari, “Omulembe kube ninenywe.”

²⁷Mana naboolela Tomasi ari, “Ra olwalalwo hano, mana ohenje khumakhono kanje, khandi onyiile omukhonokwo otiile mumbafu mwanje. Lekha okhukanakania, suubila!”

²⁸Tomasi namukalusia naboola ari, “Omwami wanje, khandi Nyasaye wanje!”

²⁹Yesu namureeba ari, “Iwe osuubiile shichila unduutsi? Nabeikhabi abasuubila nibalanduutsi isie ta!”

³⁰Yesu yakhola ebilolelo bindi ebinji abeechibe nibalolanga ebilahandikwa mushitabu shino tawe.

³¹Nebutswa kano kahandikwa kho mbu, musuubila mbu, Yesu niye Kristo, Omwana wa Nyasaye. Ne okhubirira mubusuubili bwenywe obwo, munyoole obulamu khulwa obunyalibwe.