Read wanga YOHANA 3 Bible Online

YOHANA 3 - wanga bible

YOHANA 3

¹Yaliho omukhulundu owa Abayahudi, owalangwa mbu, Nikodemo, owali mulala khubomukanda okwa Abafarisayo.

²Omukhulundu oyo yetsa khu Yesu mushilo, namuboolela ari, “Omwechesia, khumanyile shinga lwoli omwechesia, owa Nyasaye yaruma. Shichila shialiho omundu yesi yesi ounyala okhukhola akamakana kokholanga ako, Nyasaye nalali halala ninaye tawe.”

³Naye Yesu namukalusia naboola ari, “Ekhuboolela toto mbu, omundu yesi yesi shianyala okhulolakhwo Obwami bwa Nyasaye, nalebulwa obuyia tawe.”

⁴Naye Nikodemo namureeba ari, “Omundu omukofu anyala arie okhwibulwa obuyia? Anyala toto okhukalukha munda mwa nyinamwana, mana yebulwa khandi olwakhabili noho?”

⁵Yesu nakalusia naboola ari, “Ekhuboolelanga toto mbu, abulaho ounyala okhwinjila mubwami bwa Nyasaye, nalebuulwe khulwa amaatsi nende khulwa Roho Omutakatifu tawe.

⁶Eshiibulwa nomubili, shibetsanga eshiomubili, nashio eshibulwa nende Roho, shibetsanga eshia Roho.

⁷Shiolachenya shichila mbu ekhubooleele wibulwe obuyia tawe.

⁸Omuyeka kuhuutsanga aha kwenya, nawe nohulila oluyoka lwakwo, nebutswa shiomanya ewakurula kata ewakutsia tawe. Nolwa buli mundu owibulwa khulwa Roho ali ario.”

⁹Nikodemo nareeba ari, “Amakhuwa kano kakhanyalikha karie?”

¹⁰Yesu naye nakalusia naboola ari, “Iwe oli omwechesia omukhongo owa Abaisiraeli, ne shiomanyile kano ta?

¹¹Ekhuboolela toto mbu, khuboolanga khukakhumanyile, nikhumurumbulila khukenako akakhwaluutsi. Nenyu shimufuchililanga oburumbusi bwefwe tawe.

¹²Isie nemuboolela amakhuwa komushialo inywe shimusuubilanga tawe. Kho kata mwakhasuubila murie nemuboolela amakhuwa komwikulu?

¹³Ne abulaho owatsiakhwo mwikulu ne nakalukha ta, habula Omwana womundu yenyene, niye owekha narula mwikulu.”

¹⁴Ne shinga olwa Musa yachinguula inzokha yomukasa khumusaala mushitsiimi, nolwa Omwana womundu akhoyile okhuchinguulwa ario,

¹⁵kho mbu, omundu yesi yesi oumusuubila, abe nobulamu bweinziayo.

¹⁶Okhuba Nyasaye yaheela muno abomushialo, okhuula khukhuhaana omwanawe omutelwa, kho mbu, omundu yesi yesi oumusuubilila aleshe okhufwa, habula abe nobulamu bweinziayo.

¹⁷Okhuba Nyasaye shiyaruma Omwanawe mushialo okhukhalachila abomushialo eshiina ta, habula mbu, abe omuhonia wabomushialo.

¹⁸Omundu yesi yesi ousuubilila Omwana oyo, shiakhalachilwa eshiina ta, nebutswa yesi yesi oulamusuubilila ta, amalile okhukhalachilwa eshiina, shichila shiyasuubilila mumwana Omutelwa wa Nyasaye tawe.

¹⁹Ne obukhalachilwi bweshiina bwatsana mbwobuno mbu, obulafu bwa Nyasaye bwetsa mushialo, nebutswa abandu baheela eshiilima okhushila obulafu obwo, shichila ebiima biabwe nebimayanu.

²⁰Okhuba buli mundu yesi yesi oukholanga akobumayanu, shiyenyanga obulafu ta, khandi shiyetselanga mubulafu ta, okhuba ebikholebie ebimayanu ebio biakhetsukhana bialolekha habulafu.

²¹Ne oukholanga akatoto, yetselanga mubulafu kho mbu, obulafu obwo bulolesie mbu, akholile munjila yokhuria Nyasaye.

²²Olunyuma lwamakhuwa ako, Yesu nabeechibe batsia mulukongo lwa Yudea, ewa yali ninabo khushise eshituutu nabatiisinjiayo.

²³Yohana yesi yali nabatiisinjia abandu mulukongo lwa Ayenoni, ahambi nende Salimu, okhuba amaatsi kali amanji ebweneyo. Abandu batsia wa Yohana yali, naye nababatiisia.

²⁴Ako kekholekha Yohana nashili okhubohwa mumbohe tawe.

²⁵Ne abandi abokhubechi ba Yohana bali nibayingananga nende Omuyahudi undi khumwima kweshiyahudi, kwokhwisiiya.

²⁶Kho Abeechi ba Yohana nibakalukha khuye nibamuboolela bari, “Omwechesia, witsulilanga omundu oyo, owali ninawe ebukwe womwalo kwa Yorodani, owa waboolakhwo khumakhuwake? Bulano abatiisinjia, nabo abandu abanji batsiitsanga khuye!”

²⁷Yohana nakalusia naboola ari, “Abulaho ounyala okhunyoola eshindu shiosi shiosi, nalahesibwe nende Nyasaye tawe.

²⁸Inywe abeene muli abaloli banje khu aka ndaboola mbu, ‘Shiendi nisie Kristo mwenoyo ta, habula ndarumwa okhumuranjilila.’

²⁹Omwene shiselelo niye oubetsanga mwene omweha, nebutswa omwitsa wa mwene shiselelo, asinjilangaho butswa narecheresia, ne yekhoyanga muno olwa ahulila omwoyo kwa mwene shiselelo. Niko akachila, okhwikhoya khwanje khuno nikhuba okhwitsuule.

³⁰Ye okhuula achinguushe muluyali, nasi okhuula ndituutuyie.”

³¹Ourula mwikulu nomukhongo okhushila abandu boosi. Ne ouli mushialo, abetsanga oweshialo khandi aboolanga akeshialo, nebutswa ourula mwikulu, abetsanga ikulu wa boosi.

³²Arumbulanga kamalile okhulola nende okhuhulila, nebutswa abulaho oufuchililanga oburumebwe tawe.

³³Nebutswa oufuchilila oburumebwe amanyisia khulwa okhukhola ario, mbu, Nyasaye nowatoto.

³⁴Shichila omwenoyo owa Nyasaye yaruma, aboolanga amakhuwa ka Nyasaye, okhuba Nyasaye niye oumuhelesinjia Rohowe mu bwitsulu bwosi.

³⁵Samwana omwana yaheela Omwanawe, ne nara ebindu biosi hasi wobunyalibwe.

³⁶Ousuubililanga Omwana oyo, ali nobulamu bweinziayo, ne oulahelesia Omwana oluyali nende okhumuhulila ta, shialaba nobulamu ta, habula eshinyasio shia Nyasaye shilaba khuye inziayo.