Read wanga YOHANA 6 Bible Online

YOHANA 6 - wanga bible

YOHANA 6

¹Olunyuma olwa amakhuwa ako, Yesu yambukha inyanza eya Galilaya, eyilangungwa khandi mbu ya Tiberia.

²Omukanda omukhongo kwabandu nikumulondakhwo, shichila bali nibaluutsi ebilolelo ebiamakana ebiokhuhonia abalwale.

³Mana Yesu natikulukha mushikulu niyekhalayo halala nabeechibe.

⁴Lisabo lia Pasaka elia Abayahudi liali nilili ahambi okhuula.

⁵Mana Yesu nachinguula tsimonitsie ne nalola omukanda omukhongo nikumwitsilanga, kho nareeba Filipo ari, “Nihena aha khwakhakula ebiokhulia ebihela abandu bano boosi?”

⁶Ne yaboola kano khulwa okhuteema Filipo. Okhuba yali omwene namanyile eshia atsia okhukhola.

⁷Filipo nakalusia ari, “Kata tsidinari[4] ebikhumi bili shitsiakhahela okhukula emikaate echia buli mulala yakhanyoolakhwo akhatonye khatiti butswa tawe.”

⁸Ne Andereya omusiani wabwe Simoni Petero, owali mulala wokhubechibe naboolela Yesu ari,

⁹“Ali hano omuraka ouli nende emikaate chirano chieishayiri nende tsinyeni tsibili. Kata kario, bino shibiakhaela abandu bano boosi tawe.”

¹⁰Yesu nababoolela ari, “Boolele abandu bekhale hasi.” Ne obunyasi bwali habundu yaho obunji. Kho abandu boosi nibekhala hasi, boosi bali ahambi ebikhumila biraano (15,000).

¹¹Mana Yesu nabukula emikaate echio, nakhupila Nyasaye orio, nabakabila abali nibekhale. Nakhola ario khandi netsinyeni etsio, mana boosi nibalia shinga olwa benya.

¹²Ne olwa boosi bali nibekure, yaboolela abeechibe ari, “Mukhung'asie ebitonye bitonyile biosi, kho mbu khuleshe okhusasiakhwo eshindu shiosi shiosi tawe.”

¹³Kho nibakhuung'asia biosi, mana nibetsusia ebimwelo ekhumi nabibili.

¹⁴Ne olwa abandu balola eshilolelo eshiamakana eshia Yesu yali nakholile, baboola bari, “Toto mwene, uno nomulakusi owali niyasuubisia okhwitsa mushialo.”

¹⁵Mana Yesu namanya mbu benyanga okhumutiila namani mbu bamwemeshe okhuba omuruchi wabwe, kho narulaho natikulukha mushikulu yenyene.

¹⁶Ne olwa eshialo bweela, abeechi ba Yesu bakholomokha nibatsia khunyanza.

¹⁷Nibenjila muliaro nibachaaka okhwambukha inyanza nibakalukha Kaperinaumu. Eshialo nishilima Yesu nashili okhwitsa ewa bali.

¹⁸Mana imbumbuyeka ikhongo niyichaka okhuhutsa, niyikhola inyanza okhwirunda.

¹⁹Ne olwa abeechi bali nibafuchile eliaro oluchendo oluhela tsimailo tsitaru noho tsine, balola Yesu nachendanga khumaatsi, niyetsa ahambi nende eliaro, nibaria muno.

²⁰Yesu nababoolela ari, “Nisie, mularia tawe!”

²¹Mana nibatsaatsahala nibamwinjisia muliaro, ne niboola khuluchinga ewa bali nibatsitsanga bwangu.

²²Khunyanga yalondakhwo abandu bali nibasikaale injelekha undi weinyanza balola eliaro nilisikaleho elala lionyene. Ne nibamanya mbu, Yesu shiyali natsiile nabeechibe tawe, nibapaara mbu abeechi batsiile bonyene.

²³Amaaro kandi ketsa okhurula Tiberia, niketsa khulukuku ahambi nende habundu aha Yesu yali nasaayile emikaate nahelesia abandu nibalia.

²⁴Kho olwa abomukanda balola mbu Yesu shiyali naliho ta, kata abeechibe boosi khandi shibali nibaliho ta, benjila mumaaro ako nibatsia Kaperinaumu, okhukhaaba Yesu.

²⁵Ne olwa abandu banyoola Yesu nali injelekha weinyanza, bamureeba bari, “Omwechesia wetsile hano liina?”

²⁶Naye Yesu nabakalusia ari, “Emuboolela toto mbu, muukhabanga shichila mwalile emikaate nimwikura; shimuukhabanga shichila mumanyile eshisina shiebikhole bianje biamakana tawe.

²⁷Shimulakhalabana khulwa okhunyoola ebiokhulia ebisikhanga tawe, habula mukhalabane khulwa ebiokhulia ebibetsangaho okhuula inziayo. Bino nibio ebiokhulia ebia Omwana womundu alamuhelesia, shichila niye owa Nyasaye ouli Samwana yarakhwo eshibalikho eshiokhumufuchilila.”

²⁸Kho nibamureeba bari, “Nefu khwakhakhola shiina kho khukhole aka Nyasaye yenyanga mbu khukhole?”

²⁹Yesu nabakalusia ari, “Aka Nyasaye yenyanga mbu mukhole, nokhusuubila mu oyo owa yaruma.”

³⁰Nabo nibamureeba bari, “Neshilolelo shiina eshiamakana, shionyala okhukhola mbu khulole mana khukhusuubile iwe? Nishikhole shiina eshia wakhakhola?

³¹Abakuuka befwe balia imana mushitsiimi, shinga olwa kahandikwa mbu, ‘Yabahelesia emikaate okhurula mwikulu mbu balie.’ ”

³²Mana Yesu nababoolela ari, “Emuboolela toto mbu, emikaate echia Musa yamuhelesia shichiali emikaate okhurula mwikulu ta, habula Papa wanje niye oumuhelesinjia inywe omukaate kwatoto okhurula mwikulu.

³³Okhuba omukaate kwa Nyasaye ahaana niye oyo owekha hasi okhurula mwikulu ouhelesia abomushialo obulamu.”

³⁴Kho nibamuboolela bari, “Omwami okhuhelesinjie omukaate okwo buli lwosi.”

³⁵Yesu nababoolela ari, “Nisie omukaate okwobulamu. Yesi owitsa khwisie shialalumwakhwo inzala tawe; naye ousuubila mwisie shialalibwakhwo nobuloho tawe.

³⁶Nebutwa, ndamuboolela mbu mwandola ne shimwasuubilila tawe.

³⁷Omundu yesi owa Papa yambelesia aletsa khwisie. Ne yesi yesi owitsa khwisie, shindalamwikana kata nahatuutu ta,

³⁸shichila shindayetsa okhurula mwikulu mbu ekhole akokhwenya khwanje ta, habula akokhwenya okhwa oyo owaruma.

³⁹Ne oyo owaruma yenyanga mbu, ndalakosiakhwo kata mulala khwabo boosi aba yambelesiiye tawe, habula ebalamusie boosi khunyanga eyobumalilishi.

⁴⁰Okhuba okhwenya khwa Papa wanje khuli mbu boosi abalola Omwana nibasuubila muye banyoole obulamu obulahwaho ta. Khandi mbu ndakhabalamusie khunyanga eyobumalilishi.”

⁴¹Mana Abayahudi nibachaaka okhubuluula abeene khu beene shichila yali naboolile mbu, “Nisie omukaate okwekha okhurula mwikulu.”

⁴²Kho nibaboola bari, “Omundu uno shiali niye Yesu omwana wa Yosefu? Khumanyile samwana nende nyinamwana. Kho aboolanga arie bulano mbu, yekha okhurula mwikulu?”

⁴³Yesu nakalusia ari, “Leshe okhubuluula abeene khubeene.

⁴⁴Abulaho omundu ounyala okhwitsa khwisie nalakhwesilwe nende Papa owaruma ta; ne nasi ndilimulamusia khunyanga yobumalilishi.

⁴⁵Abalakusi bahandika mbu, ‘Buli mundu aliechesibwa nende Nyasaye.’ Kho oyo yesi ouhulilanga aka Papa nende okhweka okhurula khuye, yetsa khwisie.

⁴⁶Ne shikali mbu buli mundu yamulola Papa ta; habula oyo owarula ewa Nyasaye, niye yenyene owalola Papa.

⁴⁷Emuboolela toto mbu, omundu yesi ousuubila ali nobulamu obulahwaho ta.

⁴⁸Isie nisie omukaate okuhaananga obulamu.

⁴⁹Abakuuka benywe balia imana mushitsiimi, nebutswa bafwa.

⁵⁰Kuno nikwo omukaate okwekha okhurula mwikulu, ne omundu yesi yesi ouliakhwo shianyala okhufwa ta.

⁵¹Isie nisie omukaate okwobulamu okwekha okhurula mwikulu. Omundu yesi yesi ouliakhwo omukaate kuno, alamenya inziayo. Omukate kwemuhelesia nomubili kwanje, kwehaana kho mbu abomushialo babe abalamu.”

⁵²Kho Abayahudi nibayingana abeene khubeene nibareebana bari, “Omundu uno yakhakhuhelesia arie omubilikwe mbu khulie?”

⁵³Mana Yesu nababoolela ari, “Emuboolela toto mbu, nimuba nimulalia khumubili okwa Omwana womundu nende okhunywa khumabangake ta, shimulikhwo nobulamu mwinywe tawe.

⁵⁴Oyo Oulitsanga omubili kwanje khandi nanywa amabanga kanje ali nende obulamu obulahwaho ta; nasi ndilimulamusia khunyanga eyobumalilishi.

⁵⁵Okhuba omubili kwanje nikwo eshiokhulia shiatoto, nako amabanga kanje niko eshiokhunywa shiatoto.

⁵⁶Oyo oulia omubili kwanje khandi nanywa amabanga kanje nomulamu mwisie, nasi endi omulamu muye.

⁵⁷Shinga Papa ouliho mwoyo yaruma isie, kho khululwe siesi khandi endi omulamu. Kho yesi ysei ouliakhwo omubili kwanje alaba omulamu khulwanje.

⁵⁸Kuno nikwo omukaate okwekha okhurula mwikulu. Shikuli shinga omukaate okwabakuuka benywe balia mana olunyuma nibafwa ta. Oyo oulia khumukate kuno alabetsangaho omulamu inziayo.”

⁵⁹Yesu yaboola amakhuwa kano olwa yali niyechesinjia musinagogi Kaperinaumu.

⁶⁰Abanji khubeechibe bahulila amakhuwa kano nibaboola bari, “Lino neliechesio litinyu. Niwiina ounyala okhulihulila?”

⁶¹Yesu kata nashili okhuboolelwa mbu abeechibe bali nibabuluulanga khulwa amakhuwa ako, yabareeba ari, “Amakhuwa kano kamusinyisiye noho?

⁶²Ne kakhaba karie nimuba nimulola Omwana womundu nakulukha nakalukha ewa yalinji olwambeli?

⁶³Roho wa Nyasaye niye ouhaananga obulamu; omundu namundu shianyala okhukhola ario tawe. Amakhuwa akemuboolele niko Roho wa Nyasaye khandi niko obulamu.

⁶⁴Nebutswa balala mwinywe shibasuubilanga tawe.” Okhuba Yesu yamanya okhurula khukhuchaaka abo abalasuubila ta, nende oyo owitsa okhumukhoba.

⁶⁵Mana naboola ari, “Shino nishio eshifune eshichilile nimuboolela mbu, abulaho ounyala okhwitsa khwisie nalanyalilwe nende Papa.”

⁶⁶Khulwa amakhuwa kano, abanji abokhubalondibe bakalukha inyuma nibalamulondakhwo khandi tawe.

⁶⁷Kho Yesu nareeba abeechibe ekhumi na babili abo ari, “Nenyu mwesi mwikomba okhundekha noho?”

⁶⁸Naye Simoni Petero namukalusia ari, “Omwami, khwakhatsia khuwina? Iwe niwe ouli nende amakhuwa akobulamu bweinziayo.

⁶⁹Ne bulano nefu khusuubile khandi khumanyile mbu iwe niwe Omutakatifu owarula khu Nyasaye.”

⁷⁰Yesu nakalusia ari, “Shindamwahula inywe ekhumi nababili noho? Nebutswa mulala khwinywe neshishieno!”

⁷¹Ne yali naboolanga khu Yuda omwana wa Simoni Isikarioti. Okhuba Yuda, kata niyali mulala khubeechi ekhumi nababili, niye owali natsitsanga okhumukhoba.