Read wanga YOHANA 7 Bible Online

YOHANA 7 - wanga bible

YOHANA 7

¹Ne olunyuma lwamakhuwa ako, Yesu yachenda mu Galilaya, ne shiyachenda mu Yudea ta, shichila abemilisi aba Abayahudi bali nibakhaabanga okhumwira.

²Ne lisabo liamatili liali nilili ahambi okhuula.

³Abasiani babwe Yesu betsa nibamuboolela bari, “Rula hano otsie mulukongo lwa Yuda, kho mbu abalondibo balole ebikhole biamakana ebiokholanga.

⁴Okhuba omundu shiabisanga kakholanga naba niyenya okhumanyikha obulayi tawe. Kho lwokholanga amakhuwa kano, lekha eshialo shiosi shikhumanye!”

⁵Okhuba kata abasiani babwe shibamusubila tawe.

⁶Yesu nababoolela ari, “Eshise shianje shishili okhuula. Nebutswa inywe eshise shiosi shiosi neshiahabwene.

⁷Abomushialo shibanyala okhumusila inywe ta, habula basilanga isie, shichila ebaboolelanga habulafu mbu ebikhole biabwe nebimayanu.

⁸Inywe tsie mwisabo. Isie shienzia mwisabo elo ta, shichila ebise bianje bishili okhuula.”

⁹Yaboola kano mana natong'a Galilaya.

¹⁰Ne olunyuma lwa abasiani babwe okhutsia mwisabo, Yesu yesi khandi yatsia, nebutswa shiyatsia habulafu ta, yatsia mumabiswi.

¹¹Abemilisi ba Abayahudi bali nibamukhabanga mwisabo elo, nibareeba bari, “Ali hena?”

¹²Abandu abanji mumikanda bamonyana aka Yesu, abandi nibaboola bari, “Omwene nomundu omulayi,” nabandi bari, “Tawe, akosinjia abandu.”

¹³Nebutswa abulaho owaboola khukeke habulafu, shichila bali nibarire abemilisi ba Abayahudi.

¹⁴Ne olwa lisabo liali nilili ahambi okhuhwa, Yesu yatsia niyenjila muhekalu mana nachaaka okhwechesia.

¹⁵Mana abemilisi ba Abayahudi nibahuka nibaboola bari, “Omundu uno yamanya arie amakhuwa amanji ne ashili okhutsiakhwo mumeko koosi koosi?”

¹⁶Yesu nabakalusia ari, “Aka enzechesinjia shikali akanje ta, habula karulanga khu Nyasaye owaruma isie.

¹⁷Yesi owikomba okhukhola aka Nyasaye yenya, alamanya nikakhaba mbu aka enzechesinjia karulanga khu Nyasaye noho emboolanga khubunyali bwanje omwene.

¹⁸Omundu ouboolanga khulwa obunyalibwe omwene, yekhaabilanga oluyali lulwe omwene. Nebutswa oukhabilanga owamuruma oluyali, omwenoyo abetsanga omusuubilwa, khandi shiali omubeeyi tawe.

¹⁹Musa shiyamuhelesia amalako? Ne abulaho khwinywe oulondanga amalako ako ta. Mbushiina mukhabanga okhunzira?”

²⁰Abomukanda nibakalusia bari, “Oli neshishieno! Niwiina oukhabanga okhukhwira?”

²¹Yesu nakalusia naboola ari, “Ndakhola eshikhole shiamakana shilala ne mwesi nimuhuchusibwa.

²²Musa yamuhelesia lilako lieshishebo khubaana benywe abasiani nebutswa shikali mbu, shiarula khu Musa ta, habula abakuuka benywe nibo abashichachia, ne nenywe mushebanga omwana khunyanga eya Isabato.

²³Nikakhaba mbu omwana omusiani ashebungwa khunyanga ya Isabato, kho mbu Amalako ka Musa kaleshe okhufunakwa, eshichilanga nimusinyishila shichila mbu ehoniliye elala omundu khunyanga ya Isabato nishiina?

²⁴Shimulakhalachilanga omundu eshiina khulwa akamulola khuye elwanyi ta, habula mukhalachenje nimulonda obwatoto.”

²⁵Abandu bandi okhurula Yerusalemu bareebana bari, “Uno shiali niye omundu wa bakhaabanga okhwira noho?

²⁶Ne bulano lole, aboolanga butswa amakhuwake habulafu, ne abulaho ouboolangakhwo likhuwa kata elala okhumufukula ta! Kanyalikha mbu, abemilisi bamanya mbu, niye Kristo watsana noho?

²⁷Kata kario fwesi pe khumanyile womundu uno arulanga. Nebutswa olwa Kristo alitsa, abulaho owakhamanye ewarulanga tawe.”

²⁸Mana Yesu natsiililila okhwechesia muhekalu, nalanjilisia nomwoyo omukhongo naboola ari, “Toto mwene inywe mwamanya isie, ne khandi mwamanya werulanga? Nebutswa Shindayetsa khulwanje omwene ta. Naye owaruma isie nowatoto, nenywe shimumumanyile tawe,

²⁹habula isie emumanyile, shichila erula khuye, khandi niye owaruma isie.”

³⁰Khulweshio, bateema muno mbu bamutiile, nebutswa abulaho owanyiila omukhonokwe okhumutiilakhwo ta, shichila ebisebie biali nibishili okhuula.

³¹Nebutswa abandu abanji abomumukanda okwo bamusuubila, nibaboola bari, “Olwa Kristo oyo yakhetse, yakhakhole akamakana amanji okhushila akomundu uno akholanga?”

³²Abafarisayo bahulila abandu nibeemoonyangakhwo khumakhuwa ka Yesu. Mana bo, nende abesaaliisi abakhulundu nibaruma abelihe bandi okhumutiila.

³³Mana Yesu naboola ari, “Ndalatsiililila okhubakhwo ninenywe khulweshise shituutu butswa, ne olunyuma ndalakalukha khu oyo owaruma.

³⁴Namuukhaabe okhunyoola, ne shinamuunyoole ta, okhuba inywe shimunyala okhwitsa wa isie enzia tawe.”

³⁵Kho abemilisi aba Abayahudi abo nibaboolelana abeene khu beene bari, “Nihena aha omundu uno yenyanga okhutsia, aha ifwe khulanyala okhumunyoola ta? Nakhabe niyenyanga okhutsia mumatookho aka Abagiriki, aha bandu befwe bamenyanga kho mbu, yechesie Abagiriki noho?

³⁶Naboola mbu, nakhumukhaabe, ne shinakhumunyoole ta, khandi mbu, shikhwakhanyale okhutsia aha yakhabe natsiile ta, kho aba aboolanga shiina?”

³⁷Khunyanga yokhumalilikha yelisabo, eyalinji inyanga ikhongo yelisabo, Yesu yasinjila ne nalanjilisia nomwoyo omukhongo naboola ari, “Omundu yesi yesi owobuloho bulia, yetse khwisie, anywe amaatsi.

³⁸Amahandiko amatakatifu kaboolanga kari, ‘Omundu yesi yesi ousuubila mwisie, emichela chiamaatsi, akahaananga obulamu chilarula muye nichikholomokha.’ ”

³⁹Yesu yali naboolanga amakhuwa ako khu Roho, owa, abali nibamusuubila bali nibatsitsanga okhunyoola. Kata kario Roho tsana oyo yali nashili okhuhaanwa ta, shichila Yesu yali nashili okhuchinguulwa muluyali.

⁴⁰Olwa abandu bandi khubomukanda okwo bahulila naboolanga amakhuwa ako, baboola bari, “Toto mwene uno niye omulakusi watsana!”

⁴¹Nabo abandi nibaboola bari, “Uno niye Kristo watsana!” Abandi nabo nibareebana bari, “Mana Kristo anyala yarula Galilaya?

⁴²Amahandiko amatakatifu kaboolanga mbu, Kristo aliba womulwibulo lwomuruchi Daudi, khandi aliibulilwa Betselehemu, mwitaala lia Daudi yamenyangamwo.”

⁴³Mana obwahukhani nibubaho mumukanda okwo khulwa Yesu.

⁴⁴Abandi khubo benya mbu, bamutiile, nebutswa abulaho yesi yesi owanyiila omukhokwe okhumutiilakhwo tawe.

⁴⁵Kho olwa abelihe abo bakalukha, abesaaliisi abakhulundu nende Abafarisayo babareeba bari, “Mbushiina nimulamureerire ta?”

⁴⁶Abelihe abo nibakalusia bari, “Omundu abulakhwoho owamala okhuboolakhwo shinga lwomundu oyo aboolanga tawe!”

⁴⁷Abafarisayo nabo nibabareeba bari, “Mwesi khandi omundu oyo amusiluhasiye noho?

⁴⁸Alikhwoho kata mulala khubemilisi noho khu Abafarisayo, ousuubiile omundu oyo?

⁴⁹Kata kario abandu abanji bano shibamanyile amalako ka Musa ta, khulweshio, bali mushilaamo shiobubi.”

⁵⁰Nikodemo, owali mulala khu Abarisayo abo, khandi owali naranjiliile okhutsia khuye, yababoolela ari,

⁵¹“Okhulondana namalako kefwe, shikhunyala okhukhalachila omundu eshiina nikhushili okhurechelesia aka ali ninako, kata nikhushili okhukhabilisia aka aba nakholile tawe.”

⁵²Nibamukalusia nibamureeba bari, “Kho wesi khandi orulanga Galilaya noho? Nosoma Amahandiko amatakatifu obulayi, olanyoola mbu, abulaho omulakusi, ounyala okhurula Galilaya tawe.” [

⁵³Mana buli mundu nakalukha nangowe.