Read wanga YOHANA 8 Bible Online

YOHANA 8 - wanga bible

YOHANA 8

¹Mana Yesu natsia khushikulu shia Miseituni.

²Mumabwibwi inyanga yalondakhwo, yenjila muhekalu. Mana abandu boosi nibamwitsila naye niyekhala nabeechesia.

³Abahandichi bamalako nende Abafarisayo nibareera omukhasi owali nanyolelesiibwe naheyanga, ne nibamusiinjisia hakari wabwe.

⁴Nibaboolela Yesu bari, “Omwechesia, omukhasi uno anyolelesiibwe naheyanga.

⁵Ne mumalako kefwe Musa yakhulaka mbu, omukhasi shinga uno alaswe namachina mana afwe. Nawe oboolakhwo shiina khuye?”

⁶Baboola amakhuwa ako khulwa okhuteema Yesu kho mbu, banyoole eshiisichirasio shiokhumwinjilila itookho. Nebutswa naye yenama butswa, nahandika hasi nende olwalalwe.

⁷Ne olwa batsiililila okhumureeba amareebo, yachinguukha ne nababoolela ari, “Omundu yesi yesi khwinywe oushili okhukholakhwo eshionoono shiosi shiosi aranjilile okhumulasa lichina.”

⁸Ne namala niyenama khandi nachaaka okhuhandika hasi.

⁹Nabo olwa bahulila amakhuwa ako, barulaho mulala mulala, okhuchaachila khubali abakofu. Mana Yesu natong'aho yenyene nende omukhasi oyo nashisinjiileho.

¹⁰Yesu nachinguukha ikulu, ne nareeba omukhasi oyo ari, “Bali hena? Shialikhwoho outonyile okhukhukhalachila eshiina ta?”

¹¹Naye nakalusia ari, “Abulaho outonyile tawe, Omwami.” Mana Yesu naboola ari, “Nobulayi, kho kata khandi siesi shikhukhalachila eshiina ta. Otsie, ne okhurula olwa leelo, olonoonakhwo khandi tawe.”][5]

¹²Yesu naboolela Abafarisayo khandi ari, “Isie nisie obulafu bweshialo. Omundu yesi yesi ounondakhwo, alaba nobulafu bwobulamu bweinziayo, ne shialachendakhwo khandi mushiilima tawe.”

¹³Abafarisayo nibamuboolela bari, “Bulano wirumbulilanga omwene akobulolibwo. Obulolibwo nobwa butswa.”

¹⁴Yesu nakalusia naboola ari, “Tawe, kata nindiirumbulila omwene akobuloli bwanje, obuloli bwanje nobwatoto. Okhuba, emanyile ewa ndarula khandi kata ewa enzia. Inywe shimumanyile ewa ndarula kata ewa enzia tawe.

¹⁵Inywe mukhalachilanga omundu eshiina munjila shinga abandu nabandu butswa, isie nasi shikhalachilanga omundu yesi yesi eshiina tawe.

¹⁶Ne kata nimba nekhalaka eshiina, obukhalachi bwanje bunyala okhuba obwatieli, shichila shiendimwo sienyene ta, habula Papa owaruma ali halala ninasi.

¹⁷Toto mumalako kenywe kahandikwa mbu, obuloli bwabandu babili nobwatoto.

¹⁸Kho isie Omwene ndirumbulilanga akobuloli bwanje, naye Papa owaruma, arumbulanga obuloli obwo khulwanje.”

¹⁹Kho nibamureeba bari, “Papawo mwene ali hena?” Yesu nabakalusia naboola ari, “Inywe shimumanyile isie kata Papa wanje ta. Nimuba nimwakhaamanyile isie, mwakhamumanyile kata Papa yesi.”

²⁰Yesu yaboola amakhuwa ako koosi, olwa yali niyechesinjia muhekalu, nali ahambi ahamasanduku kebihaanwa kali nikareerwe. Ne abulaho owamutiilakhwo, shichila ebisebie biali nibishili okhuula.

²¹Kho Yesu nababoolela khandi ari, “Isie enzia, ne namuukhaabe, nebutswa namufwile butswa mubwonooni bwenywe. Inywe shimunyala okhutsia ewa isie enzitsa tawe.”

²²Kho abemilisi aba Abayahudi nibaboola bari, “Aboolanga mbu, shikhunyala okhutsia ewa atsia ta. Kanyala okhuba mbu, omwene aleyira noho?”

²³Naye Yesu nakalusia naboola ari, “Inywe murula hasi hano, nasi isie ndarula ikulu. Inywe muli abomushialo muno, nebutswa isie shindi owomushialo muno tawe.

²⁴Niko akachila nemuboolela inywe mbu, mulafwila butswa mubwonooni bwenywe. Nebutswa nimuba nimulasuubila mbu, ‘Isie Nisie,’ ta, mulafwila mubwonooni bwenywe.”

²⁵Nibamureeba bari, “Niwe wina?” Yesu nabakalusia naboola ari, “Kano niko akemubooleele okhurula mukhuchaaka khwene.

²⁶Endi nende amakhuwa amanji akokhumuboolela, khandi akokhumukhalachila. Owaruma nowobwatoto, nasi erumbulilanga abomushialo aka ndahulila okhurula khuye.”

²⁷Shibamanyilisia mbu, Yesu yababoolelanga amakhuwa khu Papawe tawe.

²⁸Kho yamala nababoolela ari, “Olwa muchinguula Omwana womundu khumusalaba, nolwa mulamanya mbu, ‘Isie Nisie,’ khandi nolwa mulamanya mbu, shiekholanga likhuwa liosi liosi khulwanje ta, habula emboolanga aka Papa yanzechesia okhuboola konyene.

²⁹Naye owaruma ali halala ninasi, shiyayandekha sienyene ta, shichila buli lwosi ekholanga akamuchamisia.”

³⁰Olwa abandu abanji abahulila Yesu naboola amakhuwa ako, bamusuubila.

³¹Yesu naboolela Abayahudi abali nibasuubile muye ari, “Nimuba nimulonda amechesio kanje, mulaba abeechi banje abatieli,

³²mulamanya obwatoto, ne obwatoto obwo bulamukhola okhuba abalekhuule.”

³³Nabo nibamukalusia bari, “Ifwe khuli olwibulo lwa Aburahamu, ne khushili okhubaakhwo abasumba khumundu yesi yesi ta. Kho nawe oboolanga orie mbu, ‘Mulakholwa abalekhuule?’ ”

³⁴Yesu nababoolela ari, “Emuboolela toto mbu, omundu yesi yesi oukholanga obwonooni, nomukhalabani wobwonooni.

³⁵Omusumba shiamenyanga mungo omwa omwamiwe tsinyanga tsiosi tawe. Nebutswa omwana omwibule amenyanga mungo mwabwe tsinyanga tsiosi.

³⁶Kho Omwana naba namukhola inywe okhuba abalekhuule, kho mulaba abalekhuule toto.

³⁷Emanyile mbu, muli toto abolwibulo lwa Aburahamu, nebutswa mukhaabanga okhunzira, shichila shimufuchililanga amechesio kanje tawe.

³⁸Emboolanga aka Papa yamanyia, inywe nenywe mukholanga aka mwahulila okhurula khu senywe.”

³⁹Nabo nibamukalusia nibaboola bari, “Sefwe niye Aburahamu.” Yesu nabakalusia ari, “Nimwakhabeele toto abaana ba Aburahamu, mwakhakholile aka Aburahamu yakhola.

⁴⁰Isie ndamubooleele akatoto aka ndahulila okhurula khu Nyasaye, ne kata kario inywe mukhaabanga okhunzira. Aburahamu shiyakholakhwo amakhuwa shinga ako tawe.

⁴¹Inywe mukholanga aka senywe yakhola.” Nibamukalusia bari, “Nyasaye niye Sefwe owakhuli ninaye yenyene, nefu nifwe abaanabe batoto.”

⁴²Yesu nababoolela ari, “Nyasaye alaba mbu, niye Senywe toto, khane mwakhaaheelile isie, shichila ndarula khu Nyasaye, ne bulano endi hano. Ne shindayetsa khulwanje ta, habula Nyasaye niye owaruma isie.

⁴³Ne mbushiina nimulamanyilisia akemboolanga kano ta? Eshifune shili mbu, shimwenyanga okhuhulila amakhuwa kanje tawe.

⁴⁴Inywe muli abaana ba senywe, ouli Setani, ne mwenyanga okhukhola akobwikombi bwa senywe. Okhurula khubuchachilo bwene, Setani yalinji omwiri, ne kata ashili okhubakhwo owobwatoto ta, shichila obwatoto shibuli muye tawe. Ne naboola akobubeeyi, abetsanga naboolanga butswa akeimeloye, okhuba nomubeeyi khandi niye samwana obubeeyi.

⁴⁵Nebutswa isie, emuboolelanga obwatoto, niko akachila nimulaasuubila isie tawe.

⁴⁶Niwiina khwinywe ounyala okhulolesia mbu, endi neshikha shiobwonooni? Nemba nemboolanga obwatoto, eshichila nimulaasuubila ta nishiina?

⁴⁷Ourula khu Nyasaye ahulilanga amakhuwa ka Nyasaye. Ne kata kario, inywe shimurula khu Nyasaye ta, niko akachilanga nimulanyala okhuhulila tawe.”

⁴⁸Abayahudi nibareeba Yesu bari, “Shikhubeele habwene olwa khuboolile mbu, iwe oli Omusamaria, khandi mbu, eshishieno shili mwiwe?”

⁴⁹Yesu nabakalusia naboola ari, “Isie shiendi neshishieno ta. Ehelesinjia Papa wanje oluyali, nenywe shimumbelesinjia isie oluyali tawe.

⁵⁰Nasi shiekhaabanga oluyali lwanje omwene ta, habula aliho oulukhaabanga, khandi niye oukhalakanga eshiina shianje niyangoboshela.

⁵¹Emuboolela toto mbu, Omundu yesi yesi oulonda amakhuwa kanje, shialifwa kata nahatuutu ta.”

⁵²Abayahudi abo nibamuboolela bari, “Bulano khwakhamanyila elala mbu, eshishieno shili mwiwe! Aburahamu yafwa, khandi abalakusi bosi bafwa, nebutswa iwe nawe oboolanga mbu, omundu yesi yesi oulonda amechesioko, shialifwa kata nahatuutu tawe.

⁵³Aburahamu, ouli kuuka wefwe yafwa, kho nawe oli omukhongo okhushila Aburahamu noho? Khandi abalakusi boosi bafwa. Kho nawe wikholanga mbu, oli wina?”

⁵⁴Yesu nabakalusia naboola ari, “Nimba nindakhehelesia isie omwene oluyali, kho oluyali lwanje olwo luba niluli olwa butswa. Oumbelesinjia oluyali ni Papa, ne niye owatsana owamuboolanga mbu, niye Nyasaye wenywe.

⁵⁵Inywe shimwamumanya ta, nebutswa isie emumanyile. Ne nimba nimboola mbu, shiemumanyile ta, emba nendi butswa omubeeyi shinga olwa inywe muli ababeeyi. Nebutswa isie emumanyile ye, khandi ekholanga aka yenya.

⁵⁶Aburahamu, ouli kuuka wenywe yekhoya niyenyanga mbu alolekhwo inyanga yokhwitsa khwanje. Yamala nachilola ne nasangaala.”

⁵⁷Mana nibamuboolela bari, “Iwe oshili kata okhuusia emiyika amakhumi karano ta, wakhaba toto niwalola Aburahamu?”

⁵⁸Yesu nakalusia naboola ari, “Emuboolela toto mbu, Aburahamu nashili okhwibulwa, Isie ndaliho.”

⁵⁹Kho nibukula amachina mbu, bamulase, nebutswa Yesu yebisa ne narula muhekalu natsia.