Read wanga YOHANA 9 Bible Online

YOHANA 9 - wanga bible

YOHANA 9

¹Ne olwa Yesu yali nabiranga, yalola omundu owebulwa nali omubofu.

²Mana abeechibe nibamureeba bari, “Omwechesia, nobwonooni bwa wina ebwachila niyebulwa nali omubofu? Nobwonoonibwe omwene, noho obwa abebusibe?”

³Yesu nabakalusia ari, “Shibuli obwonoonibwe omwene, noho obwa abebusibe, obwachila naba omubofu tawe. Yebulwa nali omubofu kho mbu, obunyali bwa Nyasaye bulolesibwe muye.

⁴Olwa shishili eshiteere shiri, khukhoyile okhukhola emilimo echia oyo owaruma. Okhuba eshilo shiitsanga lwomundu yesi yesi alanyala okhukhola emilimo tawe.

⁵Olwa emba neshili mushialo, nisie obulafu bweshialo.”

⁶Olunyuma lwa Yesu okhuboola amakhuwa ako, yafuutsa amare hasi, nakaasia litoyi namare ako, ne nabakha litoyi elo khumoni tsiomundu oyo.

⁷Mana namuboolela ari, “Tsia wiyosie mwitiba lia Siloamu.[6]” Mana omundu oyo natsia niyeyosia mumonimwe ne nakalukha nalolanga.

⁸Mana abamenyanibe nende abandu abamulolanga khale nasabasabanga ebindu, nibareeba bari, “Uno shiali niye omundu owayekhalenje khunjila nasabasaba ebindu?”

⁹Abandi nibafuchilila nibaboola bari, “Niye!” Nabo abandi nibakaana nibaboola bari, “Tawe, afwanana butswa ninaye.” Naye omwene naboola ari, “Nisie omwene nomwene.”

¹⁰Kho nibamureeba bari, “Kho kali karie mbu, bulano onyala okhulola?”

¹¹Naye nabakalusia naboola ari, “Omundu oulangwa mbu, Yesu, niye oukaasiye litoyi, niyambakha khumoni tsianje, mana niyamboolela mbu, enzie mwitiba lia Siloamu ndiyosiemwo. Kho emalile nenzia, ne olwa ndiyosiye butswa, ne nenjaaka okhulola.”

¹²Nabo nibamureeba bari, “Owatsana ali hena?” Naye nabakalusia naboola ari, “Shiemanyile tawe.”

¹³Kho nibayila omundu owali omubofu oyo khu Abafarisayo.

¹⁴Ne inyanga ya Yesu yakaasia litoyi ne nahonia omubofu oyo, yali inyanga eya Isabato.

¹⁵Abafarisayo nabo nibareeba omundu oyo shinga olwa yali nanyaliilwe okhulola khandi. Naye nababoolela ari, “Abashile litoyi khumoni tsianje, ne nindiyosia mumoni, mana bulano enyala okhulola.”

¹⁶Mana abandi khu Abafarisayo abo nibaboola bari, “Omundu oukholile amakhuwa ako shianyala okhuba niyarula wa Nyasaye ta, shichila shialondanga amalako aka Isabato tawe.” Abandi nabo nibaboola bari, “Mana omundu omwonooni anyala okhukhola ebikhole biamakana shinga bino?” Kho obwahukhani nibubaho mubo.

¹⁷Kho Abafarisayo nibareeba omundu oyo khandi bari, “Oboolanga mbu, akhuhoniye obubofubwo, nobulayi, nawe bulano oboolakhwo orie khuye?” Omundu oyo nakalusia naboola ari, “Nomulakusi.”

¹⁸Kata kario, abemilisi ba Abayahudi shibasuubila mbu, toto omundu oyo yali omubofu ne bulano anyala okhulola ta, okhuula olwa balaanga abebusibe

¹⁹nibabareeba bari, “Uno nomwana wenywe? Muboolanga mbu, yebulwa nali omubofu? Ne kabeele karie mbu, bulano anyala okhulola?”

²⁰Abebusibe nabo nibakalusia bari, “Toto khumanyile mbu, uno nomwana wefwe, khandi khumanyile mbu, yebulwa nali omubofu.

²¹Nebutswa shikhumanyile shinga kali mbu, bulano anyala okhulola tawe. Kata shikhumanyile omundu oumuhoniye tawe. Mumureebe omwene, shichila nomundu oukhulile, omwene anyala okhuboola.”

²²Abebusibe baboola bario, shichila bali nibariire abemilisi ba Abayahudi, okhuba Abayahudi bali nibamalile okhufuchilisania mbu, omundu yesi yesi oufuchilila mbu, Yesu niye Kristo, okhuula alondwe arule musinagogi.

²³Nishio eshifune shiachila abebusi abo nibaboola bari, “Mureebe omwene, nomundu oukhulile.”

²⁴Kho nibalanga omundu owalinji omubofu oyo olwakhabili, ne nibamuboolela bari, “Boola obwatoto imbeli wa Nyasaye! Ifwe khumanyile mbu, omundu oukhuhoniiye oyo nomwonooni.”

²⁵Omundu oyo nakalusia naboola ari, “Shienyala okhumanya naba nali omwonooni tawe. Eliemanyile nilikhuwa elala lionyene mbu, ndali omubofu, ne bulano enyala okhulola.”

²⁶Nibamureeba bari, “Akhukholeele shiina? Akhuhoniiye arie obubofubwo?”

²⁷Naye nabakalusia naboola ari, “Emalile khale okhumuboolela, nenywe shimwenyile okhuhulila tawe. Nishiina eshichila nimwenya okhukahulila khandi olwa khabili? Mwesi mwakhaba nimwenya okhuba abeechibe noho?”

²⁸Nabo nibamunyeka nibaboola bari, “Iwe niwe omulondiwe, nebutswa ifwe khuli abalondi ba Musa.

²⁹Khumanyile mbu, Nyasaye yaboolanga nende Musa, nebutswa ifwe shikhumanyile kata ewomundu oyo yarula tawe.”

³⁰Omusaatsa watsana oyo nakalusia ari, “Kano nakohuchisia! Inywe shimumanyile ewa arulanga ta, nebutswa yakholile isie okhulola!

³¹Khumanyile mbu, Nyasaye shiarecheresinjia amakhuwa akabandu abonooni ta, habula arecheresinjia abandu abamuhelesinjia oluyali nende okhukhola aka yenya.

³²Okhurula mukhuchaaka khweshialo khushili okhuhulilakhwo mbu, omundu atimbusiye tsimoni tsiomundu, owebulwa nali omubofu tawe.

³³Omundu uno naba mbu, shiyarula wa Nyasaye ta, shiyakhanyaliilwe okhukhola likhuwa liosi liosi tawe.”

³⁴Nabo nibakalusia nibaboola bari, “Iwe webulwa mubwonooni khandi nokhusilibwa mubwo, ne bulano oteemanga okhwechesia ifwe?” Kho nibamulonda okhurula musinagogi.

³⁵Olwa Yesu yahulila mbu, balondile omundu oyo okhurula musinagogi, yamukhaaba ne namunyoola, kho namureeba ari, “Osuubilanga mu Omwana womundu?”

³⁶Naye nakalusia naboola ari, “Omwami, mboolela niye wina, siesi esuubile muye!”

³⁷Yesu namuboolela ari, “Omalile okhumulola, khandi niye ouboolanga ninawe bulano.”

³⁸Naye naboola ari, “Omwami, esuubiile.” Mana nasikama hasi niyenamila Yesu.

³⁹Naye Yesu naboola ari, “Isie ndetsa mushialo okhukhalachila abandu eshiina, kho mbu ababofu banyalilwe okhulola, nabo abalolanga babofusibwe tsimoni tsiabwe.”

⁴⁰Mana abandi khu Abafarisayo abaliho ninaye, nibahulila naboolanga amakhuwa ako, ne nibamureeba bari, “Oboolanga mbu, kata ifwe fwesi khuli ababofu noho?”

⁴¹Naye Yesu nakalusia naboola ari, “Nimuba nimwakhabeele ababofu shimwakhabeele neshikha shiobwonooni ta, nebutswa shichila muboolanga mbu, munyala okhulola kho mushili butswa neshikha.”