Read wanga EBIKHOLE BIA ABARUME 1 Bible Online

EBIKHOLE BIA ABARUME 1 - wanga bible

EBIKHOLE BIA ABARUME 1

¹Yule khu Tseofilo. Mushitabu shiambeli, ndahandikamwo amakhuwa koosi aka Yesu yakhola nende ka yechesia okhurula olwa yachaaka emilimochie,

²okhuula khunyanga eya yabukulilwakhwo nayilwa mwikulu. Ne nashili okhuyilwa mwikulu, yechesia aba yali niyaahula okhuba abarumebe mubunyali bwa Roho Omutakatifu.

³Khulwa tsinyanga amakhumi kane olunyuma lwokhufwakhwe, yaloleshela abeechibe akhandi akhanji, mutsinjila etsiabamanyia obulayi bwene mbu, yaliho mwoyo. Bamulola, ne naboola ninabo khumakhuwa aka Obwami bwa Nyasaye.

⁴Ne olwabakhung'ana halala, yabalachilisia naboola ari; “Shimurulekhwo mu Yerusalemu tawe, habula mulindilile eshihaanwa shiandamuboolela, eshia Papa wanje yasuubisia.

⁵Yohana yabatiisia namaatsi, nebutswa olunyuma lwetsinyanga tsinduutu namubatiisibwe khulwa Roho Omutakatifu.”

⁶Kho olwa abarume bakhung'ana halala nende Yesu, bamureeba bari, “Omwami, tsinyanga tsino nitsio tsiolakalusilia Abaisiraeli oburuchi bwabwe noho?”

⁷Yesu nabakalusia naboola ari, “Ebise nende tsinyanga etsiakene ako bili mubunyali bwa Papa wanje mwene, ne shikali akenywe okhumanya olwa kakhabeho tawe.

⁸Ne mulanyoola obunyali olwa Roho Omutakatifu aletsa khwinywe, ne mulaba abaloli banje mu Yerusalemu, mu Yudea nende mu Samaria mwosi, kata okhuula mushialo shiosi.”

⁹Ne olwa yali niyakhaboola ario, yabukulwa nayilwa mwikulu nibalolanga, ne nakhamiushila mwileesi, nibalamulolakhwo khandi tawe.

¹⁰Ne olwa bali nibashirangaalile mwikulu naye nashiyilwa ario, lola, abandu babili abali nibefwalile tsingubo tsindafu tswe basinjilaho.

¹¹Abandu babili abo nibababoolela bari, “Inywe abandu ba Galilaya, mbushiina musinjiile hano nimuhenganga mwikulu? Yesu uno, oubukulwe okhurula khwinywe nayilwa mwikulu, yakhakalushe munjila ndala yene eyo, eya mulutsi natsilamwo mwikulu.”

¹²Mana abarume abo nibakalukha Yerusalemu okhurula khushikulu shia Miseituni, eshili ahambi ikilomita ndala okhurula mwitookho.

¹³Nibenjila mwitookho ne nibatsia mushisika eshieikulu, ewabamenyanga. Abaliho bali Petero, Yohana, Yakobo nende Andereya, Filipo nende Tomasi, Batsolomayo nende Matayo, Yakobo omwana wa Alufayo, Simoni Omuzeloti, nende Yuda omwana wa Yakobo.

¹⁴Abo boosi bakhung'ananga buli lwosi nibasaayila halala mubulala, halala nende abakhasi bandi abo, nende Mariamu nyinamwana Yesu nende abasiani babwe Yesu.

¹⁵Olunyuma lwetsinyanga tsinduutu, abasuubili bakhung'ana, ne boosi halala bali ahambi eshikhumi shilala namakhumi kabili (120). Mana Petero nasinjila naboola ari,

¹⁶“Baana befwe, kalinji mbu, okhuula Amahandiko kahesibwe, aka Roho Omutakatifu yali niyaboolakhwo okhubirira mu Daudi, khuka Yuda, owemilila abandu abetsa okhutiila Yesu.

¹⁷Yuda oyo yali mulala khwifwe, okhuba yali niyaahulwa mubukhalabani buno halala ninefwe.”

¹⁸Amapesa ka Yuda kayanyoola munjila yobumayanu ako, niko akayakulamwo omukunda, okwa yafwilamwo. Yarundukhamwo indaye mana amalake koosi nikayombookha elwanyi.

¹⁹Mana amakhuwa ako nikamanyikha mubandu boosi abamenyanga mu Yerusalemu. Khulweshio mululimi lwabwe abeene, balaanganga omukunda okwo mbu, “Akelidama” eshisina mbu, “Omukunda kweshitsaayi.”

²⁰“Okhuba kahandikwa mushitabu shietsitsabuli mbu, ‘Hangowe hakhoya hakwa likuunda, khandi omundu yesi yesi aleshe okhumenyakhomwo tawe.’ Khandi kahandikwa mbu, ‘Omundu undi abukule obulindibwe.’

²¹“Kho mulala khubandu abalondananga ninefwe tsinyanga tsiosi, olwa Omwami Yesu yali ninefwe,

²²okhuchaachila mutsinyanga tsia okhubatiisia okwa Yohana, okhuula khunyanga ya Yesu yabukulilwakhwo narula khwifwe nayilwa mwikulu, akhoyile okhuba mulala khwifwe mubuloli bwokhulamukha okhwa Omwami Yesu.”

²³Kho nibarala khubandu babili mbu, Yosefu owalangwa mbu, Barisaba owakulikhwa khandi mbu Yusito, nende Matsiya.

²⁴Mana nibasaaya Nyasaye nibaboola bari, “Omwami, iwe omanyile amapaaro komumioyo chiabandu boosi. Kho khumanyie mbu, niwiina khubabili bano owa waahuule

²⁵okhukhalabana shinga omurume mushilenje shia Yuda, owakhulekha natsia awakhoyile okhuba.”

²⁶Mana nibakhupa ikha okhwahula mulala khubabili abo, ne ikha niyikwila Matsiya, owamala ameetwe khubarume ekhumi namulala abo.