Read wanga EBIKHOLE BIA ABARUME 10 Bible Online

EBIKHOLE BIA ABARUME 10 - wanga bible

EBIKHOLE BIA ABARUME 10

¹Omundu undi yali Kaisaria owalangwa mbu Korinelio, owali omwimilisi weing'anda yabelihe Abaroma eyilangwa mbu, “Ing'anda ya Italia.”

²Yali omundu oweyidini owenamilanga Nyasaye halala nende abeinzuye boosi. Khandi yakhoonyanga abatakha aba Yudea muno, ne shiyachweyanga okhusaaya Nyasaye tawe.

³Tsiali ahambi tsisaa shienda tsieshiteere olwa yalola lilolelo. Ne mwilolelo elo, yalola toto mwene omumalaika wa Nyasaye niyetsa namulanga ari, “Korinelio!”

⁴Naye narangaala omumalaika oyo noburi, mana namureeba ari, “Nishiina Omwami.” Naye omumalaika oyo namukalusia ari, “Nyasaye afuchiliile amasaayoko nende emilimochio chietsimbabasi.

⁵Kho bulano ruma abandu Yopa okhwenda omundu undi oulangwa mbu, Simoni, eliiralie lindi niye Petero.

⁶Ali munzu yomunyushi wamaseelo oulangwa mbu Simoni, inzuye yili ahambi khulukuku lweinyanza.”

⁷Olwa omumalaika wali naboolile ninaye yarulaho, Korinelio yalanga abakholibe bomunzu babili nende mulala khubelihe bamukhalabanilanga khandi owenamilanga Nyasaye.

⁸Nababoolela akali nikekholeeshe koosi mana nabaruma Yopa.

⁹Inyanga yalondakhwo, olwa bali nibashili khuluchendo, nibali ahambi okhuula Yopa, Petero yanina khushitsafu shieinzu ahambi khutsisaa tsisasaba tsieshiteere okhusaaya.

¹⁰Inzala yamuluma ne niyekomba eshiokhulia, nebutswa olwa eshiokhulia shiali nishikasibungwa, yalola lilolelo.

¹¹Yalola likulu nilikuushe, ne eshindu nishikhanga hasi eshiafwana shinga ishuka imbambalifu niyishibungwa hasi khushialo, niyitiililwe tsimbeka tsiayo tsine.

¹²Ishuka eyo yalikhwo tsimbia tsiosi tsietsisolo; etsimoolanga khwiloba, nende amanyonyi akomubulimo.

¹³Mana nahulila omwoyo nikumuboolela kuri, “Petero, buukha osinzekhwo tsisolo etsio olie!”

¹⁴Naye Petero nakalusia ari, “Tawe, Omwami! Eshili okhuliakhwo eshindu shiosi shiosi eshiomusilo kata eshieshifwabwi tawe.”

¹⁵Mana omwoyo okwo nikumuboolela khandi kuri, “Eshindu shiosi shiosi eshia Nyasaye atsienuule olashilaangakhwo mbu, neshiomusilo tawe.”

¹⁶Kano kekholekha akhandi khataru, mana eshindu tsana nishikalusibwa mwikulu.

¹⁷Olwa Petero yali nashiyililisinjia eshisina shielilolelo elo, abandu aba Korinelio yali narumile boola khuinzu ya Simoni, ne nibasinjila hashiliibwa.

¹⁸Balaanga nibareeba bari, “Omucheni alikhwo muno oulangwa mbu, Simoni Petero?”

¹⁹Petero yali nashiteemanga okhumanyilisia eshisina shielilolelo elo, ne Roho Omutakatifu namuboolela ari, “Recheresia! Abasaatsa bataru[4] bali hano bakhukhaabanga.

²⁰Kho buukha, wishe hasi, ne olakanakania okhutsia ninabo tawe, shichila nisie oubarumile.”

²¹Kho Petero niyekha hasi natsia khubasaatsa abo nababoolela ari, “Nisie omundu owamukhaabanga. Eshichilile nimwitsa nishiina?”

²²Nabo nibamukalusia bari, “Omukhongo wabelihe oulangwa mbu, Korinelio akhurumile. Nomundu omulayi owinamilanga Nyasaye, khandi owa abandu aba Yudea boosi bahelesinjia oluyali. Omumalaika wa Nyasaye yamubooleele mbu, akhwinjisie iwe munzuye, kho mbu ahulile akomuboolela.”

²³Mana Petero nabenjisia ne nababoolela mbu, beyalisiaho shinga abachenibe. Inyanga yalondakhwo, yarula natsia ninabo. Ne balala khubasuubili okhurula Yopa nibatsia ninaye.

²⁴Ne khunyanga yalondakhwo yola Kaisaria, ewa Korinelio halala nende abekhobe nende abetsabe aba yali nalanjile bali nibamulindililanga.

²⁵Olwa Petero yali nali ahambi okhwinjila munzu, Korinelio yamwakaanila, nakwa mumakuluke, ne namwinamila.

²⁶Nebutswa Petero yamubuusiaho, namuboolela ari, “Sinjila, isie endi omundu namundu.”

²⁷Ne olwa Petero yaboola nende Korinelio, yenjila munzu, omwa yanyoola abandu abanji nibakhung'anile.

²⁸Nababoolela ari, “Inywe mumanyile obulayi abeene shinga olwa kuli omusilo khwifwe Abayahudi okhucheniha noho okhusanjilana nende omundu omumahanga. Nebutswa Nyasaye yamanyiye mbu, shingwanile okhulanga omundu yesi yesi owomusilo noho oweshifwabwi tawe.

²⁹Kho olwa murumane, nditsile nelakanakaniakhwo mumwoyo tawe. Kho mboolelekhwo, eshichilile nimunanga nishiina?”

³⁰Mana Korinelio naboola ari, “Tsinyanga tsitaru tsihwele, khutsisaa shinga tsino, ndabeele nisaayanga munzu mwanje ahambi tsisaa shienda tsieshiteere. Mana ninditsukhana butswa omundu nasinjiile imbeli wanje niyefwalile tsingubo tsing'inang'inu,

³¹niyamboolela ari; ‘Korinelio! Nyasaye afuchilile amasaayoko nende emilimochio chietsimbabasi.

³²Khulweshio, ruma abandu Yopa balanje omundu oulangwa ameerake koosi mbu, Simoni Petero. Nomucheni munzu ya Simoni, omunyushi wamaseelo, owamenya khulukuku lweinyanza.’

³³Kho neruma abandu okhukhulanga bwangu, nawe okholile obulayi okhwitsa. Kho bulano fwesi khuli hano imbeli wa Nyasaye nikhulindililanga okhuhulila koosi aka wibaalilwe nende Omwami okhukhuboolela ifwe.”

³⁴Mana Petero nachaaka okhuboola ari, “Endola toto mbu, Nyasaye shialimwo ebiela tawe.

³⁵Omundu yesi oumwinamilanga nakhola akobulunjishi, Nyasaye amufuchililanga obulateeba oluyialwe tawe.

³⁶Mumanyile oburume obwa yarumila abandu ba Isiraeli, mukhuyaala Amakhuwa Amalayi kokhureera omulembe okhubirira mu Yesu Kristo, ouli Omwami wa boosi.

³⁷Mumanyile likhuwa likhongo liekholekha mushialo shia Isiraeli shiosi, okhuchaachila Galilaya olunyuma lwa Yohana okhuyaala oburumebwe bwobubatiisibwi.

³⁸Mumanyile aka Yesu wa Nazareti, khandi shinga Nyasaye yamutsushilila Roho Omutakatifu nende obunyali. Yachenda buli habundu, nakholanga amalayi nende okhuhonia boosi abali hasi wobunyali bwa Setani, okhuba Nyasaye yali halala ninaye.

³⁹Ifwe khuli abaloli abamakhuwa koosi aka yakhola mushialo eshia Abayahudi nende Yerusalemu. Ne nibamwira khulwa okhumubamba khumusalaba.

⁴⁰Nebutswa Nyasaye yamulamusia okhurula mukhufwa olunyuma lwetsinyanga tsitaru, mana namukhola okhulolekha.

⁴¹Shiyamukhola okhulolekha khubandu boosi ta, habula khubaloli aba Nyasaye yali namalile okhwahula, ne nifwe abatsana, khwalia khandi nikhunywa ninaye olunyuma lwokhulamukhakhwe mukhufwa.

⁴²Naye yakhulachilisia okhuyaala Injiili khubandu khandi okhuboola obuloli mbu, niye owa Nyasaye yaahule okhuyasia abalamu nende abafu.

⁴³Abalakusi boosi barumbula khuye nibaboola mbu, omundu yesi yesi ousuubila muye, alaleshelwa obwonoonibwe mubunyali bweliiralie.”

⁴⁴Olwa Petero yali nashiboolanga amakhuwa ako, Roho Omutakatifu yeekha khu boosi abali nibarecheresinjia aka yali nayaalanga.

⁴⁵Abayahudi abasuubili abali nibarulile Yopa nibali nende Petero bahuchisibwa mbu, Nyasaye yatsushilila eshihaanwashie eshia Roho Omutakatifu khu Abamahanga khandi.

⁴⁶Okhuba bahulila abamahanga nibaboolanga mutsinimi tsinjeni, nibetsoominjia obukhongo bwa Nyasaye. Petero naboola nomwoyo omukhongo ari,

⁴⁷“Abandu bano banyoolile Roho Omutakatifu shinga ifwe fwesi khwanyoola. Aliho omundu yesi yesi bulano ounyala okhubekalila okhubatiisibwa namaatsi?”

⁴⁸Kho nalaka mbu, babatiisibwe muliira lia Yesu Kristo. Mana nibamusaaya mbu amenyekhwo ninabo khulwa tsinyanga tsindiiti.