Read wanga EBIKHOLE BIA ABARUME 11 Bible Online

EBIKHOLE BIA ABARUME 11 - wanga bible

EBIKHOLE BIA ABARUME 11

¹Abarume nende abasuubili bandi mu Yudea mwosi bahulila mbu, abamahanga boosi khandi bali nibafuchilile likhuwa lia Nyasaye.

²Ne olwa Petero yatsia Yerusalemu, abo abenyanga mbu okhuula abamahanga boosi bashebwe, bamuyingasia nibaboola bari,

³“Mbushiina nocheniha mungo mwabasinde, ne khandi nolia ninabo?”

⁴Kho Petero nabenoosia mubwitsulu koosi akali nikekholeeshe okhurula mukhuchaaka khwako ari,

⁵“Inyanga yindi ndali nisaayanga mwitookho lia Yopa, ne nindola lilolelo. Ndalola eshindu nishikhanga hasi eshifwana shinga ishuka ingali niyishibungwa hasi netsimbeka tsiayo tsine okhurula mwikulu, ne niyakama aha ndali.

⁶Ndahenjelesia obulayi mukari mwayo mana nendola emiruko nende tsisolo nabulimo, etsimoolanga khwiloba nende amanyonyi kokhwikulu.

⁷Mana nimbulila omwoyo nikumboolela kuri, ‘Petero, buukha wireekhwo tsisolo etsio olie!’

⁸Nasi ningalusia nimboola endi, ‘Shikanyalikha ta Omwami! Eshili okhuliakhwo eshiokhulia eshiomusilo kata eshieshifwabwi tawe.’

⁹Mana omwoyo okwo nikuboola khandi okhurula mwikulu kuri, ‘Eshindu shiosi shiosi eshia Nyasaye atsienuule olashilangakhwo mbu, neshiomusilo tawe.’

¹⁰Kano kekholekha okhuula khataru mana eshindu tsana nishikalusibwa mwikulu shiosi.

¹¹Khushise shieneshio abasaatsa bataru abali nibarumilwe khwisie okhurula Kaisaria niboola khunzu eya ndalimwo.

¹²Roho niyambolela mbu enzie ninabo obulakanakania ta. Abasuubili abashiefwe basasaba bano batsia ninasi Kaisaria, fwesi nikhwinjila munzu mwa Korinelio.

¹³Naye nakhuboolela shinga olwa yali nalutsi omumalaika nasinjiile munzuye, owamuboolela mbu, ‘Ruma omundu Yopa okhulanga omundu oulangwa mbu, Simoni Petero.

¹⁴Alakhuboolela amakhuwa akalachila iwe nende abeinzuyo boosi muhonibwe.’

¹⁵Ne olwa ndachaaka okhuboola, Roho Omutakatifu yekha khubo shinga olwa yakhwishila ifwe olwambeli.

¹⁶Kho ninditsulila aka Omwami yaboola mbu ‘Yohana yabatiisia namaatsi, nebutswa inywe mulibatisibwa nende Roho Omutakatifu.’

¹⁷Kalolekha habulafu mbu, Nyasaye ahelesiye abamahanga abo eshihaanwa shilala eshio eshia yakhuhelesia ifwe, olwa khwasuubila mu Omwami Yesu Kristo; kho nasi ndali wina owakhatemile okhwikalila Nyasaye?”

¹⁸Olwa bahulila amakhuwa ako, balekha okhuyingana ninaye mana nibetsoomia Nyasaye, nibaboola bari, “Kho Nyasaye ahelesiye abamahanga obwiyangu bwokhwikalukhasia kho mana babe abalamu!”

¹⁹Balala khubasuubili abasalaasibwa khulwa obusandibwi obwaliho olwa Sitefano yeerwa, bachenda okhuula Foinike, Kupuro nende Antiokia, nibayaalanga oburume bwa Kristo khu Abayahudi bonyene.

²⁰Nebutswa abasuubili bandi okhurula Kupuro nende Kurene, batsia Antiokia[5] mana nibaboolela abamahanga Amakhuwa Amalayi aka Omwami Yesu.

²¹Bali nobunyali obwa Omwami obunji, mana abandu abanji nibasuubila nibetsa khu Omwami.

²²Amakhuwa kano nikoola mwikanisa Yerusalemu, kho nibaruma Baranaba okhutsia Antiokia.

²³Olwa yoolayo, ne nalola shinga olwa Nyasaye yali nahelesiye abandu tsikhabi, yasaangaala, mana nabatinyilisia boosi mbu, babe abesiikwa khandi abobwatoto nemioyo chiabwe khu Omwami.

²⁴Baranaba yali omundu omulayi, owetsulamwo Roho Omutakatifu nende obusuubili, mana abandu abanji nibareelwa khu Omwami.

²⁵Mana Baranaba natsia Tariso okhukhaaba Saulo.

²⁶Olwa yamunyoola, yamuyila Antiokia; ne khulwomuyika mulala boosi bakhung'ananga nende abandu beikanisa, kho nibechesia omukanda omukhongo okwa abandu. Yali Antiokia ewa abasuubili baranjilila okhulangwa mbu, Abakristo.

²⁷Bulano munyanga etsio abalakusi bandi barula Yerusalemu nibatsia Antiokia.

²⁸Mulala khubo owalangwa mbu Agabo, yasinjila, ne khulwa obunyali bwa Roho yalakula naboola mbu, inzala ikhongo yali niyili ahambi okhubaho mushialo shiosi. (Inzala eyo yaliho olwa Kilaudio yali nali omuruchi wa Roma.)

²⁹Abeechi nibabisia mbu, buli mulala khubo akhoyeele okhuhaana obukhoonyi shinga olwa anyalilwa, okhukhoonya abasuubili bashiabwe Yudea.

³⁰Bakhola bario mana nibahelesia Baranaba nende Saulo ebihaanwa ebio mbu, bayilile abemilisi beikanisa eyo.