Read wanga EBIKHOLE BIA ABARUME 12 Bible Online

EBIKHOLE BIA ABARUME 12 - wanga bible

EBIKHOLE BIA ABARUME 12

¹Munyanga etsio omuruchi Herode[6] yachaaka okhusandia balala khubasanji beikanisa.

²Yeera Yakobo, omusiani wabwe Yohana nolukanga.

³Olwa yalola mbu kano kachamisiye Abayahudi, yatsililila natiila Petero, (kano kekholekha mubise bielisabo liomukaate kubulamwo limela.)

⁴Olunyuma lwokhutiilwa, Petero yareebwa mumbohe mbu alindwe netsing'anda tsine tsiabelihe. Herode yenya mbu amuyaasie imbeli wabandu lisabo elia Pasaka nilihwele.

⁵Kho Petero nabiikhwa mumbohe, nebutswa abasanji beikanisa bamusaayilanga muno khu Nyasaye.

⁶Eshilo shiene eshio, olwa Herode yali niyenyanga mbu nibushiele areere Petero imbeli wabandu, Petero yali nakonile hakari wabelihe babili. Yali naboyilwe neminyololo chibili, nabo abokhulinda eshilibwa shieimbohe bali nibashilindile.

⁷Habwene nahabwene omumalaika owa Omwami nalolekhaho, ne obulafu nibwakha mushikoro eshio. Omumalaika oyo natukuya Petero khwibeka, namubuusia naboola ari, “Buukha lwangu!” Habwene nahabwene eminyololo nichikwa hasi okhurula khumakhono ka Petero.

⁸Mana omumalaika oyo namuboolela ari, “Fwala tsingubotsio nende ebilarobio.” Naye Petero nakhola ario. Khandi omumalaika oyo namuboolela ari, “Bukula inguboyo ifubila mana unondekhwo.”

⁹Mana Petero narulamwo namulondakhwo. Petero shiyamanyilisia mbu akomumalaika oyo yali nakholanga kali akatieli ta, habula yapaara mbu, alolanga lilolelo.

¹⁰Olwa bali nibabirire khung'anda yabelihe yambeli nende eyakhabili, boola khushilibwa shiebichuma eshinjilanga mwitookho. Eshilibwa eshio shibekushila eshiene, ne nibarula elwanyi. Bakholomokha khumuhanda, ne habwene nahabwene omumalaika oyo nalekha Petero.

¹¹Kho Petero namanyilisia eshiali nishikholeeshe khuye ne naboola ari, “Bulano ndakhamanya mbu nakatieli! Omwami arumile omumalaikawe okhumbonia okhurula mubunyali bwa Herode nende mukoosi aka Abayahudi benyilenje okhukhola.”

¹²Niyakhamanyilisia ario, yatsia ingo owa Mariamu, nyinamwana Yohana owalangwa khandi mbu Mariko. Abandu abanji bali nibakhung'anileho nibasaayanga.

¹³Petero nakhong'onda khumuliango kwelwanyi, ne omukholi weshikhana oulangwa mbu Roda, niyetsa okhumwikulila omuliango.

¹⁴Yamanyilisia omwoyo kwa Petero nasaangaala okhushila. Mana nakalukha munzu tsimbilo nashili kata okhwikula omuliango tsana, ne nababoolela mbu, Petero yali nasinjiile elwanyi khumuliango.

¹⁵Nabo nibamuboolela bari, “Iwe olalushe!” Nebutswa yameeta okhubaboolela mbu nakatoto. Kho nibamukalusia mbu “Oyo nomumalaikawe.”

¹⁶Petero natsiililila okhukhong'onda khumuliango. Ne olwa bekula nibamulola bahuka muno.

¹⁷Nabasimila omukhono mbu baholeele, mana nabenoosia shinga olwa Omwami amurusiye mumbohe. Nababoolela ari, “Boolele Yakobo nende abasuubili bandi amakhuwa kano.” Mana nabarulakhwo natsia habundu undi.

¹⁸Olwa bwashia, indenga yaliho yikhongo mubalindi, nibachenya khushiali nishikholeeshe khu Petero.

¹⁹Mana Herode nalaka mbu, Petero akhabwe, nebutswa shibanyalilwa okhumunyoola tawe. Ne nalachilisia mbu, abalindi abo banoonelesibwe khandi nalaka mbu beerwe. Olunyuma lwako, Herode yarula Yudea, ne natsia okhumenya Kaisaria.

²⁰Ne Herode yali niyatilila abandu ba Tiro nende aba Sidoni liruma. Nebutswa bekhung'asia mumukanda mulala nibatsia okhumulola. Baranjilila okhuhulilisania nende Blasito owali omusinjilili weinzu yomuruchi mbu, abakhoonye. Mana nibatsia khu Herode okhukaasia omulembe, shichila eshialo shiabwe shianyoolanga eshiokhulia okhurula mushialo shiomuruchi.

²¹Khunyanga inzahule Herode yefwala tsingubotsie tsioburuchi, mana niyekhala khushifumbishie shioburuchi, naboolela abandu amakhuwa.

²²Abandu nibayibuukha bari, “Uno shiali omundu ouboolanga ta, habula nomunyasaye!”

²³Habwene nahabwene omumalaika owa Omwami nakwisia Herode hasi, shichila shiyahelesia Nyasaye oluyali tawe. Omubilikwe nikuliibwa netsinyende, ne nafwa.

²⁴Nebutswa likhuwa lia Nyasaye liameeta okhutswana nende okhulaanda.

²⁵Baranaba nende Saulo nibamalile obukhalabani bwabwe bachelela okhurula Yerusalemu nibali nende owalangwa khandi mbu, Mariko.