Read wanga EBIKHOLE BIA ABARUME 13 Bible Online

EBIKHOLE BIA ABARUME 13 - wanga bible

EBIKHOLE BIA ABARUME 13

¹Mukanisa ya Antiokia balimwo abalakusi nende abeechesia bano, Baranaba, Simeoni (owalangwa mbu Omumali,) Lukio (owa Kurene,) Manaeni (owakhusibwa nende omuruchi Herode) nende Saulo.

²Olwa bali nibakhalabanilanga Omwami khandi nibahonganga inzala, Roho Omutakatifu yababoolela ari, “Munzahulile Baranaba nende Saulo khulwa emilimo echia ndabalanjiile.”

³Kho olunyuma lwokhuhonga inzala nende okhusaaya, babarakhwo emikhono mana nibabaseebula.

⁴Roho Omutakatifu yaruma Baranaba nende Saulo okhutsia Seleukia, ne okhurula yaho benjila muliaro nibatsia khushikhalachinga shia Kupuro.

⁵Olwa boola Salami, bayaala likhuwa lia Nyasaye mutsisinagogi tsia Abayahudi. Bali nende Yohana Mariko owobakhoonya emilimo echio.

⁶Olwa bali nibambuushe eshikhalachinga eshio, boola Pafo, ewa babukaana nende omufumu Omuyahudi owali omulakusi wobubeeyi oulangwa mbu Bari Yesu.

⁷Yali omwitsa womukafuna weshikhalachinga eshio, oulangwa mbu, Serugio Paulo, owali omundu omuchesi. Omukafuna oyo yalanga Baranaba nende Saulo mbu bamuyaalile likhuwa lia Nyasaye.

⁸Nebutswa omufumu Elima, (nilio eliiralie mulugiriki), yateema okhubekalila, kho mbu omukafuna oyo aleshe okhukalukhana niyekhola omuloondi wa Kristo.

⁹Nebutswa Saulo owalangwa khandi mbu Paulo, niyetsulwemwo Roho Omutakatifu, yahenga omufumu oyo mumoni,

¹⁰ne naboola ari, “Iwe omwana wa Setani! Oli omusuku wabuli likhuwa liobwtoto. Iwe wetsulamwo obukaati obubi, ne buli lwosi oteemanga okhukalukhasia obwatoto obwa Omwami okhubukhola obubeeyi!

¹¹Bulano obunyali obwa Omwami bulakhwitsakhwo, ne bulakhukhola omubofu, ne khulwa ebisekhwo shiolalola obulafu bweshiteere tawe.” Habwene nahabwene Elima nahulila eshindu shinga omwosi omumali nikufuunikha tsimonitsie, nachenda nakoyana nakhaaba omundu wokhumutiila omukhono namwimilila.

¹²Olwa omukafuna yalola akekholekha yasuubila, shichila yahuchisibwa namechesio aka Omwami.

¹³Paulo nende abakhalabani bashie batsiila muliaro okhurula Pafo niboola Peruga, litookho elili Pamufilia. Nebutswa Yohana Mariko yabalekhayo nakalukha Yerusalemu.

¹⁴Batsiililila nibabira Periga niboola Antiokia elili Pisidia. Ne khunyanga eya Isabato batsia musinagogi mana nibekhalamwo.

¹⁵Olunyuma lwokhusoma eshitabu shiamalako ka Musa nende kabalakusi bahandika, abemilisi bemusinagogi babarumila omurume nibaboola bari, “Baana befwe, khumusaaya mbu, muboolelekhwo abandu bano likhuwa eliamuli ninalio eliokhubatinyilisia.”

¹⁶Kho Paulo nasinjila, nabasimila omukhono, nachaaka okhuboola ari, “Abaisiraeli bashianje, nende inywe Abamahanga boosi aba muli hano abenamilanga Nyasaye, muurecheresie!

¹⁷Nyasaye oyo owabandu ba Isiraeli yaahula abakuuka befwe, nabakhola abandu abelihanga likhongo munyanga tsiabamenyanga shinga abarende mushialo eshia Misiri. Nyasaye yabarusia Misiri nobunyalibwe obukhongo.

¹⁸Mana nabesimilisilia mushitsiimi khulwemiyika amakhumi kane.

¹⁹Yamulula amahanga musafu mushialo eshia Kanani mana nakhola abandube okhubukula eshialo eshio.

²⁰Kano koosi kabukula oluhoono lwemiyika ebikhumi bine namakhumi karano (450). “Olunyuma lwako[7] Nyasaye yabahelesia abayaasi okhuula munyanga tsiomulakusi Samweli.

²¹Ne olwa basaba mbu, baheebwe omuruchi, Nyasaye yabahelesia Saulo omusiani wa Kishi, owomuluyia lwa Benjamini. Yali omuruchi wabwe khulwemiyika amakhumi kane.

²²Olunyuma lwokhumurusiaho, Nyasaye yakhola Daudi okhuba omuruchi wabwe. Nyasaye yaboola khuye ari, ‘Enyoolile mbu, Daudi omusiani wa Yese, nomundu owa ndachama, alakhola koosi aka enzenya mbu akhole.’

²³Yali Yesu, owomulwibulo lwa Daudi, owa Nyasaye yakhola omuhonia wabandu ba Isiraeli, shinga olwa yali niyasuubisia.

²⁴Yesu nashili okhuchaaka emilimochie, Yohana yayaalila abandu boosi aba Isiraeli mbu, okhuula bekalukhasie okhurula mubwonooni bwabwe mana babatiisibwe.

²⁵Ne olwa Yohana yali nali ahambi okhumala omulimokwe, yareeba abandu ari, ‘Mupaaranga nisie wina? Shindi nisie owa mulindililanga oyo tawe. Nebutswa recheresie! Omwene oyo yetsanga inyuma wanje, ne shiengwanile okhufwalula ebilaarobie okhurula mubilenjebie tawe!’

²⁶“Abaisiraeli bashianje, abali abolwibulo lwa Aburahamu, nende Abamahanga boosi abali hano abenamilanga Nyasaye; nifwe aba oburume bwobuhonia buno burumiilwe!

²⁷Okhuba abandu bamenyile mu Yerusalemu, nende abemilisi babwe, shibamanyile mbu, niye omuhonia tawe, kata shibamanyilisia amakhuwa akabalakusi akasoomungwa buli khunyanga eya Isabato tawe. Habula bakhola amakhuwa akabalakusi okhusiibwa khulwa okhukhalachila Yesu okhufwa.

²⁸Ne kata olwa balaanyoola eshifune shiosi shiosi eshiokhumukhalachila okhufwa ta, basaba Pilato mbu, Yesu yerwe.

²⁹Kho olunyuma lwokhukhola koosi ka Amahandiko kaboolanga khuye, bamwakula okhurula khumusalaba mana nibamuyabila mung'ani.

³⁰Nebutswa Nyasaye yamulamusia okhurula mubafu,

³¹mana khulwetsinyanga tsinyinji yaloleshela abachendanga ninaye okhurula Galilaya okhuula Yerusalemu. Nibo bulano ababoolanga obuloli khuye khubandu ba Isiraeli.

³²Ne khuli hano okhumurereera Amakhuwa Amalayi aka Nyasaye yasuubisia okhukholela abakuuka befwe.

³³Yosiiye amakhuwa kano khwifwe abali abetsukhulu babwe khulwa okhulamusia Yesu, shinga khandi olwa kahandikwa mutsabuli yakhabili kari, ‘Niwe omwana wanje, leelo luno engwile papawo.’

³⁴Ne okhulondokhana nokhulamusibwakhwe okhurula mubafu Nyasaye yaboola ari; ‘Ndilikhuhelesia tsikhabi tsindakatifu khandi etsiatoto, etsia ndasuubisia Daudi.’

³⁵Khandi kano kenoosibungwa mutsabuli yindi mbu, ‘Shiolifuchiilila omutakatifuwo okhubolela mung'ani tawe.’

³⁶Okhuba Daudi namalile okhukhalabanila lichoomo lia Nyasaye munyangatsie yafwa, mana nayabilwa halala nende abakuukabe, nakwo omubilikwe nikubolela mung'ani.

³⁷Nebutswa oyo owa Nyasaye yalamusia okhurula mubafu shiyabolakhwo kata nahatutu tawe.

³⁸Kho khwenya mbu, inywe Abaisiraeli bashianje, mumanye mbu nokhubirira mu Yesu, owa mwayaalilwa habulafu, owamulaleshelwa ebionoono bienywe.

³⁹Khandi nokhubirira muye omwa, buli ousuubila muye alekhulungwa okhurula mubwonooni bwosi obwa Amalako ka Musa kalanyala okhumuleekhuula okhurulamwo tawe.

⁴⁰Khulweshio mube meeso kho mbu, kabalakusi baboola kano kaleshe okhukwa khwinywe mbu;[8]

⁴¹‘Lole, inywe abachaayi! Muchenye ne mufwe! Okhuba eshiekholanga leelo luno, neshindu eshiamulanyala okhusuubila, kata omundu namwinoosia tawe!’ ”

⁴²Ne olwa Paulo nende Baranaba bali nibarulanga musinagogi, abandu babasaaya mbu, bakalushile okhuboola amakhuwa ako khunyanga eya Isabato yiloondakhwo.

⁴³Olunyuma lwabandu okhusalana okhurula musinagogi, Abayahudi abanji nende Abamahanga abenamilanga Nyasaye, baloonda khu Paulo nende Baranaba. Abarume abo nibaboola ninabo nibabatsuuba mbu, balumiilile mukhumenya mubukoosia bwa Nyasaye.

⁴⁴Khunyanga eya Isabato eyaloondakhwo, ahambi abandu boosi abomwitookho elo bakhung'ana okhuhulila likhuwa lia Nyasaye.

⁴⁵Ne olwa Abayahudi balola abemikanda abo, batiilwa neimbalikha, nibafukula aka Paulo yaboola, ne nibamunyeka.

⁴⁶Mana Paulo nende Baranaba nibaboola nomwoyo omukhongo obularia ta bari, “Kali habwene mbu, inywe mube abambeli okhuyaalilwa likhuwa lia Nyasaye. Nebutswa shichila mwalifukula nimwibukula mbu shimukwaniile obulamu bwobumeli ta, khulashiukhana mana khutsie khu abamahanga.

⁴⁷Okhuba lilako lia Nyasaye yakhuhelesia liboola liri, ‘Ndamwahula mbu, mube obulafu khu abamahanga, kho mbu abandu boosi mushialo bahonibwe.’ ”

⁴⁸Olwa Abamahanga bahulila ako, basangaala, nibetsoomia likhuwa elia Omwami, ne abo boosi abaahulwa khulwa obulamu bwobumeli nibasuubila.

⁴⁹Mana likhuwa elia Omwami nilitswana mumbali tsiosi.

⁵⁰Nebutswa Abayahudi batswanzwania abasaatsa abamanyikhana abomwitookho nende abakhasi abamahanga abali abakhongo, abenamilanga Nyasaye. Nibayakula obusandibwi khu Paulo nende Baranaba, nibabaloonda okhurula mumbali tsiabwe.

⁵¹Abarume abo nibateng'ulula olufu lwokhubilenje biabwe okhubafukula mana nibatsia Ikonio.

⁵²Nebutswa abasuubili abali Antiokia bekhoya muno khandi nibetsulwamwo Roho Omutakatifu.