Read wanga EBIKHOLE BIA ABARUME 14 Bible Online

EBIKHOLE BIA ABARUME 14 - wanga bible

EBIKHOLE BIA ABARUME 14

¹Mana nikekholekha Ikonio shinga olwa kali nikekholeeshe Antiokia. Paulo nende Baranaba nibatsia musinagogi, ne nibayaala okhuula omukanda omukhongo okwa Abayahudi nende Abamahanga nibasuubila.

²Nebutswa Abayahudi abakhaya okhusuubila basakania abamahanga mana nibabakhola okhufukula abasuubili.

³Abarume abo nibamenyayo oluhoono olurambi, nibaboola neitswoni khu aka Omwami. Naye Omwami mwene namanyisia mbu, oburume bwabwe khubukoosiabwe nobwatoto khulwa okhubahelesia obunyali bwokhukhola akamakana nende akokhuhuchisia.

⁴Abandu abomwitookho elo bakhung'ana, abandi nibaloonda aka Abayahudi, nabandi nibaloonda akabarume.

⁵Mana abandi khubamahanga nende Abayahudi, halala nabemilisi babwe nibasandia abarume nende okhubalasa amachina.

⁶Olwa abarume bamanya kano, belushila mumataala aka Lisitera nende Deribe, akali Likaonia, nibatsia mumbali etsirondokhaneyho.

⁷Mana ebweneyo nibayaalayo Injiili.

⁸Yaliho omundu undi mwitookho lia Lisitera owali likara okhurula okhwibulwakhwe, ne shiyanyalilwakhwo okhuchenda tawe.

⁹Kho yekhala narecheresia amakhuwa ka Paulo. Paulo nalola mbu asuubile, khandi nounyala okhuhonibwa. Paulo namuhenga shilunji,

¹⁰ne naboola nomwoyo omukhongo ari, “Kololokha, osinjile shilunji nebilenjebio!” Omundu owali likara oyo naruuma ikulu, ne nachaaka okhuchenda.

¹¹Olwa abandu abomukanda abo balola aka Paulo yali nakholile, baayula nibaboola mululimi lwabwe olulikoaonia bari, “Abanyasaye bakhwitsiile mwikondo liabandu!”

¹²Mana nibakulikha abarume abo ameera kabanyasaye babwe; Baranaba nibamukulikha mbu Zeu, naye Paulo shichila niye owali omubooli mwene nibamukulikha mbu Herime.

¹³Kho omwisaaliisi owa omunyasaye Zeu, owa Ihekaluye yali elwanyi welitaala elo, nareera tsisurusi nende ebimuli hashiliibwa, niyenyanga mbu, ye halala nende abemikanda bamalile abarume abo omusango.

¹⁴Olwa Baranaba nende Paulo bahulila aka bali nibenya okhukholelwa, barandula tsingubo tsiabwe mana nibatsia tsimbilo hakari womukanda nibalanjilisia bari,

¹⁵“Baana befwe, mbushiina mukholanga amakhuwa kano? Ifwe khuli butswa abandu nabandu shinga inywe! Khuli hano khulwa okhumuyaalila Amakhuwa Amalayi aka Yesu kho mbu, mwikalukhasie okhurula khubindu biabutswa bino, mana mwinamile Nyasaye ouliho mwoyo, owalonga likulu nende eshialo, inyanza nende biosi ebilimwo.

¹⁶Mutsinyanga tsiabira Nyasaye yafuchilila abandu boosi okhukhola shinga olwa benya.

¹⁷Nebutswa buli lwosi akholanga amakhuwa amalayi khulwa okhumanyisia inywe mbu aliho. Khandi amwikwisilinjia inywe ifula okhurula mwikulu nende okhumuhelesia lichesa mubise bikhoyeele. Amuhelesinjia ebiokhulia nende okhumusangasia mumioyo.”

¹⁸Nebutswa kata olwa abarume abo baboola amakhuwa ako, shibayekalila abomukanda okhubamalila omusango tawe.

¹⁹Nebutswa Abayahudi bandi betsaho okhurula Antiokia litookho lili Pisidia nende okhurula Ikonio, nibakatilisia abandu mbu, baleshe abarume. Nibalasa Paulo namachina, mana nibamukhwesa nibamuyila elwanyi welitaala elo, nibaparanga mbu afwile.

²⁰Nebutswa olwa abasuubili bekhung'asiaho nibamubotokhaane, yabukhaho, ne nakalukha mwitaala. Inyanga yalondakhwo, ye halala nende Baranaba batsia Deribe. .

²¹Paulo nende Baranaba bayaala Injiili Deribe, mana nibanyoola abalondi abanji. Mana nibakalushile Lisitera nende Ikonio, nende Antiokia mu Pisidia.

²²Nibatinyilisia abeechi nende okhubatsuuba mbu, balumiilile mubusuubili. Nibabeechesia nibaboola bari, “Okhuula khubirire mumanyakhano amanji, kho khwinjile mubwami bwa Nyasaye.”

²³Baahula abakofu mubuli ikanisa, mana olunyuma lwokhusaaya nende okhuhonga inzala, babara mumakhono aka Omwami owabasuubilila.

²⁴Nibamalile okhubira mumbali tsia Pisidia, boola Pamufilia.

²⁵Ebweneyo bayaala oburume mu Periga, ne nibatsia Atalia.

²⁶Okhurula ebweneyo batsila muliaro okhuula Antiokia, habundu aha bali nibahaanilwe mbu, baliindwe nobukoosia bwa Nyasaye, khulwa emilimo echia bali nibamalile okhukhola.

²⁷Ne olwa boolayo, bakhung'asia abandu beikanisa eyo halala, mana nibabarumbulila koosi aka Nyasaye yali nakholile halala ninabo, khandi shinga olwa yali niyekuliile abamahanga omuliango kwokhwinjila mubusuubili.

²⁸Mana nibamenya nende abasuubili abo khulwa oluhono olurambi.