Read wanga EBIKHOLE BIA ABARUME 15 Bible Online

EBIKHOLE BIA ABARUME 15 - wanga bible

EBIKHOLE BIA ABARUME 15

¹Abandu bandi barula Yudea nibetsa Antiokia, ne nibachaaka okhwechesia abomukanda kwabasuubili nibaboola bari, “Nimushili okhushebwa shinga olwa Amalako ka Musa kalachilisia, shimunyala okhuhonibwa tawe.”

²Mana Paulo nende Baranaba nibayingana ninabo muno khumakhuwa ako. Mana nibabisia mbu, Paulo nende Baranaba nende abandi khubasuubili abali Antiokia abo okhuula batsie Yerusalemu okhulola abarume nende abakofu khumakhuwa ako.

³Abaikanisa eyo nibabaruma mbu batsie, ne olwa bali nibatsitsanga babirira mumatookho aka Foinike nende Samaria nibaboolanga shinga olwa abamahanga bali nibakalukhaane nibali abasuubili ba Nyasaye, amakhuwa ako kasangaasia muno abasuubili boosi.

⁴Ne olwa boola Yerusalemu, benjisibwa nende abeikanisa eyo, abarume nende abakofu abeikanisa, mana nibababoolela amakhuwa koosi aka Nyasaye yali nakholile okhubirira mubo.

⁵Nebutswa abasuubili bandi khubomukanda okwa Abafarisayo basinjila nibaboola bari, “Abamahanga okhuula bashebwe khandi baloonde Amalako ka Musa.”

⁶Mana abarume nende abakofu beikanisa nibakhung'ana halala okhuloosia khumakhuwa ako.

⁷Olunyuma lwokhuyingana oluhoono, Simoni Petero yasinjila naboola ari, “Baana befwe, inywe mumanyile mbu, munyanga tsiabira, Nyasaye yanzahula isie okhurula mwinywe khulwa okhuyaalila abamahanga Amakhuwa Amalayi, kho mbu bahulile mana basuubile.

⁸Kho Nyasaye oumanyile amapaaro kabuli mundu, yafuchilila abamahanga khulwa okhubahelesia Roho Omutakatifu, butswa shinga olwa yakhukholela ifwe.

⁹Shiyayahukhasiakhwo hakari wefwe nende bo tawe. Yabaleshela obwonooni bwabwe shichila bali nibasuubile.

¹⁰Kho nikaba nikali kario, shichila shiina bulano mwenyanga okhuteema Nyasaye khulwa okhura likokolo khubasuubili elia kata abakuuka befwe noho ifwe abeene khulanyala okhuchinga ta?

¹¹Ifwe khwasuubila mana nikhuhonibwa khulwa obukoosia obwa Omwami Yesu, khandi boosi balahonibwa bario.”

¹²Mana abomukanda okwo boosi nibaholeela tsi, nibarecheresia Baranaba nende Paulo nibabenoosia akamakana nende ebilolelo bia Nyasaye yali nakholile mubamahanga okhubirira mubo.

¹³Ne olwa bali nibakhamala okhuboola, Yakobo yaboola ari, “Baana befwe, muurecheresie!

¹⁴Simoni wakhakhwinoosia shinga olwa Nyasaye yalolesia obulindibwe khubamahanga khulwa okhwinyoolela abandube okhurula mubo.

¹⁵Ne amakhuwa ako kafuchilisaninjia habwene nende akabalakusi, okhuba Amahandiko amatakatifu kaboolanga mbu,

¹⁶‘Olunyuma lwakano koosi ndakhachelele, ne nesimikha obuyia oburuchi bwa Daudi obwasasikha. Ndakhabumbashe khandi aha bwalikulukha, nibukhola okhuba obwamaani khandi.

¹⁷Kho nilwo olwa abandu boosi balinzitsila, nibalimwo abamahanga boosi abandalanga okhuba abanje.

¹⁸Nolwa Omwami owakhola kano okhumanyikha aboola.’

¹⁹“Khulweshio, isie endoola mbu, khuleshe okhunyasia abamahanga abakalushilanga Nyasaye abo.

²⁰Habula khubahandichile ibarwa okhubakaya mbu, baleshe okhuliakhwo eshiokhulia eshiomusilo eshihaanilwe shinga omusango khubifwanani ebinamilungwa. Khandi beliinde abeene okhurula mushifwabwi shiobuheyi nende okhulia inyama yeisolo yosi yosi eyimichilwe noho kata okhunywakhwo amalasile kayo.

²¹Okhuba Amalako ka Musa kasoomwa khulweshise eshiraambi muno, mutsisinagogi khu buli Isabato, ne amakhuwa ako kayaalungwa mubuli litaala.”

²²Mana abarume nende abakofu, halala nende abeikanisa boosi, nibalola mbu nobulayi baahule abandu okhurula mumukanda babarume Antiokia nibali nende Paulo nende Baranaba. Mana nibalobola abandu babili aboluyali mubasuubili, nibo Yuda owalangwa mbu Barisaba nende Sila.

²³Mana nibabaruma neibarwa yino niyiboola yiri, “Ifwe abarume nende abakofu abeikanisa, nende abaana benywe, khuruma amashiesio khubaana befwe boosi abomumahanga koosi abamenyile Antiokia, Siria nende Kilikia.

²⁴Khwahulile mbu, abandu bandi abomung'anda yefwe betsa nibamunyasia, nibonoonia emioyo chienywe namakhuwa kabamuboolela, ne kata kario, ifwe shikhwali nikhubalachilisiye likhuwa liosi liosi tawe.

²⁵Kho khwikhaale halala mana nikhufuchilisania okhwahula abarumwa khubarume khwinywe. Baletsa nende abetsa befwe abaheelwa, Baranaba nende Paulo.

²⁶Bano nabandu abamala okhura obulamu bwabwe mumaraba nibalateeba eshindu shiosi ta, khulwa okhukhalabanila Omwami wefwe Yesu Kristo.

²⁷Khulweshio khumurumilanga Yuda nende Sila, abetsa okhumuboolela abeene akakhumuhandichiile.

²⁸Roho Omutakatifu halala ninefwe khufuchilisaniye mbu, khuleshe okhumeeta khwinywe likokolo lindi ta, habula mbu, mulinde amalako kano konyene mbu:

²⁹Mulaliekhwo eshiokhulia shiosi eshihaanilwe shinga omusango khubifwanani tawe. Mulaliekhwo amalasile kayo koosi noho kata inyama yeisolo yosi eyimichilwe tawe. Khandi mwilinde abeene khushifwabwi shiobuheeyi. Nimuba nimwilinda okhurula khumakhuwa kano, mulatsiililila obulayi. Mulindwe.”

³⁰Kho olwa abarumwa abo baseebulwa, barula nibatsia Antiokia, nibakhung'asia ing'anda yosi eyabasuubili mana nibabahelesia ibarwa eyo.

³¹Ne olwa abasuubili abo bachisooma, amakhuwa ako kabasangaasia khandi nikabatsuuba muno.

³²Yuda nende Sila abali abeene abalakusi, baboola ninabo khulweshise eshiraambi, nibabatinyia omwoyo nende okhubatsuuba.

³³Olunyuma lwokhubayo khulwa eshise shititi, abasuubili abo babaseebula nomulembe mana abarumwa abo nibakalushila abali nibabarumile. [

³⁴Nebutswa Sila yalola nibuli obulayi okhumenyakhwoyo.][9]

³⁵Ne Paulo nende Baranaba nibatong'a Antiokia, nibabayo khulwa eshisekhwo. Boosi halala nende abandi abanji bechesia nende okhuyaala likhuwa elia Omwami.

³⁶Olunyuma lwetsinyanga tsindiiti, Paulo yaboolela Baranaba ari, “Chende khukalushe khutsie khucheniye khandi abaana befwe mubuli litaala ewa khwayaala likhuwa elia Omwami, kho khumayilisie shinga olwa batsiilililanga.”

³⁷Baranaba yenya mbu, babukule Yohana owalangwa khandi mbu Mariko, atsie ninabo,

³⁸nebutswa Paulo shiyalola nibuli obulayi okhumubukula ta, shichila yabalekha Pamufilia naloba okhusanga ninabo mubukhalabani bwabwe.

³⁹Mana amayingane nikabaho hakari wabwe, ne nibalekhana; Baranaba nabukula Mariko, nibenjila muliaro nibatsia Kupuro.

⁴⁰Naye Paulo niyaahula Sila, ne olunyuma lwabasuubili okhubara hasi wobukoosia obwa Omwami barula nibatsia.

⁴¹Mana Paulo natsia nabira mu Siria nende Kilikia natinyilisinjia nende okhuralisia abetsikanisa etsio.