Read wanga EBIKHOLE BIA ABARUME 16 Bible Online

EBIKHOLE BIA ABARUME 16 - wanga bible

EBIKHOLE BIA ABARUME 16

¹Paulo yatsiililila niyoola Deribe nende Lisitera, ewa omukristo undi owalangwa mbu, Timotseyo yali niyamenya. Nyinamwana owali yesi omukristo yali omuyahudi, nebutswa samwana yali omugiriki.

²Abasuubili boosi abali Lisitera nende Ikonio betsoomia Timotseyo.

³Paulo yenya mbu abukule Timotseyo atsie ninaye, kho namusheba. Yakhola ario shichila Abayahudi boosi abamenya mumbali etsio, bali nibamanya mbu samwana Timotseyo nomugiriki.

⁴Ne olwa batsiililila khuluchendo olwo babirira mumataala nibahelesia abasuubili amalako akabarume nende abakofu ba Yerusalemu bali nibabisiye nibababoolela mbu, balonde amalako ako.

⁵Kho abetsikanisa etsio nibatsuubwa okhuba abamaani mubusuubili khandi nibameetekha buli inyanga.

⁶Batsiililila noluchendo nibabirira mungongo etsia Firigia nende Galatia, ne nibalayaala likhuwa elia Omwami mu Asia ta, shichila Roho Omutakatifu shiyabafuchilila tawe.

⁷Ne olwa boola khulwakho lwa Misia, bateema okhutsia mulukongo lwa Bitsinia, nebutswa Roho wa Yesu shiyabafuchilila tawe.

⁸Kho nibatsiilila noluchendo shilunji nibabira mu Misia nibatsia Tiroasi.

⁹Mana eshilo eshio, Paulo yalola lilolelo, elia yalolamwo omundu owa Makedonia nasinjiile namusaayanga naboola ari, “Yambukha witse Makedonia okhukhoonye!”

¹⁰Ne lwangu olwa Paulo yalola lilolelo elo, khwerechekha okhutsia Makedonia lwangu, shichila khwalola mbu, Nyasaye akhulanjile okhuyaalila abandu abo Injiili.

¹¹Kho khwarula Tiroasi nikhutsila mumeeli nikhukhalasia shilunji okhuula Samotserake, ne olwa bwashia nikhuula Neapoli.

¹²Ne okhurulayo khwatsia mwitookho elia Abafilipi, nilio litookho liambeli mulukongo lwa Makedonia, eliarukungwa nende Abaroma. Khwamenya mulukongo olwo tsinyanga tsinyinji.

¹³Khunyanga eya Isabato khwarula mwitookho nikhutsia khulukuku lwomwalo, ewa khwapaaranga mbu, habundu hakhabaho aha Abayahudi bakhung'anilanga khulwa okhusaaya. Khwekhala hasi nikhuboola nende abakhasi abali nibakhung'anileho.

¹⁴Mulala khubarecheresia kakhwaboola yali omukhasi mbu, Ludia okhurula Tsiatira, owali omukholi wobukhala bwetsingubo tsiesambarau. Yali omukhasi owenamilanga Nyasaye. Naye Omwami yekula omwoyokwe nahulila amakhuwa aka Paulo yali naboolanga.

¹⁵Olunyuma, ye nende abeinzuye abali nibabatiisibwe yakhwinjisia ewuwe, naboola ari, “Nimuba nimulutsi mbu, isie endi omusuubili watoto muwami, yitse mumenye munzu mwanje.” Mana nakhusaaya mbu khutsie ewuwe.

¹⁶I nyanga yindi olwa khwali nikhutsitsanga habundu ahokhusaaya, khwabukaanilwa nende omukhaana undi owali neshishieno, eshiamunyalilanga okhulakula aketsa okhwikholekha olunyuma. Omukhaana oyo yareerelanga abakhongobe amapesa amanji khulwa obufumubwe.

¹⁷Mana naloonda khu Paulo nalanjilisinjia ari, “Abandu bano nabakhalabani ba Nyasaye Omukhongo Muno! Bamuboolelanga shinga olwa munyala okhuhonibwa!”

¹⁸Yatsiililila okhulanjisia ario khulwa tsinyanga tsinyinji, okhuula Paulo namusinyishila muno, nashiukhana naboolela eshishieno eshio ari, “Muliira lia Yesu Kristo, ekhulaka mbu omurulemwo!” Mana eshishieno eshio nishimurulamwo eshise eshio.

¹⁹Olwa abakhongobe bamanyilisia mbu, injila yabwe eyokhunyoolelamwo amapesa yihwele, batiila Paulo nende Sila nibabakhwesa nibabayila haluyia imbeli wabemilisi okhuyaasibwa habulafu.

²⁰Ne olwa bali nibabarerile imbeli wabayaasi ba Roma, abandu abo baboola bari, “Abandu bano nabayahudi, ne bakholanga induli mwitookho liefwe lino.

²¹Bechesinjia emiima echiamalako kefwe kalafuchililanga tawe. Ifwe khuli Abaroma, ne shikhunyala okhufuchilila emiima echio kata okhuchiloonda tawe.”

²²Mana abomukanda boosi nibabonga omukhono mukhwinjilila Paulo nende Sila. Mana abakhalachi beshiina abo nibarandula tsingubo tsia Paulo nende Sila nibalaka mbu, banywekhwe netsisaala.

²³Olunyuma lwokhubanywekha obutinyu babekalila mumbohe, mana omulindi weimbohe eyo nalakwa mbu, abekalile obutinyu.

²⁴Shinga lwomulindi oyo yali nalachilwe okhukhola, yabenjisia mushikoro eshiomukari shiene shieimbohe eyo, mana naboha ebilenje biabwe nebitiili ebisiro.

²⁵Ahambi mushilo hakari Paulo nende Sila bali nibasaayanga nende okhwimba tsinyimbo tsiokhwitsoomia Nyasaye, nabo ababohe bandi bali nibabarecheresinjia.

²⁶Mubwangu bwene obwo, betsukhana eshialo nishirenga obutinyu, nishitechesia imbohe eyo okhuula khumuse kwayo. Ne habwene nahabwene emiliango chiosi nichikukha, ne eminyololo chiababohe boosi nichibohololokha.

²⁷Ne lwomulindi weimbohe eyo yabuukha, nalola emiliango chieimbohe chiosi nichikuushe, yapaara mbu, ababohe boosi beluushe. Mana natsomola olukangalwe mbu, yeyiire omwene.

²⁸Nebutswa Paulo yalanjilisia obutinyu ari, “shiolesaalisia tawe! Fwesi pe khuli hano!”

²⁹Omulindi oyo nalanga mbu bareere itaha, mana niyenjilamwo lwangu, nakwa mumakulu aka Paulo nende Sila narenganga.

³⁰Mana nabayila elwanyi nabareeba ari, “Abami, ekhole shiina kho ehonibwe?” .

³¹Nabo nibamukalusia bari, “Suubila mu Omwami Yesu, ne olahonibwa, iwe nende abeinzuyo boosi.”

³²Mana nibamuyaalila likhuwa elia Omwami nende abo boosi abali munzuye.

³³Mana mubise bieshilo tsana ebio, omulindi oyo yababukula, niyoosia amakhupache kabwe, ne habwenaho ye nende abeinzuye boosi nibabatiisibwa.

³⁴Mana nabukula Paulo nende Sila nabayila munzumwe, ne nabahelesia eshiokhulia. Ye nende abeinzuye bekhooya muno, shichila bulano bali nibasuubile mu Nyasaye.

³⁵Inyanga yolondakhwo mumabwibwi, abobunyali ba Roma baruma abelihe nelilako nibaboola bari, “Lekhuule abandu abo batsie.”

³⁶Kho omulindi weimbohe naboolela Paulo ari, “Abakhongo barumile lilako mbu, iwe nende Sila mulekhuulwe mutsie. Kho munyala okhutsia bulano, ne mutsie nomulembe.”

³⁷Nebutswa Paulo yaboolela abelihe abo ari, “Shikhunyooleshekhwo nikhuli neshikha shiosi shiosi ta, nebutswa bakhunyweshile habulafu haluyia, ne khuli abebule ba Roma! Bakhwikaliile mumbohe, ne bulano benya okhukhulekhuula khutsie masilisi. Shikanyalikha tawe! Lekha abakhongo ba Roma abeene betse hano mana bakhulekhuule.”

³⁸Abelihe abo nibatsia nibaboolela abakhongo ba Roma amakhuwa ako, ne olwa bahulila mbu, Paulo nende Sila nabebule ba Roma, batiilwa noburi muno.

³⁹Kho abakhongo abo nibatsia okhubasaba obulesheli, mana nibabarusia mumbohe, ne nibababoolela mbu, barule mwitookho elo.

⁴⁰Mana Paulo nende Sila nibarula mumbohe nibatsia munzu mwa Ludia. Ebweneyo babukaana nende abasuubili, nibababoolela amakhuwa kokhubatinyisia ne nibenyookha.