Read wanga EBIKHOLE BIA ABARUME 17 Bible Online

EBIKHOLE BIA ABARUME 17 - wanga bible

EBIKHOLE BIA ABARUME 17

¹Ne olwa Paulo nende Sila barulayo, babirila Amufipoli nende Apolonia niboola Tsesalonika ewa Isinagogi yali.

²Ne shinga olwa Paulo yakholanga buli lwosi, yatsia musinagogi. Ne nayingana nende abandu khuluhoono lwetsinyanga tsitaru tsie Isabato.

³Yabenoosia nende okhubeechesia Amahandiko nabamanyia shinga olwa Kristo oyo yali mbu, okhuula anyakhane mana alamusibwe okhurula mukhufwa. Paulo naboola ari, “Yesu uno owa emurumbulilanga uno, niye Kristo.”

⁴Mana abandi khubo nibasuubila amakhuwa ako, kho nibalonda khu Paulo nende Sila. Abakhasi abemilisi nende omukanda omukhongo kwa Abagiriki boosi nibasangakhwo nibamwinamila Nyasaye.

⁵Nebutswa Abayahudi batiilwa imbalikha nibakhung'asia abandu bandi abamayanu abokhushiro nibaba omukanda omukhongo. Nibakhola indiri mwitookho liosi, mana nibenjila mungo mwomundu undi mbu Yasoni, nibenyanga okhurusiamwo Paulo nende Sila, okhubareera ebulafu khubandu.

⁶Nebutswa shibabanyoolamwo ta, kho nibakhwesa Yasoni nende abasuubili bandi nibabareera khubobunyali belitookho nibayiiba bari, “Abandu bano bareeranga amatinyu buli habundu! Ne bulano betsile mwitookho liefwe,

⁷naye Yasoni abenjisiiye munzumwe. Boosi bafunakanga amalako akomuruchi wa Roma, nibaboola mbu, omuruchi undi aliho oulangwa mbu Yesu.”

⁸Ne olwa abobunyali belitookho nende abomukanda bahulila amakhuwa ako bahenda omwoyo.

⁹Mana abakhongo abo nibaboolela Yasoni nende abashie mbu, barunje omurungo kwokhuleekhuulwa mana nibabalekhuula nibatsia.

¹⁰Mubwangu bwene obwo, abasuubili baruma Paulo nende Sila mushilo eshio okhutsia Berea. Ne olwa boolayo batsia musinagogi eya Abayahudi.

¹¹Abandu bebweneyo bali abarecherefu okhushila Abatsesalonika. Barecheresia likhuwa nomwoyo kwosi, ne buli nyanga banoonelesinjia Amahandiko okhulola nikaba mbu, aka Paulo nende Sila baboolanga kali akatieli noho ta.

¹²Abanji khubo basuubila, mana kata abakhasi Abagiriki abanji, abahebungwa oluyali nabandu nende abasaatsa abanji Abagiriki boosi nibasuubila.

¹³Nebutswa olwa Abayahudi aba Tsesalonika bahulila mbu, Paulo yali nayaalile khandi likhuwa lia Nyasaye Berea, betsayo nibachaaka okhutubuula nende okhukoyasia emioyo chiabomukanda.

¹⁴Mubwangu bwene obwo, abasuubili bakooba Paulo okhuula khulukuku lweinyanza, naye Sila nende Timotseyo nibatong'a Berea.

¹⁵Abandu abakooba Paulo bamuusia Atsene. Mana nibakalukha Berea nibali namalachilisio okhurula khu Paulo mbu, Sila nende Timotseyo bamulondekhwo lwangu.

¹⁶Olwa Paulo yali nashilindililanga Sila nende Timotseyo okhwitsa Atsene, omwoyokwe kwasinyikha muno olwa yalola mbu, litaala lia Atsene liosi liali nilietsulamwo ebifwanani biabanyasaye.

¹⁷Kho naboola nende Abayahudi musinagogi nende abamahanga abenamilanga Nyasaye nende abandu bandi ababiranga khushiiro buli nyanga.

¹⁸Abandi khubo bafuchililanga ameechesio ka Epikurio nende aka Sitoiki, boosi bayingana ninaye. Abandi khubo nibareeba bari, “Nishiina eshiomundu omwilakalakani uno ateemanga okhuboola?” Abandi nabo nibakalusia bari, “Afwana shinga ouboolanga khukabanyasaye abacheni.” Baboola bario, shichila Paulo yali nayaalanga khu aka Yesu nende akokhulamusibwa.

¹⁹Kho nibabukula Paulo nibamureera imbeli weshiina shielitookho eshiekhalanga habundu ahalangwa mbu, Areopago, nibaboola bari, “Khwenyanga okhumanya amechesio amacheni aka wechesinjia ako.

²⁰Amechesio kandi aka khuhulilanga iwe niwechesia kalolekhanga amacheni khifwe, nefu khwenyanga okhumanya eshifune shiako.”

²¹(Okhuba abebule boosi ba Atsene nende abacheni boosi abamenyangayo bayinyanga okhwikhoonyela obwiyangu bwabwe obunji okhuhulila nende okhuboolela abashiabwe amakhuwa kaliho amacheni.)

²²Kho Paulo nasinjila hakari weshiina eshia Areopago naboola ari, “Inywe abandu ba Atsene, endolanga mbu, muli abandu abayililisinjia neshinani khumakhuwa keidiini.

²³Okhuba olwa enjendilenje nembira mwitookho lienywe lino, enduutsi aha mwinamilanga abanyasaye benywe, enyoolile eshimalilo shiemisango shindi eshiahandikwakhwo mbu, ‘Khu omunyasaye oulamanyiishe ta,’ owa mwinamilanga ne nimulamumanyile ta, niye owa bulano emurumbulilanga.

²⁴Nyasaye owalonga eshialo nende biosi ebilimwo, niye Omwami welikulu nende eshialo. Ne shiamenyanga mutsihekalu tsiombakhwa nabandu tawe.

²⁵Kata shiatambanga eshindu shiosi shiosi eshia khwakhamuhelesia khulwa okhumukhalabanila ta, shichila niye omwene ouhaananga obulamu nende emiuya nende buli shindu khubuli mundu.

²⁶Yalonga tsimbia tsiosi etsiabandu okhurula khumundu mulala, mana nabasalaasia okhumenya mushialo shiosi. Omwami tsana oyo, omwene yarechekha khale ebise nende habundu aha abandu abo bakwanile okhumenya.

²⁷Yakhola ario kho mbu bamukhaabe, mana haundi bamunyoole, nebutswa Nyasaye toto mwene, shiali ehale okhurula khubuli mulala khwifwe tawe.

²⁸Shinga lwomundu oundi yaboola ari, ‘Khumenyanga muye, khuchendelanga muye khandi khubetsangaho muye.’ Khandi shinga abembi benywe bandi bemba nibaboola bari, ‘Ifwe fwesi khandi khuli abaanabe.’

²⁹Kho olwa khuli abaana ba Nyasaye, shikhukwanile okhupaara mbu, obukondo bwa Nyasaye tsana oyo, bufwana shinga eshifwanani shietsahabu noho ifetsa kata lichina, elibatsilwe mubuchesi bwomundu tawe.

³⁰Olwa abandu bali nibashili okhumanya Nyasaye, ye shiyatebanga tawe. Nebutswa bulano alakanga abandu boosi buli habundu, mbu barule munjila tsiabwe tsiobwonooni.

³¹Okhuba yarechekha inyanga eya alikhalachilwakhwo eshialo shiosi eshiina mubulunjishi okhubirira khumundu mulala owa yaahula. Khandi khulwa okhumanyisia buli mundu mbu, amakhuwa ako nakatoto, yalamusiiye owatsana oyo okhurula mukhufwa!”

³²Kho olwa bahulila Paulo naboola amakhuwa akokhulamukha okhurula mukhufwa, abandi khubo bamutseshelela, nabandi nibaboola bari, “Khwakhekomba okhuhulila noboola amakhuwa kano khandi.”

³³Mana Paulo narula mumukhung'ano okwo.

³⁴Nebutswa abandi bamuloondakhwo ne nibasuubila. Mulala khubo yali Dionisio owali mulala khubeshiina shia Areopago, nende omukhasi undi oulangwa mbu Damari nende abandu bandi.